1 THESALONIA 4

1Achiniina, kauw kanae ae, nenuw ing ynsaangkhe paarva nenchiiva vokhehkho Thangnang chu ynsaangkhe manpensava nenchiiva ichiichu kening tanii manghuw chuwka nensinii vaangkhe, nenuw nema itaar ahenthinii sehseh khaena Aafhuw Jesu rumingna kenuw ing kenthamsahnahchuw. 2Aafhuw Jesu ajaarna siniiva nenchii kenriirpeeh chuwkha nemanghuwsa. 3Thangnang ing amanden chuve haviva, nenuw manthiingva nenchiiva vokhehkho naamak tumahva nenchiiva; 4nenuw vakhae ing nenrumeechu ynthiing ing vokhehkho ynjasah thoh ynruw ing irinii nemanghuwnii khaena, 5Thangnang chu amanghuwmah mee ae vaang, hakchaang ing aadik khaenamah rasiing; 6vokhehkho achuw tanga ingkho auw anae taklina havi khaene yngkuh siimah naka amanchaeniimah khaenava, kenuw ing neningna ajaenkhe kemik manveer ungka vokhehkho saarkhii kempeeh vaangkhe, aangkhenglaang havi khaene Ponti aapeeh chuve Aafhuw va. 7Thangnang ing ynthiingniimah khaena yngeen mahva, ynthiingnii khaenava. 8Chukhaenache achuw yngkheh ing havi arumah tahna mee aechu arumah changchii mahva changvakonchu neningna Thangnang ing ympeeh ynthiing laethachu arumahva.

9Changvakonchu unae aechu ning mansiihnii khaena ynziih ikanii omah; akhaechuve yngkheh re yngkheh ningsiih omnii khaenache Thangnang ing nenuwchu ymmanchuwpa; 10amanche atatak ing Mesidonia paam aangkhengna ong unae ae nening nemansiihchu thangsa. Changvakonchu apirnii sehseh khaenache kengathohsah nahreehchuw. 11Neningna mamaenna kenriir vasah vaangkhe isajaeh ing nenpaarnii khaena mandenruw, nentaksah nongchu nengadiksah ingkhe tusaruw; 12amana chembe nenuw ing thachamah mee ae mik barengna isajaeh ing sichehva nenta vokhehkho mee ningnache yndiimahdeh tanuw.

13Changvakonchu kauw kanae ae, mee reentaang ae eningmanden omah vaangkhe, nenbarungriirna ajaniimah ing ithii ae khaenache nemanghuwmah idiksamah ung. 14Akhaechuve Jesu ing thikka vokhehkho ihangringchu inuw ing thacha manuwve, ama vaangche Jesu ajaarna ithii ae chukho Thangnang ing Aafhuw thohche manring vaatae. 15#1 Kor 15.51,52Havi khaene Aafhuw chongsae ajaar ing keningna ajeer inuwzii ing neningnache kenriirva, amachuve, Aafhuw ijuwng ipha ing iring inuw inche ithii ae taklina maensamah manuw. 16Akhaechuve aphanache Aafhuw Jesu atakrap thangbaen tanii iruurthoh, aankaangseh vaarmee tanii iruurthoh vokhehkho Thangnang tumpeeh senruwr thoh ynruw ing jungtheng vaata, changlaenche Khrista chu thachaka ithii aenche maensa ing hangring vaatae; 17aanuwnache iring inuw inche, ithii tanii ihangring ae thohche minvaenna Aafhuw chu yntuwhnii khaena ruwrduh kaarting ijekihak vaata; amanache Aafhuw thohche apha om bakhaena onghakva taruw. 18Chukhaenache hava chong inge nenuw yngkheh yngkheh barungriir mangamniiruw.

Currently Selected:

1 THESALONIA 4: MOYO

Highlight

Copy

Compare