1 THESALONIA 5
5
Aafhuw Juwngvachii Aanii
1Changvakonchu kauw kanae ae, aanii vokhehkho kumtha khaenache neningna kajebaziih tahna ikanii omah. 2#Met 24.43; Luk 12.39; 2 Pit 3.10Akhaechuve Aafhuw aanii chuve jaenna lamruw itheng vaangkhe tavaata ichii isajaeh ing nemanghuwsa. 3Jinge ichii ing daejaehna vokhehkho isii ikha suwhmahsa ta ae naka enuw ing engongraenche, rupanuw ing asiti abaring phana ina abasen vaangkhe, ynghuw ynghamah imaangnii ijachaamchu entaklinache thengvaata. Changlaenche enuw ing itaen supcheh chehmahnii ae. 4Changvakonchu unae ae, lamruw ing itheng vaangkhe aaniichu nentaklina abukniimah ing ynthim nache ongmahruw. 5Nenuw nengkheng ireng vokhehkho siim siti chuvachuw. Inuw chuve jaenkho ynthim takho mahvamuw. 6Chukhaenache mee ae vaange jaarmah manuw; inuw hangsuw manuwka hahsataruw. 7Ijaar aenche jaenna jaarnae amanche juw ynruw mee aenche jaenna baruwnae. 8#Eph 6.13-17Changvakonchu inuw chuve siim mee ynsuwh vamuw khaka, thacha vokhehkho ningsiih barungphuchu niimanuwka vokhehkho ymmanden manlaenpeeh amachu khumsa manuwka ynriimsataruw. 9Thangnang ing abarung siknii khaena ingateer mahva, changvakonchu Aafhuw Jesu Khrista ajaar nache manlaenpeeh ymphanii khaena chenva. 10Inuw ing ringkhang manuwre changmahka thikkhang manuwre, Khrista thohche inuw ipaarhaknii khaenache ama ing ynthikpeehpa. 11Chukhaenache nenuw ing nentu vaange, yngkheh yngkheh rotha ynroh nuwna vokhehkho hung-ruungnii sehseh khaena ynseemruw.
Achinii Ynthohsah
12Unae ae, nengkaarna nong atuae vokhehkho Aafhuw rumingna yncheer ae amanche eechah mee aechu isajaeh ing nemanghuwnii khaena kenriirsahnah, 13amanche enongtu khaena iruwpak ing nening mansiih aeruw. Nenuw nenareerna idaejaeh ing ipaarpeehruw. 14Unae ae, kenuw ing kengathohsah nahchuw, thaachah mee aechu ichah aeruw, barungriir isuur mee aechu rotha imanrohpeehsa aeruw amanche isuur aechu ibompeeh aeruw vokhehkho aangkhenglaang nache ikhaangpeeh saruw. 15Achuw yngkheh ing yngkheh taklina ynraar nong atudoh tahna huw engaanriniimah ing sirruw, amanche anasiirna nentaksah vokhehkho mee aangkheng khaena isachu ynchiiva ichii jongruw. 16Apha vakhaena nenrotha manrohruw, 17ymperudeh inche thamruw, 18vokhehkho nentu nenri aangkhenglaang khaena heman-pahruw, havi Thangnang ing Jesu Khrista ningna nengkhaena amanden chuva.
19Ynthiing laethachu thehpak mahruw; 20Thangnang chongjeerchu ikaanii mahva ichii ing rimahruw. 21Nong aangkhenglaang ibuwrnuwna isachu bachuw therruw, 22amanche isamah chaapchu dahruw.
23Atii idae Thangnang inche nenuwchu imanthiingkiir rasiing; vokhehkho nenlaetha, nenthavae vokhehkho nenghakchaang aang-khengchu Aafhuw Jesu Khrista ing ajuwnglaenche nemiraar aomniimah ing icheer rasiing. 24Nenuwchu yngeen Aafhuw chuve thachafhuwva, ama ing itukho tuvaata.
25Unae ae, kengkhaena itham-peehruw.
26Ynthiing salaam thoh ynruw ing ymbariimruw.
27Aafhuw rumingna havana kachongthen i unae aangkheng ningna ipapeehnii khaena kamansirsah-nachuw.
28Aafhuw Jesu Khrista tungsiih inche nenuwchu eenruwfhuw ynsuwhrasiing.
Currently Selected:
1 THESALONIA 5: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
