GALATIA 6
6
Yngkhehkheh Peehrik Ymbomnii
1Kauw kanae ae, isii ting ibuw meechu nenuw ing suwr tanuwve, nenuwkho ymbatheem arusa tanuwna ynriimruw, amana changchii aechu laethacher mee aenche iduwrjaeh ing ivakipeeh ae rasiing. 2Nenuw yngkheh ing yngkheh peehrik ymbomruw, vokhehkho jinge ichii ing Khrista vajeer chonghakchu areer basuwruw. 3Achuw yngkheh ing atakcha yntangamah naka mee yngkhehping tanave, ataksah ynchaesahva. 4Changvakonchu amee siir ing ama anongchu ensarasiing. Amanache saknave ama ing yndingsah phavaata, mee reentaang nongna yndingmah rasiing. 5Akhaechuve amee siir ing apeehrikchu reensava chiiva.
6Thangnang chong iteen aphasah mee inche aanchuw ningnache isasehchu pirasiing.
7Nentaksah ynchaemahruw; Thangnang maniisah mahruw, akhae-chuve mee ing avorsah inuwzii ing ama ing ruwpsa vaata. 8Ataksah hakchaang khaena avor mee inche hakchaang tanii imaangchu ruwpsa vaata; laetha khaena avor mee inche laetha tanii ichen naemah iringnii ruwpvaata. 9Chukhaenache isa nong ynturae jamah manuw; akhaechuve jungsuurmah manuwve, apha ahungvi raenche inuw ing ruwpvataruw. 10Chukhaenache inuw ing apha ymphasah raenche inuw ing mee vakhaena amanche athurfhuwseh ing thacha eengkuw ae taklinache isachu tusataruw.
Achinii Chong re Salaam
11Enruw kakikrap ing aajaeh iruung ziih ing neningna chongthen i kavebaziihva! 12Hakchaang na yndangjoh aadik vakhae ing nenuwchu vinchiip mantuteeh kenta ynchii-paetah, havi khrista khros khaena ijachaam emphaniimah khaena vatah. 13Akhaechuve vinchiip rap aengkho entaksah ing vajeer chonghak ngahmah ae; enuw ing hakchaang na changmahka enuw ing nenghakchaang nache enrungniisah khaena nentaklina vinchiip entuvatah. 14Changvakonchu inuw Aafhuw Jesu Khrista khros khaenamah naka, ki karuungniimah ynsuwhrasiing, akhaechuve Aafhuw khros jaarna laaruw paam ing ka-ningna amanche ki ing laaruw paamna khros nache ithiiping. 15Akhaechuve vinchiip re vinchiipmah yntanga khommahva, changvakonchu itharpeh mee ing ynseemchu vatah. 16Amanche havana deenziih inuwzii ing isi vakhae ningnache idae vokhehkho ningchuwh amanche Isrel ae Thangnang taklinache om ynsuwhrasiing.
17Atii basen naka achuw ingkho kichu imanjamah rasiing; akhaechuve Aafhuw Jesu khaena kataklina abuw inae kareensa.
18Kauw kanae ae, inuw vakhae Aafhuw Jesu Khrista tungsiihchu nenlaetha thoh ynruwhakjaeh ynsuwhrasiing. Amen.
Currently Selected:
GALATIA 6: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
