GALATIA 5
5
Ruwkuwrjoh Nenphachu Manehtherruw
1Ruwkuwrjoh ympha khaena inuwchu Khrista ing vaesang ing ymbathenpa; chukhaenache icheepther ing ngiirruw, amanche suwh riingkor nache athar umahruw.
2Rungaeruw, Pol ki ing neningna kariirnah amachuve, nenuw vinchiip mee unsywh tanuwve, Khrista chu neningna nentuungsah yntanga omahnii. 3Amanche ki ing vinchiip mee vakhae ningna saarkhii kapeehnah amachuve, ama ing vajeer chonghak aangkheng amanjiichirnii khaena ler atuurva. 4Vajeer chonghak ajaar ing ichumchirnii nentu nenuw chuve Khrista tanii ruw yngki ympehsa, vokhehkho nenuw atungsiih tanii jungtak sachuw. 5Inuw chuve laetha jaarna thacha inche ichum ynthiing ningmandenchu ynghahva.
6Jesu Khrista ningna chembe vinchiip kho vinchiipmah kho yntanga ikaanii omah; changvakonchu ningsiih ajaarna thacha ing nong itu ynchenva. 7Nenuw isajaeh inche hungtaennachuw; ichumchu ijiiniimah khaena achuw ing nenuwchu yngkhaamva? 8Batheem ichii ive nenuwchu ingeen Aafhuw tanii mahva. 9#1 Kor 5.6Chor topohti ing apumchu amanruungnah. 10Nenuw ing reentaang ting nenbarungriir mandenmah tanuw ta ingka Aafhuw thoh ynruw ing kabarungriir ngamna; changvakonchu nentaklina ijachaam ympeehchu achuwchuw vakhangnare, vajeer phasa vaata.
11Kauw kanae ae, ki ing ataraenpha ing vinchiip khaena katongjaeh vana-ve, ynchii khaena ki ataraenpha ing ijachaam kaphava? Amachu vanave khros khaena ijanii omahsa. 12Nenuw ijachaam ympeeh aechu vinchiip jaehpang mahka entak phanii ing manchiip ae nave, kangae chiirom vachiiva.
13Kauw kanae ae, nenuwchu ruw-kuwrjohnii khaena yngeenpa, havana ruwkuwrjoh inge hakchaang nungaenii khaena tumahruw, changvakonchu ningsiih inche yngkheh re yngkheh rukuum ynturuw. 14Akhaechuve vajeer chonghak aangkhenglaang chongsae yngkheh ing akuwm chirva amachuve, “Nang ing naveenchaang aechu nataksahrap vaang naning mansiihva nachiipae.” 15Changvakonchu nenuw ing yngkheh re yngkheh ynsi tanuwka ynsa tanuwve, nenuw yngkheh ing yngkhehchu abasuwmniimah ing ynriimruw.
Laetha re Laaruw mee Nunu
16Changvakonchu ki ing kariirnah, ynthiing laetha jaarna siruw, amana chembe nenghakchaang ing aadikchu phamahnii. 17#Rom 7.15-23Hakchaang ing aadik inche ynthiing laethachu ajeehniinah, amanche ynthiing laetha inche hakchaang ing aadikchu ajeehniinah; amachuve nenuw ing nengadik chaapchu nentuniimah ing ynniimeh havi inge yngkheh re yngkheh ynjeehnii aeka mae yntuwhnae. 18Changvakonchu ynthiing laetha ing nenuwchu ipuhnave, nenuw vajeer chonghak dernache ongmah sachuw.
19Atarae hakchaang ing atu nong yndangna amachuve hava vakhae iva: Reentaang rumee fhuwsar taklina ichuwhmah itu, ynthiingmah, atu ari isamah, 20lae ruthaksii irum, mee aser, yngensiimah, mee ajeehnii, kallak om, barung isiipak, ataksah khaenapang amanden, barungriir yntinniimah, ichummah ing om; 21sehmaner om, miktheh, juw ynruw, isamahna nungae, hangchii nong havi nunu ing atu mee chaap ing utaraenkho Thangnang lipah tungmahnii ae ichii maen ing kamanthang vasah vaangkhe, ataraenkho neningna athar kamanthangnah.
22Changvakonchu ynthiing laetha aanla chuve, ningsiih, rotharoh, idae, apha iseeh ing ikhaangcheh, mee achaarpeeh, isa, thacha, 23iduwrjaeh, ataksah yngahcheh chuva. Havi chungna ajeehnii vajeer chonghak yntanga omah. 24Amanche Jesu Khrista mee ynsuwh ae inche hak-chaang ing amandenna barungriir iruwh re aadik chaapchu khros nache athehpa. 25Inuw ing ynthiing laetha jaarna ringmanuwve, laetha ajaarnache isikho sisataruw. 26Inuw yndingmah vaanchiiva, Yngkheh yngkheh thir ynfhuwrvaanchii mahva vokhehkho yngkheh yngkheh kallak omvaanchii mahva.
Currently Selected:
GALATIA 5: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
