Matie 12

Jesu do ajɔi kusĩmi

(Cɔ Maaku 2:23-28; Luku 6:1-5)

1Si anyii ajɔ minji, ajɔi kusĩmi gɔ, Jesu do mɔcɔɛ ŋa à waa too kɔɔi ilɛ gɔ. Nɔ wee ari wa kpa mɔcɔɛ ŋau ŋɔi à wɔ amaajɛ iyi à gbɛ̃ si ilɛu à waa ŋɔ. 2Wee Farisi gɔ ŋa à wa bɛ. Iyi à yɔɔ ŋɔi à sɔ̃ Jesu à ni, cɔ, mɔcɔɛ ŋa à waa ce mii iyi a kù nɛ kpãai ku ce si ajɔi kusĩmi. 3Amma Jesu í jɛ nŋa í ni, i kù cio mii iyi Davidi í ce si waati iyi ari wa kpa nŋu do inɛɛ ŋa? 4Í lɔ kpasɛ̃i Ilaaɔ̃ nɔ í so pɛ̃ɛ iyi à jilɛa Ilaaɔ̃ í jɛ, nŋu do inɛɛ ŋa. Nɔ wee a kù nɛ kpãai pɛ̃ɛu ku jɛ, í gbe woo weei Ilaaɔ̃ ŋa aŋa akã. 5Mà i kù cioɛ si tiai woodai Moizi ŋa iyi si ajɔi kusĩmi woo wee ŋa iyi à ya nɛ icɛ si kpasɛ̃i Ilaaɔ̃ a kù waa jirima ajɔi kusĩmi? Do nŋu fei, a kù jɛ ilu taale ŋa. 6Amma an sɔ̃ ŋɛ iyi mii gɔ í wa ihɛ̃ iyi í nɛ bɛɛrɛ í re kpasɛ̃i Ilaaɔ̃. 7Kukɔi idei Ilaaɔ̃ wa fɔ í ni, Ilaaɔ̃ í ni, ǹ bi i ce araarei njɛ ŋa ku re i ceem kuwee.#12:7 Cɔ Ozee 6:6. Bii í jɛ ì mà yaasei ideu bɛ ŋa wo i kaa maa yɛ taalei hai nɛ taale ŋa. 8Nɔ aa mà ŋa iyi amu Amai Amanɛi ǹ jɛ inɛ ngboi ajɔi kusĩmi.

Inɛ iyi awɔ akãɛ í ku

(Cɔ Maaku 3:1-6; Luku 6:6-11)

9Nɔ Jesu í nɛ hai bɛ í koo í lɔ ile bii Zuifu ŋa à ya ce kutɔtɔɔu. 10Wee mɔkɔ gɔ í wa bɛ, awɔ akãɛ í ku. Nɔ inɛ ŋa iyi à wa bɛu à bee Jesu à ni, wooda í na inɛ kpãa ku jɔ̀ inɛ ku ba iri si ajɔi kusĩmi? À waa fɔ bɛɛbɛi ku ba a yɛ taaleɛ. 11Nɔ Jesu í jɛ nŋa í ni, bii inɛ gɔ nŋɛ í nɛ angudã akã nɔ angudãu í koo í dasi inɔ isa baa bii ajɔi kusĩmii, lafɛ̃ɛ kaa nyaa? 12Amanɛ í bɛi í re angudã hee bii í jĩ. Na nŋu, inɛ í nɛ kpãa ku ce mii jiida si ajɔi kusĩmi. 13Nɔ Jesu í sɔ̃ mɔkɔu í ni, tɛ awɔɛ. Iyi í tɔɔ nɔ í baa dee dee bɛi awɔ akãu má. 14Ŋɔi Farisi ŋau à fita à koo à waa busi njɛ bɛi aa ce a kpaò Jesu. 15Amma Jesu í mà si ŋa nɔ í nɛ hai bɛ.

Jesui í jɛ woo ce icɛ iyi Ilaaɔ̃ í cica

Waati iyi Jesu wa nɛ, zamaa nla nla gɔ í tooɛ. Nɔ í jɔ̀ bɔ̃ɔ ŋa fei à ba iri. 16Amma í sɔ̃ ŋa í kɔnkɔn du ŋa í ni a maà sɔ̃ inɛ gɔ inɛ iyi nŋu í jɛ. 17Í jɔ̀ à ba iri ku ba ide iyi walii Ezai í fɔu ku kɔ̃, iyi í ni,

18Ilaaɔ̃ í ni,

woo ce icɛm iyi ǹ cica wee.

Nŋui ǹ bi jiida, siɛi inɔ didɔ̃m fei í ya wa.

An daa si Hundem,

nɔ ku sisia dimi fei dee dee ku jɛm.

19Kaa ce kakɔɔ do inɛ gɔ hee ku la siɛ.

Bɛɛbɛ mɔi kaa kosi inɛ ŋa ija si inɔ ilu pai.

20Kaa tambɔ ama jĩi iyi í kɔmba wa bi ku cɛ,

nɔ kaa kpa fitila iyi inya kumáɛ kù la,

hee waati koo to si bii á jɔ̀ dee dee ku jɛm ku kãmia inɛ fei,

21nɔ kpãa ku cɔi dimi fei kú wa siɛ.#12:21 Cɔ Ezai 42:1-4.

Jesu wa kɔ̀ò araɛ

(Cɔ Maaku 3:22-30; Luku 11:14-23)

22Si anyii nŋu, à naa Jesu mɔkɔ gɔ wa iyi inɛi inɔɔko í jɔ̀ í fɛɛju nɔ í dekĩ. Nɔ Jesu í faaba inɛɛu, í jɔ̀ wa yɛ ilu nɔ wa fɔ ide. 23Nɔ zamaau fei í biti à waa ni, debɛi, á jɛ tɔkui Davidiu mbɛ. 24Amma iyi Farisi ŋau à gbɔ ideu, à ni, mɔkɔu ihɛ̃ wa lele inɛi inɔɔko ŋai do gbugbãi Bɛɛlizebu#12:24 Bɛɛlizebu Iri iyi à sɔ Seetam nii. ilaalu nŋa. 25Si bɛi Jesu í mà lasabu nŋa, ŋɔi í sɔ̃ ŋa í ni, bomma iyi inɛɛ ŋa à waa ja aŋa duusɔ̃ɔ á na ku gbe ngbɛ. Bɛɛbɛ mɔi ilu walakɔ kpasɛ̃ gɔ iyi inɛɛ ŋa à waa ja aŋa duusɔ̃ɔ kaa na ku kpɛ. 26Na nŋu, bii Seetam wa lele araɛ, wa ce igũ do araɛi, bommaɛ kaa kpɛ. 27Bii í jɛ do gbugbãi Bɛɛlizebuui ǹ wa n leleò inɛi inɔɔko ŋa, to, do gbugbãi yooi mɔcɔ nŋɛ ŋa mɔ à waa leleò ŋa. Debɛi aŋa taka nŋa aa yɛ taale nŋɛ. 28Amma bii do gbugbãi Hundei Ilaaɔ̃i ǹ wa n leleò inɛi inɔɔko ŋau, nŋu bɛ wa nyisi iyi Ilaaɔ̃ í sinti ku jɛ bommaɛ si anini nŋɛ.

29Bɛirei inɛ á ce ku lɔ kpasɛ̃i inɛ iyi í nɛ gbugbã ku coo ile bii kù jɛ í tako í dĩ ilu gbugbãu. Amma bii í dũu á yɔkɔ ku coo ile.

30Inɛ iyi kù jɛ tom, mbɛɛm nii. Inɛ iyi kù waa bam ku tɔtɔɔ, wa fangaaɛi. 31Na ŋɔi í ce ǹ wa n sɔ̃ ŋɛ, Ilaaɔ̃ á yɔkɔ ku kpa idei dulum do arabu fei. Amma inɛ iyi wa bu Hundei Ilaaɔ̃, kaa ba a kpa idei dulum dɛɛ pai. 32Bii amanɛ wa fɔ laalɔi Amai Amanɛ Ilaaɔ̃ á yɔkɔ ku kpa idei dulum dɛɛ. Amma inɛ iyi wa fɔ taalei Hundei Ilaaɔ̃ kaa ba a kpa idei dulum dɛɛ hai nnyi hee do ala fei.

Jĩi do isoɛ

(Cɔ Luku 6:43-45)

33Jesu í sɔ̃ ŋa má í ni, à ya mà jĩii hai si isoɛ. Jĩi jiida iso jiidai í ya so, amma jĩi laalɔ, iso laalɔi í ya so. 34Iŋɛ inɛ buu ŋai bɛi njo wukuku. Iŋɛ inɛ laalɔ ŋa, bɛirei aa ce i fɔ ide jiida ŋa. Mii iyi wa kɔ̃ si idɔi amanɛ nŋui gɛlɛɛ í ya fɔ. 35Inɛ jiida ide jiidai í ya fɔ. Nɔ ide jiidau í ya naai hai si ide jiida iyi wa singa si idɔɛ. Bɛɛbɛ mɔi inɛ laalɔ ide laalɔi í ya fɔ. Nɔ ide laalɔu mɔ í ya naai hai si ide laalɔ iyi wa singa si idɔɛ. 36An sɔ̃ ŋɛ, ide nfe iyi inɛ ŋa à waa fɔ fei, Ilaaɔ̃ á na ku bee ŋa si ajɔi kiitiu, 37domi hai si ideɛi Ilaaɔ̃ á kiitiɛ, nɔ ku kpeɛ hai nɛ taale walakɔ ilu taale.

Inɛ ŋa à bi maamaake

(Cɔ Maaku 8:11-12; Luku 11:29-32)

38Ŋɔi woo kɔ inɛ ŋa si wooda do Farisi gɔ ŋa à sɔ̃ Jesu à ni, Mɛɛtu, à bi i ce maamaake gɔ iyi á nyisi wa iyi Ilaaɔ̃i í bɛɛ wa. 39Amma Jesu í jɛ nŋa í ni, inɛ laalɔi nsɛi ŋa iyi a kù waa leekĩ do Ilaaɔ̃ nŋu akã, maamaakei à ya maa bi, amma maamaake gɔ kù wɛɛ iyi aa nyisi ŋa má bii kù jɛ ti walii Zonasi, 40domi si bɛi Zonasi í ce dasã mɛɛta do idũ mɛɛta si inɔi cɛ̃ɛ nlau, bɛɛbɛ mɔi Amai Amanɛ á ce dasã mɛɛta do idũ mɛɛta si balɛ. 41Si ajɔi kiitiu, inɛi Ninivu ŋa aa dede si inɛi nnyi ŋa a yɛ taale nŋa, si na iyi í jɔ̀ à kpaasi idɔ nŋa na waazoi Zonasi. Wee nsɛi mii gɔ í wa ihɛ̃ iyi í nɛ bɛɛrɛ í re Zonasi. 42Si ajɔi kiitiu, ilaalu inaabo iyi í naa hai awɔ cangai kpãai inunu á dede si inɛi nnyi ŋa ku yɛ taale nŋa, si na iyi í jɔ̀ hai jĩijĩi í dede í naa ku gbɔ idei bisii Salomɔɔ, ilaalu nlau. Nɔ wee nsɛi mii gɔ í wa ihɛ̃ iyi í nɛ bɛɛrɛ í re Salomɔɔ.

Kunyii inɛi inɔɔko wa má

(Cɔ Luku 11:24-26)

43Ŋɔi Jesu í kpa nŋa mɔndau ihɛ̃ í ni, bii inɛi inɔɔko í fita si inɛ, í ya maa dabii si gbaa ŋai ku maa dɛ bi ku sĩmi. Bii í kua, 44ŋɔi í ya ni, an nyi inya nwom hai bii ǹ fita wai. Waati iyi í nyi wa nɔ í ba inɛɛu í yɛ bɛi ile ngbɛ iyi à kpã à teeseɛ sãa sãa, 45á koo ku dɛdɛ kpaasi laalɔ ŋa iyi à roo wa má bɛi aŋa mɛɛje, a na a lɔ si inɛɛu a maa wa bɛ. Waati bɛɛbɛ kuwɛɛi takoi inɛɛu á tia baa ti ankãanyiɛ má. Mii iyi á ba inɛ laalɔi nsɛi ŋa mbɛ.

Idei iyei Jesu do ifɔɛ ŋa

(Cɔ Maaku 3:31-35; Luku 8:19-21)

46Waati iyi Jesu wa ba zamaau ide ku fɔ, ŋɔi iyeɛ do ifɔɛ ŋa à naa à leekĩ waduude, à waa bi a baa ide ku fɔ. 47Nɔ inɛ gɔ í naa í sɔ̃ Jesu í ni, iyeɛ do ifɔɛ ŋa wee à wa waduude à waa bi a baɛ ide ku fɔ. 48Amma Jesu í jɛa inɛɛu í ni, yooi í jɛ iyem, nɔ yoo ŋai à jɛ ifɔm ŋa. 49Nɔ í tosi mɔcɔɛ ŋau awɔ í ni, inɛ ihɛ̃ ŋai à jɛ iyem do ifɔm ŋa. 50Ntɔ ntɔ inɛ iyi wa ce idɔɔbii Baam iyi í wa lele, lafɛ̃ɛi í jɛ ifɔm walakɔ wecĩm walakɔ iyem.

Currently Selected:

Matie 12: MKL

Highlight

Compare

Copy