Matie 23

Muafitii Farisi ŋa do woo kɔ inɛ ŋa si wooda ŋa

(Cɔ Maaku 12:38-39; Luku 11:43-46; 20:45-46)

1Ŋɔi Jesu í sɔ̃ zamaau do mɔcɔɛ ŋau, 2í ni, woo kɔ inɛ ŋa si wooda ŋau do Farisi ŋaui à sãsi agbɛi Moizi à waa sisi woodaɛ. 3Na nŋu, i ya gbɔ ide nŋa nɔ i ce mii iyi à waa sɔ̃ ŋɛ fei. Amma i maà ya ce kookoosu bɛi à waa ce, domi ide iyi à ya fɔ a ci ya ceò icɛ. 4À ya dĩ aso ku wo a maa kãa inɛ ŋa, amma aŋa taka nŋa a ci ya jɛsi a luu baa do amaawɔ akã. 5Kookoosu nŋa iyi à waa ce fei à waa cooi ku ba a yɛ ŋaò. Bɛɛbɛi à ya dĩ ama tia#23:5 ama tia Ama tia iyi à ya dĩ, isɛɛde ŋa iyi à wa si tiai idei Ilaaɔ̃i à ya kɔ si, nɔ a dũu si ikpo nŋa walakɔ si awɔ. iyi í la í re ti kpaasi ŋa nɔ a dasi ibɔ jaba nŋa ikũ sisɔ iyi í re ti kpaasi ŋa si itĩ do ilɛ. 6Nɔ a ci ya bi kaa inya sinte bi ku jɛ jingau ŋa do kitãi inɛ ngbo ŋa ile bii à ya ce kutɔtɔɔ ŋa. 7À ya bi inɛ ŋa a maa ce aŋa fɔɔ si bantuma do bɛɛrɛ nɔ a maa kpe ŋa lafɛ̃ɛ. 8Amma iŋɛ, i maà ya jɔ̀ a kpe ŋɛ lafɛ̃ɛ, domi iŋɛ fei saa ŋai, nɔ Lafɛ̃ɛ akã lege legei ì nɛ ŋa. 9Nɔ i maà kpe inɛ kãma Baaba si ilɛ ihɛ̃ ŋa, domi inɛ akãi í jɛ Baa nŋɛ. Nŋui í wa lele. 10Nɔ i maà ya jɔ̀ a kpe ŋɛ woo mà ŋa domi woo mà akã lege legei ì nɛ ŋa, nŋui í jɛ inɛ iyi Ilaaɔ̃ í cicau. 11Inɛ iyi í jɛ inɛ ngbo nŋɛ nŋui í nɛ ku jɛ woo ce icɛ nŋɛ. 12Inɛ iyi í so araɛ lele, aa kayeɛi, inɛ mɔ iyi í kaye araɛ aa soo lelei.

Jesu í yɛ taalei Farisi ŋa do woo kɔ inɛ ŋa si wooda ŋa na muafiti nŋa

(Cɔ Maaku 12:40; Luku 11:39-52; 20:45-47)

13Jesu í ni, iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ ì waa cĩmboa inɛ ŋa kpãai bommai Ilaaɔ̃ ŋa. Iŋɛ taka nŋɛ, i kù jɛsi i lɔ ŋa, nɔ inɛ ŋa iyi à bi ku lɔ, ì waa ganji ŋa ŋa. [ 14Iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ ì ya maa ce kutɔɔ sisɔ ŋa ku ba inɛ ŋa a ni iŋɛu inɛ jiida ŋai. Nɔ wee mii iyi jaaɔ̃ ŋa à nɛ fei ì ya gbaa ŋai. Na ŋɔi í jɔ̀ ijuukpã nŋɛ á la ku re.]

15Iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ ì waa dabii bii fei ŋa, ì waa nɛ si tenku do si ilɛ fei ì waa dɛdɛ baa inɛ ŋa iyi aa ba i kpaasi idɔ nŋa ŋa. Nɔ bii ì ba ŋa ì ya sinda lafɛ̃ɛ ŋai ku jɛ inɛ iyi à nɛ a dasiɛ ina iyi ci ya ku ku re baa iŋɛ taka nŋɛ isɛ gbeeji.

16Iŋɛ fɛɛju ŋai iyi ì waa mu goloi fɛɛju ŋa, aa yɛ ijuukpã ŋa. Ì ya maa ni ŋa, bii inɛ í ce kugbasi do kpasɛ̃i Ilaaɔ̃ kù jɛ taale baa bii kù kɔ̃ɔ. Amma bii í ce kugbasi do wurai kpasɛ̃u, tilasii ku kɔ̃ ideu. 17Iŋɛ fɛɛju nnyɛi ŋai. Yoomai í la í re. Wurau? Mà kpasɛ̃ iyi í jɔ̀ wurau í jɛ ti Ilaaɔ̃. 18Nɔ ì waa ni má ŋa, bii inɛ í ce kugbasi do bi kuwee kù jɛ taale baa bii kù kɔ̃ɔ, amma bii í ce kugbasi do iŋai kuweeu, tilasii ku kɔ̃ ideu. 19Iŋɛ fɛɛju ŋai. Yoomai í la í re. Iŋai kuweeu? Mà bi kuwee iyi í jɔ̀ iŋai kuweeu í jɛ ti Ilaaɔ̃. 20Na nŋu, inɛ iyi í ce kugbasi do bi kuwee, hee do mii iyi wa lesi feii í ceò kugbasiu. 21Inɛ mɔ iyi í ce kugbasi do kpasɛ̃i Ilaaɔ̃, hee do Ilaaɔ̃ iyi í wa bɛ feii í ceò kugbasiu. 22Inɛ mɔ iyi í nɔ í ce kugbasi do lele, hee do batai bommai Ilaaɔ̃ do Ilaaɔ̃ takaɛ iyi wa buba bɛi í ceò kugbasiu.

23Iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ ì waa na Ilaaɔ̃ akã si mɛɛwa fei si nyaui ayɛ ŋa, amma ì waa gbɛjɛ mii iyi í la í re si wooda ŋa. Mii ŋaui í jɛ idɔɔbii Ilaaɔ̃ ku ce do araare ku nyisi do ilu naanɛ ku jɛ. Nŋu ŋau bɛi í jɔ i ce ŋa, nɔ i maà gbɛjɛ iyi í gbe ŋau. 24Iŋɛ fɛɛju ŋai iyi ì waa mu goloi fɛɛju ŋa. Ì waa coo inyi nŋɛ na kokoo ŋa nɔ ì bɛi ì waa miò kpookpo ŋa.

25Iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ anyii kɔɔfu do ti jɛɛ ŋai ì ya wiɛ ŋa, amma hai si binɛ laalɔ do ilei ì baò mii ndii inɔɛ ŋa. 26Awɔ Farisi fɛɛju, wiɛ inɔi jɛɛ titã, anyiu mɔ ku bɛi ku má.

27Iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ ì yɛ ŋai bɛi balɛ iyi à jɔsi mii fũfũ ku ba anyiɛ ku sĩa, amma inɔɛ kũkũi amanɛ do konkombii wa kɔ̃ si. 28Bɛɛbɛ mɔi iŋɛ taka nŋɛ, bii inɛ ŋa à waa yɛ ŋɛ, iŋɛ inɛ jiida ŋai, amma si idɔ nŋɛ muafiti do laalɔi wa kɔ̃.

29Iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ ì waa teese balɛi walii ŋau, nɔ ì waa ce booda si ti inɛ dee dee ŋau mɔ má ŋa. 30Nɔ ì waa ni ŋa, bii í jɛ si waatii bala nwa ŋai à dede wo a kaa ka dasi baa nwa si walii ŋau ku kpa. 31Iŋɛ taka nŋɛ ì waa nyisi iyi iŋɛ tɔkui inɛ ŋa iyi à kpa walii ŋaui. 32To, i hanya i tambɔ laalɔ iyi bala nŋɛ ŋa à sintiu. 33Iŋɛ inɛ buu ŋai bɛi njo wukuku. I kù nɛ bɛi aa ce i saa ina iyi ci ya kuu ŋa. 34Na nŋu, i de itĩ i gbɔ, an bɛ nŋɛ walii ŋa wa do ilu bisi ŋa do woo mà wooda ŋa. Si inɔ nŋa aa kpa gɔgɔ ŋa, nɔ i kpakpa gɔgɔ ŋa mɔ si jĩi ku gaau, gɔgɔ ŋa mɔ nɔ i tɛ nŋa kpɔtɔɔ ile bii ì ya ce kutɔtɔɔ nŋɛ ŋa, nɔ i maa kpã ŋa iju si ilu do ilu ŋa. 35Na nŋu, ijuukpãi woo kpa inɛ dee dee ŋau fei á jɛ si iri nŋɛ. Abɛlii í jɛ inɛ dee dee sinte iyi ì kpa ŋa. Zakari amai Baraki iyi ì kpa si afei kpasɛ̃i Ilaaɔ̃ do bi kuweeu ŋa, nŋui í jɛ inɛi ankãanyi iyi ì kpa ŋa. Ikui inɛ dee dee ŋau bɛ fei, hai Abɛli hee ku koo si Zakari, iŋɛi aa yɛ ijuukpãɛ ŋa. 36Ntɔ ntɔ, ǹ wa n sɔ̃ ŋɛi, ijuukpãi mii ŋau bɛ fei si inɛi nnyi ŋau ihɛ̃i á baa ku jɛ si.

Jesu do Zeruzalɛmu

(Cɔ Luku 13:34-35)

37Jesu í ni, iŋɛ inɛi Zeruzalɛmu ŋa, iŋɛi ì ya kpa walii ŋa nɔ i ta amaabɛi Ilaaɔ̃ ŋa mɔ kuta i kpa ŋa ŋa. Isɛ fɛloi ǹ ya n bi n tɔtɔɔ ŋɛ si abɛm bɛi ajɛɛ í ya tɔtɔɔ amaɛ ŋa si ikpaɛ, amma i kù jɛ ŋa. 38Wee nsɛi Ilaaɔ̃ á fũ nŋɛ kpasɛ̃ nŋɛ si awɔ. 39Ntɔ ntɔ ǹ wa n sɔ̃ ŋɛi, hai nsɛi i kaa yɛm má ŋa í gbe hee ajɔ iyi aa ni ŋa, Ilaaɔ̃ ku weea inɛ iyi wa naa do irii Lafɛ̃ɛ.#23:39 Cɔ Iri ku kɔ̃ 118:26.

Currently Selected:

Matie 23: MKL

Highlight

Compare

Copy