Matie 24

Jesu wa fɔ idei kpasɛ̃i Ilaaɔ̃ ku lɛgɛ

(Cɔ Maaku 13:1-2; Luku 21:5-6)

1Ŋɔi Jesu í fita hai kpasɛ̃i Ilaaɔ̃. Iyi wa nɛ, ŋɔi mɔcɔɛ ŋa à koo à baa à nyisiɛ bɛi à ma kpasɛ̃i Ilaaɔ̃u do ileɛ ŋa sãa sãa. 2Ŋɔi í sɔ̃ ŋa í ni, ì waa yɛ mii ŋau bɛ fei ŋa ya. Ntɔ ntɔ ǹ wa n sɔ̃ ŋɛi, kuta baa akã kaa na ku maa lesi njɛ bɛ má, aa kɛkɛɛ mbɛ fei.

Wahala iyi á naa si waatii ankãanyi

(Cɔ Maaku 13:3-13; Luku 21:7-19)

3Jesu í koo í buba geetei Olivie. Ŋɔi mɔcɔɛ ŋa à bɔ bi tɛɛ aŋa duusɔ̃ɔ à beeɛ à ni, sɔ̃ wa waati iyi mii nɔu bɛ á ce. Nyinda yoomai á nyisi kunyiɛ wa do waatii ankãanyi.

4Nɔ Jesu í jɛ nŋa í ni, i ce laakai ŋa inɛ gɔ ku maà na ku dĩ iju nŋɛ, 5domi inɛ ŋa iyi aa na a maa naa akã akã a maa ni aŋai à jɛ inɛ iyi Ilaaɔ̃ í cicau aa kpɔ. Aa dĩ ijui inɛ nkpɔ. 6Nɔ aa maa gbɔ ibai igũ amɛɛ amɛɛ do jĩijĩ ŋa. I maà jɔ̀ ku da zigi nŋɛ, domi í gbe mii ŋau bɛ fei ku ce. Amma kù nɔ kù jɛ iri ku kpai andunyau bɛ titã. 7Dimi gɔ ŋa aa ya na a maa ja do dimi mmu ŋa. Ilaalu gɔ ŋa mɔ aa maa ja do ilaalu mmu ŋa. Nɔ ilɛ á yaya si ilu gɔ ŋa, nɔ ari á ce. 8Inɛ nŋu bɛ fei á yɛi bɛi ara kuro sintei bãasĩ ku bɛi ku bí.

9Si waati nŋu, aa dasi ŋɛ si awɔi inɛ ŋa a kpã ŋɛ iju, aa kpa ŋɛ mɔm. Dimi fei á cé ŋɛi na irim. 10Waati bɛɛbɛ, inɛ nkpɔ á nyiò anyi, aa maa zamba njɛ nɔ a cé njɛ. 11Walii ilu ibo nkpɔ ŋai aa na a naa a maa wa inyii itĩi inɛ nkpɔ. 12Laalɔ ku ce á kɔ̃ɔsi hee ku jɔ̀ inɛ nkpɔ kaa nɛ kubii kpaasi ŋa má. 13Amma inɛ iyi í temua hee kɔɔɛ á ba faaba. 14Aa waazo laabaau jiidai bommai Ilaaɔ̃u si andunya fei ku ba dimi fei ku gbɔɔ, andunya ku bɛi ku kpa iri.

Faajii mii laalɔ iyi wa riisi kpasɛ̃i Ilaaɔ̃

(Cɔ Maaku 13:14-23; Luku 21:20-24)

15Jesu í ni, walii Daniɛli í fɔ idei mii laalɔ gɔ wo iyi á riisi kpasɛ̃i Ilaaɔ̃.#24:15 Cɔ Daniɛli 9:27. Nŋui aa yɛ ŋa í wa si inya iyi í jɛ ti Ilaaɔ̃. Inɛ iyi wa cio idei mii laalɔu, ku ce laakai ku gbɔɔ sãa sãa. 16Waati bɛɛbɛ inɛ ŋa iyi à wa ilɛi Zudee a sa a bɔ iri kuta ŋa. 17Nɔ inɛ iyi í wa antaii ile sikifa, bii í kita ilɛ ku ba ku sa ku maà bɔ ngɔgɔ ku so inɔ ileɛ. 18Nɔ inɛ mɔ iyi í wa iko ku maà nyi kpasɛ̃ koo so kumbooɛ má. 19Waati bɛɛbɛ wahalai bãasĩ ŋa do ayawo ŋa á caa. 20I ce kutɔɔ ŋa ku ba waatii kusau ku maà na ku jɛ sukui tũtũ#24:20 sukui tũtũ Sukui tũtũ nŋa sukui atɛi, nɔ bii gɔ ku bɔ í ya gaabu. walakɔ ajɔi kusĩmi. 21Ntɔ ntɔ, waati bɛɛbɛ wahala nla nlai á naa iyi a kù yɛ dimiɛ hai sintei andunya hee do nnyi, nɔ a kaa ka yɛ dimiɛ má hee do ajɔ fei. 22Bii Ilaaɔ̃ kù jilɛ si nŋu ku kaye kukpɔi ajɔu wo inɛ gɔ kaa wɛɛ. Amma í kayeɛi na irii inɛ ŋa iyi í cicau.

23Waati bɛɛbɛ, bii inɛ gɔ í sɔ̃ ŋɛ í ni, i cɔ inɛ iyi Ilaaɔ̃ í cicau í wa ihɛ̃, walakɔ inɛ mmu gɔ ku ni, í wa ihɔ̃, i maà dasi lafɛ̃ɛ naanɛ ŋa. 24Inɛ gɔ ŋa aa na a naa akã akã a maa ni aŋai à jɛ inɛ iyi Ilaaɔ̃ í cicau walakɔ a ni aŋai à jɛ walii ŋa amma iboi. Aa maa ce dobu dobu do maamaake ŋa ku ba a dĩ hee do ijui inɛ ŋa iyi Ilaaɔ̃ í cicau bii aa yɔkɔ. 25Na ŋɔi í jɔ̀ ǹ wa n sɔ̃ ŋɛ fei ndɛɛ do njuma.

26Na nŋu, bii à na à sɔ̃ ŋɛ à ni, inɛ iyi Ilaaɔ̃ í cicau í wa gbaa, i maà koo. Walakɔ bii à sɔ̃ ŋɛ à ni, wa manji ilaawa, i maà dasi naanɛ. 27Si bɛi kuŋɔi ijĩ í ya má inya hai nunui daakɔ hee ku bɔ nunui alɛ anu akã, bɛɛbɛ mɔi kubaai amu Amai Amanɛ á yɛ. 28Tengi bii iku í wa, bɛi yembeeku ŋa à ya tɔtɔɔ.

Kubaai Amai Amanɛ

(Cɔ Maaku 13:24-27; Luku 21:25-28)

29Jesu í ni, si anyii wahalau gbakã, inunu á kuku inya, nɔ cukpa mɔ kaa má inya má, leleaɔ̃ ŋa aa cuku wa hai lele nɔ gbugbãi lele ŋa a yaya. 30Waati bɛɛbɛ nyindai amu Amai Amanɛ á fita lelei Aɔ̃. Nɔ dimii andunya ŋa fei aa le awɔ si iri a maa kpataò. Aa yɛ amu Amai Amanɛ ǹ wa n naa si kudũi ijĩ do gbugbã nla nla do amboe. 31Kãakãakĩ nla nla á dɔ̃ anu nɔ n bɛ amalekam ŋa wa si andunya gonta mɛɛu. Aŋai aa tɔtɔɔ inɛ ŋa iyi ǹ cica si andunyau fei.

Mii iyi jĩi ndii figi wa kɔ inɛ ŋa si

(Cɔ Maaku 13:28-31; Luku 21:29-33)

32Jesu í ni, i cɔ mii iyi jĩi ndii figi wa kɔ ŋɛ si ŋa. Bii ì na ì yɛ amaawɔɛ ŋa à sinti ku wu wua kpɔtɔɔ, ì ya mà ŋa iyi atɛ í maai wa mbɛ. 33Bɛɛbɛ mɔi, bii ì yɛ mii ŋau bɛ fei wa ce, i mà ŋa iyi kubaai amu Amai Amanɛ kaa kpɛ má, ajɔu í maai wa mɔm. 34Ntɔ ntɔ ǹ wa n sɔ̃ ŋɛi, kù jɛ inɛi nsɛi ŋa feii aa ku ideu ku bɛi ku ce. 35Lele do ilɛ fei á na ku tã, amma idem ŋa a kaa tã pai.

Ilaaɔ̃ nŋu akãi í mà ajɔu

(Cɔ Maaku 13:32-37; Luku 17:26-30, 34-36)

36Jesu í sɔ̃ ŋa má í ni, inɛ kãma kù mà waatiu hee má jɛ ajɔ iyi mii ŋau aa ce, baa amaleka ŋa iyi à wa lele, baa amu Amau, í gbe Ilaaɔ̃ Baaba nŋu akã. 37Si bɛi í ce si waatii Noweeu, bɛɛbɛ mɔi á ce si waati iyi amu Amai Amanɛ an nyi wa. 38Hee kukɔ̃i inyi nlau ku maa naa, inɛ ŋa à waa jɛ, à waa mɔ, à waa ce abɔdɔ̃ ŋa, à waa mua ama nŋa ŋa mɔkɔ hee í koo í to si ajɔ iyi Nowee í lɔ akɔi inyiu. 39A kù waa lasabu do wahala dimi bɛɛbɛ hee í to kukɔ̃i inyi nlau í jɛ ŋa fei. Bɛɛbɛ mɔi á jɛ si waati iyi amu Amai Amanɛ an nyi wa. 40Si waati nŋu, amanɛ minji á wa iko, aa so inɛ akã nɔ a jɔ̀ inɛ akã. 41Inaabo minji á maa lɔlɔ, aa so inɛ akã a jɔ̀ inɛ akã. 42Na nŋu, i wɛɛò sɔɔlu ŋa, domi i kù mà ajɔ iyi Lafɛ̃ɛ nŋɛ á nyi wa. 43I gbɔ iyi ihɛ̃ má ŋa. Bii ilu kpasɛ̃ í mà idũ zaka bɛi ile á naa, á dede ku wɔ njoo, kaa jɔ̀ ile ku lɛgɛ gamboɛ. 44Na nŋu, iŋɛ mɔ, i wɛɛò sɔɔlu ŋa, domi amu Amai Amanɛ an nyi wa si waati iyi i kù waa tamaa ŋa.

Amaacɛ jiida do amaacɛ laalɔ

(Cɔ Luku 12:41-48)

45Í sɔ̃ ŋa má í ni, yooi í jɛ amaacɛ ilu naanɛ iyi í nɛ laakai. Lafɛ̃ɛi í jɛ inɛ iyi ilu kpasɛ̃ gɔ í kpe nɔ í so amaacɛ kpaasiɛ ŋa í daa si awɔ ku maa cɔ ŋa ku na ŋa ijɛ si bɛi í jɔ. 46Inɔ didɔ̃i á jɛ ti amaacɛu bii lafɛ̃ɛɛ í bàa í na í báa wa ce bɛɛbɛ. 47Ntɔ ntɔ, lafɛ̃ɛu á daa amaacɛu mii ndɛɛ fei si awɔ. 48Amma bii í jɛ amaacɛ laalɔi, á lasabui ku ni, lafɛ̃ɛm kaa baa ńya má, 49nɔ ku dede ku maa cã amaacɛ kpaasiɛ ŋa nɔ ku maa jɛ ku maa mɔ do woo mɔ atɛ̃ ŋa ajɔ. 50Bɛɛbɛi, lafɛ̃ɛu á na ku baa si ajɔ iyi kù waa cɔ kpãaɛ, do si waati iyi kù waa tamaa, 51nɔ á kpãa iju jiida jiida, nɔ nŋu do ilu muafiti ŋau fei wahala nŋa á jɛ akã. Tengi bɛi á le awɔ si iri ku maa kpataò.

Currently Selected:

Matie 24: MKL

Highlight

Compare

Copy