Matie 20

Mɔndai ilu kpasɛ̃ do gaanɔɔmaɛ ŋa

1Jesu í kpa nŋa mɔndau ihɛ̃ í ni, idei bommai Ilaaɔ̃ í jɔ idei ilu kpasɛ̃ gɔ iyi í fita daadaakɔ wa dɛdɛ amaacɛ ŋa ku bɔò ŋa ikoɛ. 2Waati iyi í ba amaacɛ ŋau aŋaò ŋa à fɔ à gbɔa njɛ ku sã nŋa si bɛi à ya sãa woo ce icɛ si ajɔ akã, nɔ í ni a bɔ ikoi nŋu a koo a ce icɛ. Nɔ à koo. 3Nɔ zakai isɔ mɛɛsã í fita má í koo í ba inɛ gɔ ŋa à waa buba si tafa a kù waa ce nkãma. 4Nɔ í sɔ̃ ŋa í ni, iŋɛ mɔ, i bɔ ikom i koo i ce icɛ ŋa. An sã nŋɛ si bɛi í jɔ. 5Ŋɔi à koo. Ŋɔi ilu kpasɛ̃u í fita má zakai dasã, do alɛ zakai inunu ku sinda, nɔ ide dimi akãui í ya fɔ. 6Alɛ zakai isɔ miiu, ŋɔi í fita nɔ í yɛ inɛ gɔ ŋa má à waa buba. Ŋɔi í bee ŋa í ni, na mii í ce ì waa buba ihɛ̃ ngbɛ ngbɛ hai daakɔ ŋa. 7Ŋɔi à jɛaa à ni, si na iyi í jɔ̀ inɛ kãma kù dasi wa icɛi. Ŋɔi í ni, to, iŋɛ mɔ i bɔ ikom i koo i ce icɛ ŋa. 8Iyi í to alɛ zakai kulɔi inunu, ŋɔi ilu kpasɛ̃u í kpe inɛ ngboi amaacɛɛ ŋau í sɔ̃ɔ í ni, kpe gaanɔɔma ŋau wa, sã nŋa fia nŋa, sinti hai bi inɛi ankãanyi ŋau hee ku koo si inɛ sinte ŋau. 9Inɛ ŋa iyi à sinti icɛ alɛ zakai isɔ miiu ŋau à naa à gba fiai icɛi ajɔ akã. 10Amma iyi à to si inɛ sinte ŋau à tamaa bɛi ti aŋa á re bɛɛbɛi. Amma fiai icɛi ajɔ akãi à sãa aŋa mɔ. 11Iyi à yɛ fiau bɛɛbɛ ŋɔi à wasi ku gbagba si ilu kpasɛ̃u. 12À waa ni, inɛ ŋa iyi à naa ankãanyiu isɔ akãi à ce icɛ nɔ ì sã nŋa bɛi awa iyi à ce icɛ si inya gbãa hai daakɔ hee à gbɛɛji. 13Ŋɔi ilu kpasɛ̃u í sɔ̃ inɛ akã nŋa í ni, kpaasim, n kù takiiɛ, domi ì jɛsi i gba fiai icɛi ajɔ akã, mà kù jɛ bɛɛbɛ. 14To, gba fiaɛ i nɛ. Ǹ bi n sãa inɛi ankãanyiu ihɛ̃ bɛi awɔ mɔ. 15Kù jɛ bɛi ǹ bii an ceò fiam? Mà ì waa yɛ taalem si na iyi í jɔ̀ ǹ ce jiidai.

16Ŋɔi Jesu í ni, bɛɛbɛ mɔi inɛi anyi ŋa aa na a jɛ inɛi waju ŋa, nɔ inɛi waju ŋa mɔ a na a jɛ inɛi anyi ŋa.

Jesu wa fɔ idei ikuɛ do kujĩɛ isɛ gbɛɛtasia

(Cɔ Maaku 10:32-34; Luku 18:31-34)

17Ŋɔi Jesu í dasi kpãa wa bɔ Zeruzalɛmu. Nɔ í nya mɔcɔ maateeji ŋau ikã, ŋɔi í sɔ̃ ŋa si kpãa í ni, 18wee à waa bɔ Zeruzalɛmu. Bɛi aa mu amu Amai Amanɛ a dasim awɔi inɛ ngboi woo weei Ilaaɔ̃ ŋa do woo kɔ inɛ ŋa si wooda ŋa. Aa yɛ taalem a ni a kpam. 19Si anyiɛ nɔ a dasim si awɔi dimi mmu ŋa, aa yaakom, nɔ a tɛɛm kpɔtɔɔ, nɔ a kpakpam si jĩi ku gaau. Nɔ si ajɔ mɛɛtasia an jĩ má hai si balɛ.

Mii iyi iyei Zaaki do Zãa í tɔɔ Jesu

(Cɔ Maaku 10:35-45)

20Si anyii nŋu ŋɔi iyei amai Zebedee ŋa í naa bi Jesu do amaɛ ŋa nɔ í gulɛ si wajuɛ ku tɔɔɛ ngɔgɔ. 21Nɔ Jesu í beeɛ í ni, mii ì bi. Ŋɔi í ni, si waati iyi aa na i jɛ bomma, jɔ̀ ama minjim ŋau ihɛ̃, inɛ akã ku buba awɔ njɛɛ, inɛ akã mɔ awɔ cangaɛ. 22Ŋɔi Jesu í sɔ̃ mɔcɔ minji ŋau í ni, i kù mà mii iyi ì waa tɔɔm ŋa mɔm. Aa yɔkɔ i temuaò ijuukpã iyi an yɛ ŋa? Nɔ à ni aŋa aa yɔkɔ. 23Nɔ í sɔ̃ ŋa má í ni, ntɔi, aa yɛ ijuukpã iyi an yɛ ŋa. Amma kù jɛ amui an cica inɛ ŋa iyi aa buba si canga do njɛm. Bi ku buba ŋau bɛ, inɛ ŋa iyi Ilaaɔ̃ Baam í cea sɔɔluɛ ŋai aa buba si.

24Ŋɔi mɔcɔ mɛɛwa iyi à gbe ŋau à gbɔ ideu nɔ idɔ nŋa í kɔ̃ si inɛ minji ŋau. 25Ŋɔi Jesu í kpe aŋa fei í sɔ̃ ŋa í ni, iŋɛ mɔ ì mà ŋa si andunyau ihɛ̃ ilaalu ŋau à ya maa taa inɛ nŋa ŋa gbugbãi. Nɔ inɛ ngbo nŋa ŋa mɔ a maa nyisi yiiko nŋa. 26Amma bi tu ŋɛ kaa ce bɛɛbɛ. Inɛ nŋɛ iyi wa bi nŋu ku jɛ inɛ ngbo, nŋui á jɛ woo ce nŋɛ icɛ. 27Bɛɛbɛ mɔi inɛ iyi wa bi nŋu ku jɛ woo cua nŋɛ, á jɛ aru nŋɛ. 28Nɔ baa amu Amai Amanɛ n kù naa inɛ ŋa a ceem icɛ, amma amui an ce nŋa icɛ, nɔ n na kuwɛɛm n yaò inɛ nkpɔ hai si dulum.

Jesu í jɔ̀ fɛɛju minji gɔ ŋa à yɛ ilu

(Cɔ Maaku 10:46-52; Luku 18:35-43)

29Si isɛɛnɛu Jesu do mɔcɔɛ ŋa à to Zeriko nɔ à waa fita hai bɛ. Waati iyi à waa fitau, zamaa nla gɔ wa too ŋa. 30Wee fɛɛju minji gɔ ŋa à waa buba itĩ kpãa bɛ, nɔ à gbɔ iyi Jesu wa lɔ. Ŋɔi à dɔ̃ anu à waa ni, Lafɛ̃ɛ, tɔkui ilaalu Davidi, ce araare nwa. 31Nɔ zamaau wa la si ŋa wa ni a coko. Amma bɛi à waa ni a cokou, bɛɛbɛ mɔi à ya dɔ̃ anu hee lele a maa ni, Lafɛ̃ɛ, tɔkui Davidi, ce araare nwa. 32Ŋɔi Jesu í leekĩ í kpe ŋa í bee ŋa í ni, mii ì bi n ce nŋɛ. 33Ŋɔi à jɛaa à ni, Lafɛ̃ɛ, à bi ka yɛ ilui. 34Nɔ Jesu í ce araare nŋa í lu iju nŋau. Nɔ gbakã inɛ ŋau à yɛ ilu nɔ à waa tooɛ.

Currently Selected:

Matie 20: MKL

Highlight

Compare

Copy