EPHESIA 4
4
Hakchaang Barungriir Ynchimnii
1Aafhuw khaena kaeshumna ong Pol ki ing neningna kariirsahnah, amachuve nenuwchu yngeen inuwzii ing matik icha inche isipeehruw; 2#Kol 3.12,13aangkhengna ynjuursah re iduwr thoh ynruw ing, apha iseehpak ing ikhaangcheh thoh ynruw ing ningsiih nache yngkheh ing yngkheh taklina khaanghak nuwna, 3idae ing ipurnache vokhehkho laethana yngkhehpang ing omchu ingahnii inche barungriir iruwh ing itupeeh-ruw. 4Nenuwchu ningmanden yngkhehpang nache yngeen vaang, hakchaang yngkheh vokhehkho laetha yngkheh omna, 5Aafhuw yngkheh, thacha yngkheh, baptais itu yngkheh, 6Thangnang vokhehkho laaruw mee vakhae apa yngkheh omna, amachuve aangkhenglaangna Aafhuw, aangkhenglaangna nong atu vokhehkho aangkhenglaangna omna.
7Changvakonchu Khrista kikthuur-chu achaang manaeka inuw vakhae ynningnache atungsiihchu ympipa. 8Chukhaenache jinge ariirsa,
“Aafhuw ing chungting akarlaenche,
ynsuwr aeka om aechu aruwpa vokhehkho laaruw mee ningnache kikthuurchu apeehpa.”
9Atii Aafhuw ing chungting karsa ichii ichuve laaruw paam der itadeh-ting Aafhuw ing jungchumkho jungchumsa ichiimah naka ynchiiva chang? 10Ijungchum Aafhuw ichuve aangkhenglaangna ongchirnii khaena thangbaen vakhae chungting ikarkho ikar Aafhuw churapva. 11Amana Aafhuw ing areh aechu chongthang ing, areh inche jaephar ing, areh inche isa chong ijeermee ing, amanche areh aenche pastar ing vokhehkho aanchuw mee ynsuwhnii khaena kikthuur apeehpa, 12ynthiing aechu ynghuwtahna envaeniimah khaena, nongtunii khaena, Khrista hakchaangchu seemnii khaena, 13Thangnang sapa ynghuwna vokhehkho thacha tahna yngkhehpangnii ymphamahri raen-taang, mapung apha mee, Khrista vaang imin hungansuwhnii khaenava. 14Amana chembe ihuung iva ing vokhehkho mare om ing ynchuwpeeh sii ing varaangka hungchi avechi laaruw mee ikaam barungriir inche, ichummah enlosing inche naepang aevaang tamah manuw, 15changvakonchu ama changdenna ningsiih nache ichum ing chong manuwka, arusae ynsuwh Khrista ningnache aangkhenglaangna hungruungnii khaenava, 16#Kol 2.19Aafhuw ningtanii ing hakchaang aangkheng ynjom vokhehkho yntuw ajaarnache ichachak ing ynjomka vokhehkho yntuwka asik asik rutum yngkheh yngkheh achaang nache nong entu inuwzii ing, ningsiih ajaarnache hakchaang aangkhengchu aseemnah.
Khrista ningna ithar Ringkum
17Khrista rumingna ki ing kariirnah, amachuve reentaang mee aeng embarungriir ikaniimah ting empeeh vaang athar nenuw tamahruw. 18Akhaechuve embarungriirna emang-huwmah re embarungriir ipir inche manghuwva enchiichu vemanthimka, enuw Thangnang ringkum tanii asik meechu ynsuwhsae; 19vokhehkho embarungriir ipir lamher inche ipen naemah ing ynthiingmah vokhehkho ichuwhmah nong tunii nache entaksah ympisahsae.
20Changvakonchu nenuw chuve Khrista khaenache hava vakhae i nentam mahva! 21Nenuw ing Khrista khaena nensiivasah vokhehkho aningna ichumchu om vaangkhe ongtanuwve; 22#Kol 3.9ajae nenuw ing mare om ing paarchuwka nengadik inuwzii ing imaangniiting nensinii nenvakhar aangkhengkha mantharruw. 23Nenuw nenbarungriir sungna laetha omkha manthar nuwna, 24#Kol 3.10amanche Thang-nang vaang ichii ichum ynthiing vokhehkho ynthiing ing aseem vasah ithar meechu nenuw ing niiruw.
Inii nikheh nikhehna Ipaarnii
25Chukhaenache ichummah chaap bathen nuwna, nenuw nenveenchaang thohche ichum inche chongruw; akhaechuve inuw vakhae i hakchaang yngkhehpang vamuw. 26Nenthir afhuwrlae isii nong tumahruw, vokhehkho nenthir ifhuwrchu inii bathak mahruw; 27umlae ningna khamtong pimahdehruw. 28Lam abaruwhchak ingkhe athar baruwh-mah rasii, ama changdenna akiksah ing adeennii khaena isa nongchu tusana vokhehkho sara naeriing aechu bomrasiing. 29Nener nache isamah chong manchuwng mahruw changvakonchu ahenseemnii khaena isa chongsae chupang ichong peehruw, amana chembe aasii mee ae khaenache ikaanii ynsuwh vaata. 30Thangnang ynthiing laethachu manjamahruw; akhaechuve ikarvachii aanii khaenache nenuwchu ahak ynnampa. 31Chukhaenache ikhapak, mi ichuwng ing barungsii, thirfhuwr, fhuw itamchechor vokhehkho ithipak ing ichong thoh yngensiimah aangkhenglaang neningtanii suwhchir rasii. 32#Kol 3.13Hava vakhae i changdenna nenuw yngkheh yngkheh ynchaarruw, nenbarungriir duungrasii, Thangnang ingkho Khrista ajaarnache isii yngkuhpeeh vaang, nenuwkho yngkheh ing yngkheh taklina nenraar omchu yngkuhpeehruw.
Currently Selected:
EPHESIA 4: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
