KOLOSIA 2
2
1Nenuw nengkhaena vokhehkho Lodesia na ong mee ae khaena amanche kichu ymmumahrideh ae khaena ipirpak ing nong katuchu kariirsahnah. 2Amachuve enuw vakhae ing embarungriirna thir isa iphanii amanche ningsiihna yngkhehpang ing engongnii ing vokhehkho Thang-nang tanii Khrista ningna om ithuwhpak chongchu emanghuwnii khaenava. 3Aafhuw ningna ising iveernii vokhehkho manghuwnii vaanchii lerchii aangkhenglaang omchirna. 4Chukhaenache achuw yngkheh ing nenuwchu batheem chong ing ymbaruwhcheh niimah khaena havi kariirva. 5Nengkaarna ki ongmah khang ningkho kalaetha chuve nenuw thohche ongna amanche Khrista ningna nenthacha icheep thoh ynruw ing yngkhehpang ing omchuw khaenakhe karotha rohna.
Khrista ningna Mapungpha Ringkum
6Chukhaenache nenuw ing Jesu Khrista chu Aafhuw va ichii ing nen-rivasah vaangkhe ama ing amanden nache siruw, 7Aafhuw ningna ithuwh ing arajung manpae nuwna, nenringkum aningna mangiir nuwna, vokhehkho kamanchuw vasahchuw vaangkhe hemanpir nuwna Aafhuw ympahnii nache sipruw.
8Khrista taniimahka changvakonchu laaruw paam ising iveer ing amanche purah chong vokhehkho yntangamah chong inche imanchae ae naka ynsuwrniimah aeng ynriimruw. 9Aafhuw aningna Thangnang tanii aangkheng mapungpha ing omna, 10vokhehkho aangkheng Aafhuw amanche ruwreng chungna ong aning nache nengong tahna mapungpha ringkumchu ympeehpa. 11Khrista ningna nengongtah nache vinchiip meechu ynsuwh vachuw, amachuve Khrista tanii vinchiip inge hakchaang ing aadik tanii imanlaenka, 12#Rom 6.4baptais nentutahna Khrista thoh ynruw ing yndimhak vachuw vokhehhko Khrista thoh nenthacha ajaar inche ithii amanring Thangnang ruwreng thoh ynruw ing hangring vachuw. 13#Eph 2.1-5Ajaen chenbe vinchiip turuchuw ing isii icher inche ithiivasah vachuw, changvakonchu Thangnang ing Khrista thohche ymmanringpa; inuw vakhae yntaklina isii icher om chaapchu aning ymmansiih tahnache, 14#Eph 2.15ynningna ichachehmah ynjeehnii ynjiih vajeer chonghakchu khros taklina jopi ing ynghenka Khrista ing ynripeehpa. 15Aacheh vokhehkho ruwreng chaap vakhaechu chehchirka entaklina khros ing maepah aphachu Aafhuw ing amandangpa.
16 #
Rom 14.1-6
Chukhaenache isahnii inniina, changmahka inii tha hangpaar, vokhehkho Deennii inii, hava vakhae khaene achuw tanga ingkho nentaklina vajeer itumah rasiing. 17Hava vakhae ive hungsuwh vachii nong aruthaksii vatah; changvakonchu atatak chuve Khrista va. 18Achuw tanga ingkho nenuwchu yntuurdehva nenchiiva, vaarmee aechu rumva nenchiiva, aman-che amumahna kamuva tanaka ynraar nache nenbarungriir mangamniimah rasii. 19#Eph 4.16Hangchii mee inge hakchaang aangkhenglaang aanjomnii arusae amanche aantuwnii ahangruungnii Thangnang chu bachuw mahnii.
Khrista thoh Ithiihak vokhehkho Hangringhak
20Khrista ningna laaruw paam ichamah vakhae thoh ithii vasah vachuw inche ynchii khaena laaruw paam mee vaang ipaarjaeh vachuw? Ynchii khaena vajeer chonghak derna omjaeh vachuw? 21“Amakha bachuw mahruw, manten mahruw, parmahruw, 22ichii chong ichuve laaruw paam barungriir ing aseem chong vatah, hava vakhae i maangchir vachii vatah.” 23Hava vakhae i achung paamphuw nachembe ising iveer vaang takonchu vaarmee rumnii khaena vatah amanche ichummah chongva; vokhehkho hava vakhae ichuve ikanii yntanga omah chuva.
Currently Selected:
KOLOSIA 2: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
