Matie 21

Jesu wa lɔ inɔ ilu Zeruzalɛmu

(Cɔ Maaku 11:1-11; Luku 19:28-40; Zãa 12:12-19)

1Ŋɔi Jesu do mɔcɔɛ ŋa à mɔsi isɛɛnɛ nŋa nɔ à maai Zeruzalɛmu wa. À to Bɛtifazee si geete iyi à ya kpe Olivie. Nɔ Jesu í bɛ mɔcɔ minji gɔ ŋa 2í ni, i bɔ ilu iyi í wa waju nŋɛu bɛ ŋa, aa yɛ bii gbankɛlɛ gɔ wa so do amaɛ. I fũ ŋa i naam wa ŋa. 3Bii inɛ gɔ wa bee ŋɛ ide gɔ, i jɛaa i ni, Lafɛ̃ɛi í nɛ bukaata nŋa. Inɛɛu á jɔ̀ i naaò ŋa wa ŋa.

4Nŋu ŋau bɛ í cei ku ba idei waliiu ku kɔ̃ iyi í ni,

5i sɔ̃ inɛi Siɔ̃ɔ ŋa, i ni,

i cɔ ilaalu nŋɛ wa naa bi tu ŋɛ.

Amanɛ kurɔi.

Si gbankɛlɛi wa buba,

do ama gbankɛlɛ amai mɛɛmu ku so asoi.#21:5 Cɔ Zakari 9:9.

6Nɔ mɔcɔ ŋau à koo à ce bɛi í sɔ̃ ŋau. 7À naaò gbankɛlɛu do amaɛ wa, à tɛ acɔ nŋa si antaiɛ nɔ Jesu í gũ í buba si. 8Nɔ si zamaau inɛ nkpɔ í tɛ ibɔɛ si kpãau. Inɛ gɔ ŋa mɔ à da amaawɔi jĩi ŋa à tɔɔ si kpãau. 9Inɛ ŋa iyi à waa cua Jesu do inɛ ŋa iyi à waa tooɛ fei à wasi ku dɔ̃ anu à waa ni, tɔkui Davidi, à waa saabuɛ. Aɔ̃ Lafɛ̃ɛ ku weeɛ, awɔ iyi ì waa naa do iriɛ. Ka saabu Ilaaɔ̃ hee lele.#21:9 Cɔ Iri ku kɔ̃ 118:26.

10Iyi Jesu í lɔ inɔ ilu Zeruzalɛmu, inɛi iluu fei í biti. Nɔ à wasi ku ni, yooi ihɛ̃. 11Ŋɔi zamaau í jɛ í ni, Jesu waliiui, inɛi Nazarɛti si ilɛi Galilee.

Jesu í wa bantumai kpasɛ̃i Ilaaɔ̃

(Cɔ Maaku 11:15-19; Luku 19:45-48; Zãa 2:13-22)

12Ŋɔi Jesu í bɔ bantumai kpasɛ̃i Ilaaɔ̃. Iyi í to bɛ í lele woo ta iwò ŋa do woo ra iwò ŋa iyi à wa bɛ. Í fuka fuka taabui woo kpaasi fia ŋa, do kitãi woo ta ankasiidi ŋa. 13Nɔ í sɔ̃ ŋa í ni, à kɔɔ à ni, Ilaaɔ̃ í ni ilei nŋu ile bi kutɔɔi á jɛ.#21:13 Cɔ Ezai 56:7. Amma iŋɛ wee ì coo bi kutɔtɔɔi ile ŋa.#21:13 Cɔ Zeremi 7:11.

14Ŋɔi fɛɛju do ilu kutɛ akã gɔ ŋa à naa bi Jesu kpasɛ̃i Ilaaɔ̃ bɛ nɔ í jɔ̀ à ba iri. 15Amma inɛ ngboi woo weei Ilaaɔ̃ ŋa do woo kɔ inɛ ŋa si wooda ŋau, idɔ nŋa í kɔ̃ iyi à yɛ maamaake ŋa iyi í ce, nɔ à gbɔ amu ŋa à wasi ku dɔ̃ anu à waa ni, tɔkui ilaalu Davidi, à waa saabuɛ. 16Nɔ à bee Jesu à ni, ì bɛi ì gbɔ iyi à waa fɔ mbɛ? Nɔ í jɛ nŋa í ni, oo. Mii iyi wa ceu ihɛ̃, aa yɔkɔ i cioɛ ŋa si kukɔi idei Ilaaɔ̃ tengi bii à ni, Ilaaɔ̃ í jɔ̀ à gbɔ saabuɛ hai si gɛlɛi amu ŋa do si gɛlɛi ama kpɔtɔɔ ŋa.#21:16 Cɔ Iri ku kɔ̃ 8:3. 17Si anyii nŋu, í jɔ̀ ŋa í nɛ hai ilu bɛ í koo í sũ Betani.

Jesu í ceekpe jĩi ndii figi

(Cɔ Maaku 11:12-14, 20-24)

18Iju kumáɛ daadaakɔ Jesu í nɛ hai Betani wa nyi Zeruzalɛmu, nɔ ari wa kpaa. 19Ŋɔi í yɛ jĩi ndii figi gɔ itĩ kpãa bɛ, nɔ í yaa siɛ. Amma iyi í to kɔkɔɛ í ba wee wua ŋai í nɛ. Ŋɔi í sɔ̃ jĩi nɔu í ni, awɔ i kaa so má ajɔ kãma. Nɔ gbakã jĩi nɔu í gbɛ.

20Iyi mɔcɔ ŋau à yɔɔ, ŋɔi à biti. À bee Jesu à ni, bɛirei í ce jĩi ndii figiu ihɛ̃ í gbɛ anu akã bɛɛbɛ. 21Ŋɔi Jesu í jɛ nŋa í ni, ntɔ ntɔ ǹ wa n sɔ̃ ŋɛi, bii ì dasi naanɛ nɔ i kù waa sika ŋa, aa yɔkɔ i ce bɛi ǹ cea jĩi nɔu ihɛ̃ ŋa. Nɔ kaa jɛ baa iyi bɛ nŋu akã, aa yɔkɔ i sɔ̃ iri kutau ihɛ̃ ŋa i ni ku dede hai bɛ koo dási tenku, á nɔ ku koo. 22Bii ì dasi naanɛ ŋa, mii iyi ì tɔɔ Ilaaɔ̃ fei, aa ba ŋa.

Hai iwoi yiiko Jesu wa naa

(Cɔ Maaku 11:27-33; Luku 20:1-8)

23Ŋɔi Jesu í to Zeruzalɛmu nɔ í bɔ bantumai kpasɛ̃i Ilaaɔ̃ má wa kɔ inɛ ŋa si cio. Ŋɔi inɛ ngboi woo weei Ilaaɔ̃ ŋa do inɛ ngboi Zuifu ŋa à naa bi tɛɛ, à beeɛ à ni, mii ŋa iyi ì waa ceu ihɛ̃, yooi í naɛ kpãa iyi ì waa cooò. Do gbugbãi yooi ì waa cooò. 24Ŋɔi Jesu í jɛ nŋa í ni, amu mɔ an bee ŋɛ ide gɔ. Bii ì yɔkɔ ì jɛɛm ŋa, amu mɔ an sɔ̃ ŋɛ inɛ iyi í nam kpãa ǹ wa n ceò mii ŋau ihɛ̃. 25Hai iwoi Zãa í ba kpãa iyi í dasiò inɛ ŋa inyi. Hai bi Ilaaɔ̃ de, mà hai bi amanɛ ŋa. Ŋɔi à busi njɛ à waa ni, bɛirei aa ka jɛaa. Nsɛi nɔɔ, bii à jɛaa à ni Ilaaɔ̃i, á bee wa na mii í ce a kù dasi Zãa naanɛ. 26Nɔ wee njo kaa jɔ̀ ka ni hai bi amanɛ ŋai. Bii à ni hai bi amanɛ ŋai, zamaau á yɛ taale nwa si na iyi í jɔ̀ inɛ fei í jɛsi iyi Zãa waliii kãm kãm. 27Ŋɔi à jɛa Jesu à ni, a kù mà. Nɔ Jesu mɔ í sɔ̃ ŋa í ni, to, debɛi, amu mɔ n kaa n sɔ̃ ŋɛ inɛ iyi í nam kpãa ǹ wa n ceò mii ŋau ihɛ̃.

Mɔndai ama minji

28Jesu í kpa nŋa mɔndau ihɛ̃ í ni, bɛirei ì waa lasabu ŋa. Mɔkɔ gɔ í nɛ ama inɛmɔkɔ minji. Nɔ í sɔ̃ inɛ sinteu í ni, amaayi, bɔ ikom i koo i ce icɛ nnyi. 29Nɔ í ni, n kaa n koo. Amma do ankãanyi í ce lasabu mmu nɔ í koo. 30Nɔ mɔkɔu í koo í sɔ̃ ama minjisiaɛu mɔ bɛɛbɛ, nɔ amau í jɛaa í ni, to, an koo baaba. Amma kù koo. 31Si ama minji ŋau yoo nŋai í ce idɔɔbii baaɛ. Ŋɔi à ni, inɛ sinteui. Ŋɔi Jesu í sɔ̃ ŋa í ni, ntɔ ntɔ ǹ wa n sɔ̃ ŋɛi, woo gba fiai lɛmpoo do inaabo woo ta icu ŋa aa tako ŋɛ a lɔ si tengi bii Ilaaɔ̃ í jɛ bomma. 32Ǹ wa n fɔ bɛɛbɛi si na iyi í jɔ̀ Zãa í naa ku nyisi ŋɛ kpãa jiida, nɔ i kù dasiɛ naanɛ ŋa. Woo gba fiai lɛmpoo do woo ta icu ŋai à dasiɛ naanɛ. Amma iŋɛ, do iyi ì yɛ idɔ ku kpaasi nŋa ŋa fei i kù kpaasi idɔ nŋɛ hee i dasiɛ naanɛ ŋa.

Mɔndai gaanɔɔma laalɔ ŋa

(Cɔ Maaku 12:1-12; Luku 20:9-19)

33Ŋɔi Jesu í sɔ̃ ŋa má í ni, i gbɔ mɔnda gɔ má ŋa. Ilu kpasɛ̃ gɔ í ce ikoɛ, nɔ í lɔ si jĩi ndii rezɛ̃ɛ ŋa nɔ í ce kaa í kaakoɛò. Nɔ í ce bi ku fɔ̃ inyii isoɛ. Nɔ í cã tafa bi ku degbe ikou. Ŋɔi í so gaanɔɔma ŋa í dasi ŋa si ikou a maa logooɛ, í bɛi í bɔ ilu koo kpɛ bɛ. 34Waati iyi isoi jĩi ŋau í jĩa í to ku ka, ŋɔi í bɛ amaacɛ ŋa wa bi woo logoo ŋau a koo a gba iyi í jɛ ti nŋu wa. 35Amma gaanɔɔma ŋau à dede à wo si ŋa, à cã inɛ akã, nɔ à kpa inɛ akã má, nɔ à ta inɛ mɛɛtasiau mɔ kuta à kpaa. 36Nɔ ilu ilɛu í bɛ si ŋa amaacɛ gɔ ŋa wa má. Inɛ nŋu ŋa à kpɔ à re baa inɛi tako ŋau. Do nŋu fei, à ce nŋa bɛi à cea inɛi tako ŋau. 37Si anyii aŋa fei í bɛ si ŋa amaabíɛ wa, í ni, aa jirima amam. 38Amma iyi gaanɔɔma ŋau à yɛ amau à fɔ aŋa duusɔ̃ɔ à waa ni, i cɔ inɛ iyi á na ku jɛ tubuu. I naa wa ka kpaa nɔ ilɛu ku baa ku jɛ tu wa. 39Ŋɔi à muu à fitaɛ hai inɔ kaau à koo à kpaa.

40To, waati iyi ilu ilɛu á naa, bɛirei á cea gaanɔɔma ŋau. 41Ŋɔi à jɛaa à ni, á kpa inɛ laalɔ ŋaui kaa ce araare nŋa nɔ ku dɛ gaanɔɔma mmu ŋa ku dasi ŋa si ilɛɛu, inɛ ŋa iyi bii isoi jĩi nɔu í jĩa aa ya náa iyi í jɛ tɛɛ. 42Ŋɔi Jesu í bee ŋa í ni, i kù cio ideu ihɛ̃ si kukɔi idei Ilaaɔ̃ ŋa ba. Í ni,

kuta iyi woo ma ŋa à kɔ̀siu

nŋui í baa í jɛ kuta sintei icui ileu.

Aɔ̃ Lafɛ̃ɛi í coo, nɔ í mu wa biti.#21:42 Cɔ Iri ku kɔ̃ 118:22-23.

43Nɔ Jesu í ni má, ǹ wa n sɔ̃ ŋɛi, Ilaaɔ̃ á gba bommaɛ hai bi tu ŋɛ ku na dimi mmu ŋa iyi à waa ce idɔɔbiɛ. [ 44Inɛ iyi í cuku si kutau fei, kutau á cɛi. Inɛ iyi í nɔ í bata mɔ á lɔlɔ lafɛ̃ɛi nɛkɔ̃ nɛkɔ̃.]

45Iyi inɛ ngboi woo weei Ilaaɔ̃ ŋau do Farisi ŋau à gbɔ mɔndai Jesu ŋau, à mà iyi aŋai wa fãa. 46Ŋɔi à waa dɛ kpãa bɛi aa ce a muu. Amma à waa ce njoi zamaau si na iyi í jɔ̀ à dasi naanɛ iyi waliii ntɔ ntɔ.

Currently Selected:

Matie 21: MKL

Highlight

Compare

Copy