KOLOSIA 3
3
1Khrista thoh hangringhak vasahchuw vakhaka Thangnang tachangna Khrista ongnii chungtaniichu jongruw. 2Chungtanii khaenache nenbarungriir piruw, thangtanii laaruw paam khaenache pimahruw. 3Akhae-chuve atii nenringkum i Khrista thoh Thangnang ningna ynthuurka omna. 4Chukhaenache inuw vakhae ynringkumchu Aafhuw Khrista ing ajungindang raenche, nenuw vakhae chukho amathoh ynruwhak ing maepah ing yndangvanenta.
Baruw Ringkum re Ithar Ringkum
5Chukhaenache nentaklina om laaruw paam barungriir chaapkha bathen chirruw; amachuve ichuwhmah nong, ynthiingmah, hakchaang ing aadik isamah amanche lae ruthaksii irum barungriir hava vakhae iva. 6Hava vakhae khaene Thangnang barung sikniichu thengvaata. 7Apha vokhehna chembe hava vakhae i neningna omka adernache isichuw. 8Changvakonchu atiive hava vakhae i bathen chirruw: amachuve, barung isii, thirfhuwr, yngensiimah, sehmaner om vokhehkho ichong fhuwmah ichong hava vakhae i neningna omahrasii. 9#Eph 4.22Yngkheh ing yngkheh taklina isamah chong chongmahruw, akhaechuve ajaennii baruw nong chaapkha nenlenchir vasahva, 10#Eph 4.24atii Eeseem Aafhuw chu nemanghuw khaena ithar mee ynsuwh sachuw. 11Atiive aden ing Grik naemahnii, Jehudi naemahnii, vinchiip aere vinchiipmah naemahnii, Reentaang mee vokhehkho Saithian mee, suwh re suwhmah mee tiimahnii, changvakonchu Khrista chuve aangkheng khaena rutumva, amanche aningna aangkheng yngkhehpang vatah.
12 #
Eph 4.2
Atiive, ynthiing kaningsiih ae, Thangnang ing eeteer vasah mee vachuw khaka nentaklina meening manchuwhnii, rukuum tunii barungriir, ynjuursah, iduwr, ikhaangcheh, 13#Eph 4.32vokhehkho yngkheh re yngkheh ynchaar nuwna, Aafhuw ing yngkuhpeeh vaang nenuw yngkuhpeehruw. 14Hava vakhae chungne barungriir yngkhehpang ing amangomcheh vokhehkho afhuwpcheh ningsiih barungriirchu reenruw. 15Yngkhehpang ing omnii khaena nenuwchu yngeen vasah Khrista tanii idaechu nentaklina omlasii. Havi khaene manpahruw. 16#Eph 5.19,20Khrista chongsaechu nentaklina isa ing vokhehkho ynriimjor ing omsana ising iveer thoh ynruw ing yngkheh re yngkheh ynriirpeeh nuwna nen-barungriirna Thangnang ympahthoh ynruw ing ympahnii la, iseeng la vokhehkho ynthiing lachu tupohruw. 17Amanche nentu nenri aangkhengna, nong vakhang nakho, chong ing vakhang nakho, aangkhenglaangna apa Thangnang chu Jesu jaarna nenbarungriirna ympahthoh ynruw ing turuw.
Khristian Eengkuw Paarnii
18 #
Eph 5.22; 1 Pit 3.1 Rakhiinii vasah ae, Aafhuw ningna matik icha mee vaang ing nenfhuwsar ae derna ongruw. 19#Eph 5.25; 1 Pit 3.7Fhuwsar vakhae nenrumee aechu nening mansiihruw, amanche entaklina ipirtuh ing omahruw. 20#Eph 6.1Naepang ae, nenuw nempa chongriir manjiiruw, havi Aafhuw ing aadikchuva. 21#Eph 6.4Ampa ae, nensiti ae taklina barung siknii tumahruw, amachu inche enuw duhvaatae. 22#Eph 6.5-8Suwh ae, nenuw aangkhenglaangna nengafhuw ae chongchu manjiiruw, mee ing ymmunii khaena pangche nong tumahruw, changvakonchu Aafhuw nengajathoh ynruw ing nong turuw. 23Nenong nentu nache mee taklina kentuva ichii mandenru ing Aafhuw ningna kentuva taruw, 24Aafhuw ningtanii lerchii phava kenchiiva tanuwna rotharoh ing turuw; nentu nenri i Aafhuw Khrista anongchu nentuva. 25#Eph 6.9Ynraar nong atumee inche ynraar nongmenchu phavaata, amanche havi khaene adongchang omahnii.
Currently Selected:
KOLOSIA 3: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
