EPHESIA 1
1
1 #
Nong 18.19-21; 19.1 Thangnang ing amandenna Jesu Khrista chongthang ivi Pol ki ing, Ephisia na ong ynthiing mee ae ningna vokhehkho Jesu Khrista ningna thachafhuw om neningnache, 2inuw Apa Thangnang re Aafhuw Jesu Khrista tanii tungsiih re idaechu om ynsuwhrasiing.
Khrista ningna Laethacher Bor
3Thangnang vokhehkho inuw Aafhuw Jesu Khrista ampachu inuw ing manpahsa taruw! Akhaechuve Khrista ajaarna ama ing thangbaen vakhae tanii laethacher bor inche inuwchu bor ympeehpa. 4Thangnang ing laaruw paam aseemmah rirae, ama ing Khrista ajaarna inuw ing ynthiing vokhehkho miraar omahdeh ing amee eensuwhnii inche eeteer vasahva. 5Thangnang ing inuw vakhaechu Jesu Khrista jaarna asiti ynsuwhnii khaenache amanreep vasahva. Havi ama apennii vokhehkho amanden chuva. 6Inuw ing angakpah Thangnang atungsiih khaena vokhehkho asapa jaarna ngareh kikthuur ympeeh khaenache manpahsa taruw. 7#Kol 1.14Khrista ing inuwchu isii tanii ikarpeehnii khaena aringkum ympidehsa, amanche atii inuw yntaklina isii icherchu akuhpa. Havi Thangnang atungsiih savang ajaarna chemba. 8Ama ing ynning nache ivaeh omahdeh ing aangkhenglaang ising iveer vokhehkho amanghuwchu, ataksah ing amanden apennii inuwzii ing ithuwhpak ing amandenchu ynning nache amanthangpa, 9amana chembe Thangnang ing puhvachii aphachu ahenpha raenche, Khrista jaarna thangbaen vokhehkho laaruw paamna om chaap yngkhehpang ing omnaka, 10Thangnang ing ajesir inuwzii ing apha ichiinache thangbaen vokhehkho laaruw paamna om ynseem peehchaap yngkhehpang ing omnaka Khrista inche arusae ynsuwhnii khaenava.
11Thangnang ing asir vokhehkho amanreep inuwzii ing aangkhenglaang hemanchichirka amanche abasenlimna amanden vasah inuwzii ing inuw vakhaechu Khrista ajaarnache amee ynsuwhnii khaena yngateerpa, 12amana chembe Khrista ningna amaensana ningmanden ymmangom inuw ing Thangnang alaar isachu ympahnii khaenava.
13Nenuwkho ichum chongjeer nensiithoh Thangnang mee ynsuwh sachuw, isa chong inche manlaenpeeh neningna ajereenpa, amanche Khrista ningna nenthachapa; amakhaena Thangnang ing ynthiing laetha ajaarna nentaklina chongreep ahakchu anampa. 14Laetha ingkho ymbarung amangamsa amachuve Thangnang ing amee ae ningna chongreep atuchu phavataruw. Thangnang alaar isachu inuw manpahsa taruw.
Pol ing Athamsah
15Chukhaenache nenuw ing Aafhuw Jesu ningna nenthacha vokhehkho Thangnang amee vakhaechu nening nemansiih kasiitahna, 16nengkhaena Thangnang ympahchu manchenmah ing. Kathamsahrae nenuw vakhaechu kaansiisahnahchuw, 17amathoh ynruw ing Jesu Khrista chu neningna yndang-naka nemanghuwnii ing Aafhuw Jesu Khrista ampa Thangnang alaar isa inche ising iveernii laetha ipisana, 18nenbarungriir mik veersana nenuw-chu yngkhaena yngeenva ichii chukho manghuw tanuwka ynthiing mee ae khaena iphafhuw ompak rotharohnii lerchiichu nenphanii khaena, 19vokhehkho atucheh aricheh inuwzii ing athacha ae ningna uurnii isamah ing inempak ipir ruwreng omna ichii chukho nemanghuwnii ing, 20ama ruwreng inche Khrista chu ithii tanii manringka thangbaen paam nache Thangnang tachangna mangongka, 21lipah aapuh ruwreng amanche aacheh vakhae taklina vokhehkho laaruw paamna ataraennii amanche hungvi vachiina, 22#Kol 1.18ruming chaap aderna mangomchirka, 23ama asha aruwrthiing aongnii aafhuwchu abasuwpa.
Currently Selected:
EPHESIA 1: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
