EPHESIA 2
2
Thangnang tanii Iringnii Ringkum
1 #
Kol 2.13
Isivasahna nenuw chongriir ynjiimah vokhehkho isiicher inche laethana ithii vasah vachuw. 2laaruw paam mee aeng ensinii minvaen aafhuw ruwreng ing, chongriir ynjiimah sitiae ningnache ataraensiim nong atu vaange nenuw isichuw. 3Inuw vakhae ikho hak-chaang vokhehkho barungriir ing aadik nache nong tumuka ajaenche ipaarmuw, vokhehkho reentaang mee aeng ipaar ae thohche aanghak ing Thangnang barung siknii siti ynsuwh vasah vamuw.
4Changvakonchu Thangnang in-chembe, ningsiihna savangak vakhaka, Aafhuw inche inuwchu athiseh ing aning ymmansiihpa.
5Chukhaenache isii icher ing ynthik raenche, inuwchu Khrista thohche atungsiih ajaar inche ymmanringpa. 6Khrista aningsiih ichen naemah lerchiichu hungvivachii suwnthar suwnthar nache amandangnii khaena, 7Thangnang ing Khrista thohche imanring hakka, thangbaen aphamsiirna inuwchu Jesu thohche ymmangong hakpa. 8Akhaechuve nenthacha ajaar inche atungsiih ing yngkarva; havi nenuw nening tanii mahva, Thangnang kikthuur chuva; 9chukhaenache achuw ingkho yndingniimah rasii, nongtu ing mahva. 10Thangnang ing amaensana asir vasah isa nongtu nache isinii khaenache, Jesu ningna ynseem vasah Khrista kikseemchu vachuw.
Khrista ningna Yngkhehpangnii
11Nenuw yndenruw, ajaenche hakchaangna reentaang mee ynsuwh chuwka, kik ing ynseem vinchiip mee ita aeka enriir, changvakonchu vinchiipmah nenuw chuve 12changlaenche nenuw Khrista tanii asikchuw. Isrel lipah sitiae tanii asikvachuw vokhehkho chongngiir inuwzii ing mee lipah siti ynsuwh chuwka ningmanden omah vokhehkho laaruw paamna Thangnang ynvaemah mee ynsuwhchuw. 13Changvakonchu atiive Jesu Khrista ningna yndah ing ajae ongchuw nenuwchu Khrista sii inche ymmaneengpa. 14Aafhuw chuve inuw vakhae idae phanii chuva, asae ynniimeh isuwhchu yngkhehpang basuwka arik chim-bangna laedenpeenchu abakhiipa. 15#Kol 2.14Thangnang inche hakchaang taklina asae ynniimeh isuwhchu ithar mee yngkhehpang ing manguurnii khaena aajeehniichu khros na thehka idae lamchu aseempa. 16#Kol 1.20Khrista ing khros na ithii inche ynniimehchu yngkhehpangnii khaena aajeehniichu amamaangpa; amanche khros ajaar inche yngkhehpang basuwka laaruw mee vakhaechu Thangnang ting ahenbaripa. 17Chutahnache Khrista ing juwngka yndah ing ong neningna chenkho, ynneengna ong neningna chenkho, idae isa chongchu amanthangpa. 18Havi Khrista ajaar nache Jehudi vokhehkho reentaang mee ae, inuw vakhae inche laetha yngkhehpang ing apa ningnache ihuungchu ynchehva.
19Chukhaenache nenuw reentaang mee ae, marpah mee vokhehkho, lamkhii mee ymsuwhmah sachuw, atii chembe nenuw ynthiing aethoh Thangnang eengkuwchu ynsuwh sachuw. 20Jesu Khrista inche athur-fhuwrungchu ynsuwhka, nenuw inche chongthang ae vokhehkho jaephar ae eenphambur taklinache ingiirchu ynsuwhsachuw. 21Aafhuw inche eenphamburchu manchumhakka vokhehkho Thangnang ynthiing een aansuwhnii khaenache amangiirpa. 22Aafhuw ningnache nenuw chukho laetha ajaarna Thangnang ongnii ynsuwhnii khaena ynseemhakpa.
Currently Selected:
EPHESIA 2: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
