EPHESIA 5
5
Irengna Ipaar
1Nenuw chuve Thangnang siti vachuw khaka, ama vaang nengomnii ing itupeehruw. 2Khrista ing aning imansiihka vokhehkho ataksahchu inuw yngkhaenache ning-siihnii barim ipifhuw ing ynsuwhka vokhehkho ympideh vaang, nenuw ningsiih nache siruw. 3Changvakonchu nengkaarna ynthiing mee ae khaena matik ichavaang, naamak itu, ynthiingmah, ikaam, hava vakhae i nengkaarna aruming rapkho ipar omahrasii, 4changpang mahka yntirsuwhpak nong, ipang chong, isamah ermanteeh, hava vakhae i itumah ing sakna, havi changdenna Thangnang chu manpahruw. 5Havi nenuw ing nemanghuwsa amachuve, naamak itu, ynthiingmah nongtu changmahka ikaam (ichii chuve lae ruthaksii aning) mee achuwti ingkho Khrista re Thangnang lipah nache aphafhuw sup om omahnii.
6Achuwti ingkho nenuwchu yntangamah chongla ing imanchaemah rasii; akhaechuve ama inche akhae ynsuwhka chongriir ynjiimah sitiae taklina Thangnang barungsii thengna. 7Chukhaenache enuw ae thoh nenuw savuwchu phahak mahruw; 8Ajaen chembe nenuw ynthimna ongvachuw, atiive nenuw Aafhuw ningnache ireng meechu sachuw. Chutahnache ireng mee vaang ringruw, 9isapak, yndentahna ipir amanche ichum hava vakhae i ireng inche ahenreen aanlava. 10Aafhuw apennii nongchu ynchiiva ichiichu tamnuwna siruw. 11Amanche aanla omah ynthim nong thohkhe yntanga tuhakmahruw, ama changdenna nemiraarchu ireng tingche henbasuwruw. 12Akhaechuve ynruwh ing entu enri nongchu iriir ening ynjakna. 13Changvakonchu ahe-mandang aangkhengchu ireng inche ahemandangva, amanche ahemandang nong vakhaechu ireng chuva. 14Ama khaenache jinge ariirsa,
“Ijaar nang ynterla;
vokhehkho ithii tanii hangiirla,
amanche Khrista ing nataklina aen vaata.”
15Chukhaenache nenuw ynsaangkhe iringpung tanuwna ynriimruw. Ynchiitanga ynghuwmah mee ae vaang ringmahruw changvakonchu ising mee ae vaang taruw. 16#Kol 4.5Apha mamaangmahruw, apha sakmah. 17Chukhaenache nenuw pangmahruw, Thangnang ing amandenchu ynchiiva ichii manghuwruw.
18Juw baruw mahruw, amane yngkuh ynnahnii omna; ama changdenna ynthiing laetha ing sipruw. 19#Kol 3.16,17Nenuw yngkheh yngkheh ympahnii la ing, ynthiing la ing vokhehkho iseeng la inche ichong peehruw; nenbarungriir iruwh ing ympahnii la re ynthiing la ing Aafhuw ningtingche hemanpahruw. 20Aafhuw Jesu Khrista ruming nache aangkhenglaang khaena apa Thangnang ningtingche apha om bakhaena hemanpahruw.
Eengkuw Sungna Ipaarnii
21Khrista chu ijanuwna nenuw yngkheh ing yngkheh derna ongruw. 22#Kol 3.18; 1 Pit 3.1Rumee ae, Thangnang derna isi-vaang, nenfhuwsar ae dernache siruw. 23Khrista ingkho ruwrthiing taklina arusae ynsuwh vaange, fhuwsar ingkho rumee taklinache arusaeva; vokhehkho ahakchaang inche ruwrthiing ikarpeehchu ynsuwhsa. 24Chukhaenache ruwrthiing ing Khrista derna omvaange, rumee chaap aengkho nong aangkhengna enfhuwsar derna ongva chiipae.
25 #
Kol 3.19; 1 Pit 3.7 Fhuwsar ae, Khrista ingkho ruwr-thiingchu aning mansiihka aringkum apeeh vaange, nenuw vakhae ingkho nenrumee aechu nening mansiihva nenchiiva. 26Khrista ing atu havi aruwrthiingchu achongsae inche, chii inche chaam naka amanthiing aanuwnache Thangnang ningting apeehnii khaenache, 27isapak ing, iseeng vokhehkho ibuwrmahdeh ing, buw areenmahdeh changmahka imaang omahdeh ing ruwrthiingchu ataksahrap ing ipeehnii khaenava. 28Fhuwsar chaap aengkho enghak-chaang sahchu ening emansiih vaang, enrumee ae chukho ening mansiihva chiipae. Arumee aning amansiih mee chuve ataksah aning amansiih sahva. 29Achuw ingkho ahakchaangchu batirmah, ama chang-denna ahakchaangchu iruwpak ing ajuhsahnah; amavaange Khrista ingkho aruwrthiingchu rukuum atupeehnah. 30Chukhaenache inuw vakhae i Khrista hakchaang thoh yngkheh vamuw. 31Ynziih ing ariir chuve, “Havi khaene pasar inche ampa re amnuw bathen naka, arumee thohche yngkhehpang ing omvaatae, amanche ynniimehchu yngkhehpang ing hungomvaatae.” 32Havi ithuwhpak tanii iruwpak chongsaeva vokhehkho havi Khrista ruwrthiing thoh ruw ingki ing ichongping. 33Changvakonchu neningna kariirnah, fhuwsar vakhae ing arumeechu ataksah aning amansiih vaang, aning mansiih rasii amanche rumee vakhae inchenkho afhuwsarchu ijarasiing.
Currently Selected:
EPHESIA 5: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
