EPHESIA 3
3
Reentaang mee ae khaena Pol ing Nong atu
1Jesu Khrista khaena kaeshum sungna ong Pol ki ing, reentaang mee ae nengkhaena Thangnang ting kathamsahnah. 2Nenuw ing nensiipa amachuve Thangnang tungsiihna nenuw nensaknii khaena havana nong i kaningna ympipa. 3Thangnang ing asir ithuwhpakchu ynghuwnii khaena kaningna amandangpa. Havi khaene itomsak ing kabaziihpa, 4#Kol 1.26,27nenuw amachu paatanuwve, nenuw ing Khrista khaena ithuwhpak kamanghuwchu manghuwva nenta. 5Havana ithuwhpak chong i atiive laetha jaarna ynthiing chongthang ae vokhehkho jaephar ae ningna amandang vaang, reentaang laaruw mee siti ae ningnache mansiimah; 6Amachuve isa chong ajaar inche Jesu Khrista ningna om chongreepchu ruw ikuum ynsuwhhaknii inche, hakchaang yngkhehpang ynsuwhhak-nii vokhehkho borchu iphahaknii khaenache reentaang mee ae chukho ynvaesae. 7Thangnang ningtanii ruwreng inche Aafhuw nong tunii kaningna ympeeh vasah kikthuur inuwzii ing, Thangnang isa chong khaena meenae ynsuwhsing. 8Isiing vakhae kaarna isiingseh kaningna havana tungsiih i ympeehpa, amana chembe ijong ynchehmah Khrista lerchiichu reentaang mee ae ningna tongningka, 9vokhehkho peeh aangkhenglaang aseem Thangnang ing asir inuwzii ing suwnthar aajaehna thuurjaehka om ithuwhpak chongsaechu mee vakhae ing imunii inche, 10thangbaen aphamsiirna ong aafhuw ae ningna, ruwreng ipir ae ningna, Thangnang ningtanii aziih aajaeh losingchu, atarae ruwrthiing ae ajaarnache ynghuwchehnii khaenava. 11Havi inuw Aafhuw Jesu Khrista ing asir suwnthar hungvi hungvina thoraang atu inuwjii ingva. 12Inuw ing Aafhuw ningna ynthacha ajaar inche thona om ing vokhehkho barungriir ingam ing hungruwhchu aningtanii ymphava. 13Havi khaene ki nengkhaena ijachaam kakhaangva vokhehkho nenuw nenchang atakniimah ing kaniihsahva; hava aangkhenglaang i nenuw nengkanii khaenava.
Khrista Ningsiih
14Havi khaene kakheerkhuw mansinsa ingka apa ningnache kathamsahva, 15thangbaenna vokhehkho laaruw paamna ong eengkuw chaap ing ichum rumingchu iphanii khaenache, 16Thangnang lerchii tanii alaar isa laetha jaarna nenuwchu ruwreng ipinaka nenpirnii khaenache kaniihsahva, 17vokhehkho thacha jaarna Khrista ing nenba-rungriir sungna ynringpeehnii khaena amanche Aafhuw alaar isachu neningna ipeehnii khaena, nenuw ningsiihna arajung ipae nache icheep ing omtanuwka, 18ama aningsiih adung, avom, ingiir, ithuwh, ynchiiva ichiichu ynthiing ae thohche nenbarungriir ing ikhar nenchehnii khaena, 19vokhehkho nemanghuw nakhe athiseh ing Khrista ningsiihchu manghuw tanuwka nenpirnii khaena, vokhehkho Thangnang ningna om vakhae isipchu nening nache ymmansip peehnii khaenache ki ing kathamsahva.
20Inuw ymbarungriir sungna nong atu ruwreng inuwzii ing, iniihsahna changmahka ymmandensah vakhae taklina athiseh ing inempak nong yntupeehcheh aning nache, 21ruwr-thiing nache vokhehkho Jesu Khrista ningnache ichi naemah ipha ing suwnthar aangkhengna alaar isa om ynsuwhrasiing. Amen
Currently Selected:
EPHESIA 3: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
