Matie 19

Jesu wa fɔ idei njɛ ku kɔ̀i abo do mɔkɔ

(Cɔ Maaku 10:1-12)

1Iyi Jesu í fɔ ideu í tã nɔ í nɛ hai ilɛi Galilee í bɔ ikpa ilɛi Zudee iyi í wa icei idoi Zuudɛ̃ɛu. 2Ŋɔi zamaa nla gɔ wa tooɛ nɔ í jɔ̀ bɔ̃ɔ ŋa à ba iri.

3Ŋɔi Farisi gɔ ŋa à naa bi tɛɛ ku ba a cɔ laakaiɛ. Nɔ à beeɛ à ni, amanɛ í nɛ kpãa ku kɔ̀si aboɛ si ide baa yooma fei? 4Nɔ í jɛ nŋa í ni, i kù cio iyi kukɔi idei Ilaaɔ̃ wa fɔ ŋa? Í ni, hai sinte, Woo taka í ce ŋai inɛmɔkɔ do inaabo.#19:4 Cɔ Kusintii Andunya 1:27; 5:2. 5Nɔ í ni má, na nŋu, mɔkɔ á jɔ̀ iyeò baaɛi nɔ nŋu do aboɛ a maa wɛɛ nɔ aŋa minji fei a baa a jɛ ara akã.#19:5 Cɔ Kusintii Andunya 2:24. 6Si bɛɛbɛ a kù jɛ aŋa minji má, ara akã dei à jɛ. Na nŋu, amanɛ kù nɛ ku fɛɛfɛ mii iyi Ilaaɔ̃ í tɔtɔɔ. 7Nɔ Farisi ŋau à beeɛ à ni, bii bɛɛbɛi, na mii í ce Moizi í na wooda í ni inɛ iyi wa bi ku kɔ̀si aboɛ ku ceaa tiai njɛ ku kɔ̀ ku bɛi ku kɔ̀siɛ. 8Nɔ Jesu í jɛ nŋa í ni, Moizi í jɔ̀ ì waa kɔ̀si abo nŋɛ ŋai na idɔ kulele nŋɛ. Amma waati iyi Ilaaɔ̃ í taka amanɛ kù jɛ bɛɛbɛ. 9An sɔ̃ ŋɛ, inɛ iyi í kɔ̀si aboɛ nɔ kù jɛ na sakara, nɔ í so mmuɛ, nŋu takaɛ í ce sakarai.

10Ŋɔi mɔcɔɛ ŋau à sɔ̃ɔ à ni, bii bɛɛbɛi si gãmɛi aboò mɔkɔ í tia a maà ya so njɛ. 11Nɔ Jesu í ni, ide iyi ǹ wa n fɔ nsɛi, kù jɛ inɛ feii á yɔkɔ ku gbɔ yaaseɛ, bii kù jɛ inɛ ŋa iyi Ilaaɔ̃ í mu nŋa gbugbãɛ. 12Mii ikã ikã iyi wa ganji inɛ ŋa njɛ ku so í kpɔ. Inɛ gɔ ŋa bɛɛbɛi à bí ŋa do, a kaa yɔkɔ dei. Inɛ gɔ ŋa mɔ amanɛ ŋai à ce nŋa bɛɛbɛ. Inɛ gɔ ŋa mɔ a kù bi abo ku so ku ba a ce icɛi bommai Ilaaɔ̃ jiida jiida. Inɛ iyi á yɔkɔ ku gba ideu ku gbaa.

Jesu í weea ama keeke ŋa

(Cɔ Maaku 10:13-16; Luku 18:15-17)

13Si anyii nŋu, inɛ ŋa à gbã ama keeke ŋa à naaa Jesu wa ku lesi ŋa awɔ nɔ ku ce nŋa kutɔɔ. Amma mɔcɔɛ ŋa à waa gbagba si ŋa. 14Ŋɔi Jesu í sɔ̃ ŋa í ni, i jɔ̀ amu ŋau a naa bi tom, i maà ganji ŋa, domi bommai Ilaaɔ̃ í jɛ ti inɛ ŋa iyi à jɔ ŋa. 15Ŋɔi í le nŋa awɔ si iri nɔ í ce nŋa kutɔɔ í bɛi í nɛ hai bɛ.

Idei awaasũ ilu fia gɔ

(Cɔ Maaku 10:17-31; Luku 18:18-30)

16Ajɔ nŋu gɔ mɔkɔ gɔ í naa bi Jesu nɔ í beeɛ í ni, Mɛɛtu, mii jiida yoomai an ce n baò kuwɛɛ hai tã. 17Nɔ Jesu í beeɛ í ni, na mii í ce ì waa beem idei jiida ku ce. Ilaaɔ̃ nŋu akãi í jɛ jiida. Bii ì bi i ba kuwɛɛ iyi ci ya tã, jirima woodai Ilaaɔ̃ ŋau. 18Nɔ í bee Jesu í ni, wooda yooma ŋai. Nɔ í sɔ̃ɔ í ni, maà kpa inɛ, maà ce sakara, maà ce ile, nɔ i maà jɛa inɛ gɔ sɛɛda ibo. 19Jirima iyeò baaɛ#19:19 Cɔ Kufita 20:12-16; Wooda ku kɔsi 5:16-20., nɔ i bi inɛ mmu bɛi ì bi araɛ.#19:19 Cɔ Kuwee 19:18. 20Nɔ awaasũu í ni, ǹ wa n jirima iyi bɛ fei tã, mii í gbe n ce má. 21Ŋɔi Jesu í sɔ̃ɔ í ni, bii ì bi i kɔ̃ dee dee, koo ta mii iyi ì nɛ fei, nɔ i kpɛ̃a ilu are ŋa fiau. Bii ì ce bɛɛbɛ aa ba amani jiida lelei Aɔ̃. Si anyiɛ nɔ i naa i toom. 22Iyi awaasũu í gbɔ bɛɛbɛ ŋɔi í sinda í nɛ do inɔ kufɔ domi ilu amani nla nlai.

23Ŋɔi Jesu í sɔ̃ mɔcɔɛ ŋa í ni, ntɔ ntɔ ǹ wa n sɔ̃ ŋɛi, á gaabua ilu fia ku lɔ tengi bii Ilaaɔ̃ í jɛ bommaɛ. 24Nɔ an sɔ̃ ŋɛ má iyi á faalaa kpookpo ku lɔ si iwoi abɛɛ do iyi ilu amani á lɔò tengi bii Ilaaɔ̃ í jɛ bommaɛ. 25Iyi mɔcɔ ŋau à gbɔ ideu, ŋɔi à biti kaa kaa nɔ à ni, bii bɛɛbɛi, to, yooi á ba faaba. 26Ŋɔi Jesu í cɔ ŋa nɔ í ni, bi amanɛ ŋai kaa ce, amma Ilaaɔ̃ á yɔkɔ ku ce fei ndɛɛ.

27Ŋɔi Piɛɛ í sɔ̃ɔ í ni, wee à jɔ̀ mii fei tã à waa tooɛ. To, yoomai á na ku jɛ tu wa. 28Nɔ Jesu í sɔ̃ ŋa í ni, ntɔ ntɔ ǹ wa n sɔ̃ ŋɛi, waati iyi Ilaaɔ̃ á ce mii fei titɔ̃ nɔ amu Amai Amanɛ n maa n buba si batai bomma ilu amboem, iŋɛ amanɛ maateeji iyi ì waa toom ŋau ihɛ̃, iŋɛ mɔ aa buba si batai bommau i kiitiò dimi maateejii inɛi Izirɛli ŋau. 29Nɔ inɛ baa yooma iyi í jɔ̀ kpasɛ̃ɛ wa, walakɔ igbã do ifɔɛ ŋa, walakɔ wecĩɛ ŋa, walakɔ baaɛ, walakɔ iyeɛ, walakɔ amaɛ ŋa, walakɔ ikoɛ ŋa na irim, á ba ribaɛ ikɔ cĩɔ, nɔ ku ba kuwɛɛ hai tã má. 30Amma inɛ ŋa iyi à jɛ inɛi waju ŋa si nsɛi, nkpɔ nŋa á na ku jɛ inɛi anyi ŋa, nɔ inɛi anyi ŋa mɔ, nkpɔ nŋa á na ku jɛ inɛi waju ŋa.

Currently Selected:

Matie 19: MKL

Highlight

Compare

Copy