GALATIA 4
4
1Atarae ki ing kariirnah, ruw kuumvachii inche anaepang raen-taang ama ing aafhuw ynsuwkhaang nare, suwhthoh aantheepnii yntanga omah. 2Chukhaenache ampa ing aanii amanaechu aphamahri raentaang, ama aacheer ae vokhehkho rukuumtu ae dernache ongva. 3Amavaangche inuw ynnaepang raenche laaruw mee ing athurfhuwva ichii ing amanden dernache iphuwpka omvamuw. 4Changvakonchu aphachu ahenphadeh tahnache, Thangnang inche rupanuw ing vajeer chonghak dernache abaring asapa chu ajenchiirpa; 5#Rom 8.15-17amachuve asapa inche vajeer chonghak derna ong aechu ahenbarinii khaenava, amana chembe inuw ing ijuhsah sitichu ymphanii khaenava.
6Amanche nenuw chuve asitichu ynsuwh vachuw khaka, Thangnang ing asapa laethachu nenbarungriir sungna ajenbathenpa, amana laetha inche Aba, Apa! taka uungna. 7Chukhaenache nenuw suwhchu ynsuwhmah sachuw changvakonchu asiti ynsuwh sachuw, amanche asitichu ynsuwh vatanuwve, Khrista jaarna Thangnang ing adeenchu ruw kuumvachii ynsuwh sachuw.
Pol ing Galatia khaena Amanden
8Isivasahana Thangnang mang-huwmah chuwka nenuw ing thangnang mah aechu rukuum nentu. 9Changvakonchu atiichembe nenuw ing Thangnang chu nemanghuwpa vokhehkho Thangnang ingkho nenuwchu athiseh ing ymmanghuwpa, amachu ynsaangkhe nenuw ing isuurpak vokhehkho athurfhuwva ichii ing nemanden yntuurpak tingche athar vokheh ynrireeh vachuw? Ynchii khaena athar nenuw ing suwh ynsuwh nengadikva? 10Nenuw ing inii tha apha hungvi hungvichu vokhehkho kumchu nengahnah. 11Ki ing nengkhaena aruwh thangsii ing katu varammo ta ingka nengkhaena ynchikning!
12Kauw kanae ae, kivaange hung-taruw ta ingka kathamsahnahchuw, akhaechuve kikho nenuw vaange hungtaning. Nenuw ing kaningna yntanga raarmah dehchuw. 13Chang-vakonchu nenuw ing nemanghuwsa amachuve, kahakchaang kachehmah khaena amaensana neningna isa chongchu katongpa. 14Changvakonchu kahakchaang kachehmah inche neningna iruungpak chaang ennii ynsuwhkhang nare, nenuw ing irathiih mahchuw vokhehkho irumah tumahchuw, changvakonchu Thang-nang avaarmee vaang amanche Jesu Khrista churap vaang nenuw ing kichu ynrisahchuw. 15Chukhaenache nenrotha rohnii borchu ynchiiva? Neningna saarkhii katunah amachuve, chehtanuwve nenuw ing nemik ipher tanuwka kaningna pinungka tavanen-chii sapvara. 16Amantah nache ichum kariir tahne nenuw ijeehniichu ynsuwhping chang?
17Enuw ing nenuwchu embarungriir iruwh ing isa khaena ynjong mahpae, changvakonchu nenuw ing enuwchu barungriir iruwh ing ijong ae rasiing ichiinii khaenache, enuw ing nenuwchu kaningtanii yndahnii engadik vatah. 18Changvakonchu nenuw ing kithoh yngonghak raenpang mahka apha vakhaena isa nongna barungriir iruwh ing ijongchu isava. 19Kaning mansiih naepang ae, nentaklina Khrista maong nemangom mahri raentaang, nengkhaena siti baring vachii barungriir ijavaangkhe tikning. 20Changvakonchu atarae ki ing nenuw thoh onghaknii vokhehkho kaaruur yntehnii khaena kamandensahva; akhaechuve nengkhaena ki jaaning.
Hagar re Sara taklina Ynghuwnii
21Kaningna riirruw, vajeer chonghak derna ong aadik ae, nenuw vajeer chonghakchu nensiimah riva? 22Havi ynziihka om vasahva amachuve, Abraham ing sapa ynniimeh adeen, yngkheh inche suwh rupanuw taniiva amanche yngkheh inche ruwkuwrjoh rupanuw taniiva. 23Suwh rupanuw tanii chuve hakchaang inuwzii ing abaringva, changvakonchu ruwkuwr-joh rupanuw tanii chuve chongiir jaarna abaringva. 24Havi inge ynghuwnii omna; akhaechuve rupanuw ynniimeh havi chongreep ynniimehva; yngkheh ing Sinai bung tanii suwh ing ongnii khaena siti abaring Hagar chuva, 25amanche Hagar havi Arabia Lipahna om Sinai bungva, amanche atarae om i Jerusalem thoh aanghakva; akhaechuve Jerusalem i asiti aethoh ynruw ing suwh ing ongnae. 26Changvakonchu chungtanii Jerusalem chuve ruwkuwrjoh rupanuw chuva, amachuve inuw vakhae anuwva. 27Akhaechuve havi ynziih vasahva,
“Siti abaringmah, nang narotha manrohra;
Nae abaringmah changamnuw,
nang ynteenjaar ing uungla;
akhaechuve fhuwsar omnuw ikhuwm sanaennuw siti ae ing inem athisae.”
28Kauw kanae ae, Isak vaangkhe inuw chuve chongiir siti vamuw. 29Changvakonchu hakchaang inuwzii ing ynring mee inche laetha inuwzii ing abaring meechu ajeehnii vaangkhe ataraenkho tikna. 30Changva-konchu ynthiing thiimziih ing ynchii ariirse? Suwh rupanuw re asapachu thurruw, akhaechuve suwh rupanuw asapa ing ruwkuwrjoh rupanuw sapa thoh utaraenkho iphafhuwchu phahakmahnii ae. 31Chukhaenache kauw kanae ae, inuw chuve suwh rupa-nuw siti chumah vamuw, ruwkuwrjoh rupanuw sitichu vamuw.
Currently Selected:
GALATIA 4: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
