Matie 11

Woo bɛi Zãa ŋa

(Cɔ Luku 7:18-35)

1Waati iyi Jesu í sɔ̃ mɔcɔ maateejiɛ ŋau ide ŋau fei í tã, ŋɔi í nɛ hai bɛ í koo í dabii si ilui Galilee ŋau í kɔ inɛ ŋa si cio nɔ í ce nŋa waazo. 2Wee waati bɛɛbɛ Zãa woo dasi inyiu í wa piisɔ̃ɔ. Nɔ hai ile piisɔ̃ɔ bɛ í gbɔ baaui icɛi Jesu iyi à ya kpe Kirisi. Ŋɔi í bɛ siɛ mɔcɔɛ gɔ ŋa 3a koo a beeɛ a ni, awɔi ì jɛ inɛ iyi Ilaaɔ̃ á na ku bɛ wau? Mà ka degbe inɛ mmu gɔ. 4Nɔ Jesu í jɛ nŋa í ni, i koo i sisia Zãa mii iyi ì gbɔ do mii iyi ì yɛ ŋa. 5Fɛɛju ŋa à waa yɛ ilu, woo sukutɛ ŋa à waa nɛ dee dee, dintɛ ŋa à ba iri à jɛ inɛ kumaaju, dekĩ ŋa à waa gbɔ ide, iku ŋa à jĩ, nɔ à waa sisia ilu are ŋa laabaau jiida. 6Ilu inɔ didɔ̃i inɛ iyi kaa nyiò anyi si naanɛ ku dasiɛ na irim.

7Iyi mɔcɔi Zãa ŋau à gbɔ bɛi Jesu í fɔ, ŋɔi à sinda à nɛ. Waati iyi à waa nɛ, ŋɔi Jesu í lɔsi ku sisia zamaau idei Zãa í ni, mii ì bɔ ku cɔ si gbaau ŋa. Fɔfɔ iyi fufu wa yaya? Aawo. 8To, mii ì bɔ ku cɔ ŋa. Mà mɔkɔ iyi wa dasi ibɔ kusĩau. Aawo, inɛ ŋa iyi à waa dasi ibɔi fia nkpɔ, aŋai à ya wa kabai ilaalu ŋa. 9To, mii ì bɔ ku cɔ ŋa. Mà waliii ì bɔ ku cɔ ŋa. Oo, ntɔ ntɔ an sɔ̃ ŋɛ, inɛɛu bɛ í re baa walii. 10Zãai kukɔi idei Ilaaɔ̃ wa fãa tengi bii í ni, Ilaaɔ̃ í ni,

wee ǹ bɛ woo sisi idem wa si wajuɛ

iyi á teeseɛ kpãaɛ.#11:10 Cɔ Malasi 3:1.

11Ntɔ ntɔ an sɔ̃ ŋɛ, si inɔi inɛ ŋa iyi inaabo ŋa à bí fei, kãma nŋa kù wɛɛ iyi í re Zãa woo dasi inyi. Amma do nŋu fei, baa inɛ iyi í kere í re si bommai Ilaaɔ̃ í roo. 12Hai waati iyi Zãa í sinti ku waazo hee do nsɛi fei bommai Ilaaɔ̃ wa bɔ wajui do gbugbã, nɔ ilu gbugbã ŋai à ya baa. 13Moizi í fɔ idei bommau si tiai woodaɛ ŋau. Nɔ walii ŋau mɔ, aŋa fei à fɔ ideɛ hee í koo í to wa si waatii Zãa woo dasi inyiu. 14Ì gbɔ ŋa iyi à ni Elii á na ku naa. Bii ì jɛsi i gbɔ idem ŋa, Zãai í jɛ Eliiu. 15Inɛ iyi í nɛ itĩ iyi á gbɔò ide, ku gbɔ.

16Yooi an wãò inɛi nsɛi ŋau ihɛ̃. À yɛi bɛi amu ŋa iyi à waa buba bantuma à sɔ̃ njɛ à waa ni, 17à fã nŋɛ yee nɔ i kù jojo ŋa, nɔ à kɔ̃ nŋɛ irii iku ŋa nɔ i kù kpata ŋa. 18Ǹ ni bɛɛbɛi si na iyi í jɔ̀ waati iyi Zãa woo dasi inyiu í naa, í ya dĩ anu, ci ya mɔ vɛ̃ɛ, nɔ à ni í nɛ inɛi inɔɔkoi. 19Nɔ iyi amu Amai Amanɛ ǹ naa, ǹ ya n jɛ nɔ n maa n mɔ, nɔ inɛ ŋa à ni ǹ bi ijɛ nɔ ǹ jɛ woo mɔ atɛ̃, nɔ ǹ jɛ kpaasii woo gba fiai lɛmpoo ŋa do ilu dulum ŋa. Do nŋu fei, à yɛ iyi bisii Ilaaɔ̃ í jɛ dee dee na icɛ ŋa iyi wa ce.

Ilu ŋa bii inɛ ŋa à kɔ̀ ku dasi Jesu naanɛ

(Cɔ Luku 10:13-15)

20Nɔ Jesu í lɔsi ku gbagba si inɛi ilu ŋa bii í ce maamaake nkpɔ nkpɔ ŋau si na iyi í jɔ̀ a kù kpaasi idɔ. 21Í ni, inɔ kufɔ nla nlai á jɛ tu ŋɛ, iŋɛ inɛi Kɔrazɛ̃ɛ ŋa. Iŋɛ mɔ inɛi Bɛsaida ŋa, inɔ kufɔ nla nlai á jɛ tu ŋɛ. Maamaake ŋa iyi à ce si ilu nŋɛ ŋau ihɛ̃, bii í jɛ Tii do Sidɔ̃ɔi#11:21 Tii do Sidɔ̃ɔ Ilaaɔ̃ í kpa inɛi ilu ŋau si na iyi í jɔ̀ kuce nŋa kù sĩa. à coo wo, inɛi ilu ŋau aa dĩ saaki a kpataò na irii dulum du ŋa nɔ a kpaasi idɔ hai ku kpɛ. 22Na ŋɔi í jɔ̀ ǹ wa n sɔ̃ ŋɛ iyi si ajɔi kiitiu ijuukpãi inɛi Tii do Sidɔ̃ɔ ŋa á tia tu ŋɛ. 23Iŋɛ mɔ, inɛi Kapɛranumu ŋa, ì waa tamaa ŋa aa so ŋɛ hee lelei? Aawo, aa kɛkɛ ŋɛi hee bi kuwai iku ŋa. Ntɔ ntɔ, maamaake nkpɔ nkpɔ iyi ǹ ce si ilu nŋɛ, bii í jɛ Sodomui ǹ coo wo, iluu á wɛɛ baa nnyi. 24Na ŋɔi í jɔ̀ ǹ wa n sɔ̃ ŋɛ iyi si ajɔi kiitiu ijuukpãi inɛi Sodomu ŋa á tia tu ŋɛ.

I naa wa bi tom i naa i gba kusĩmi

(Cɔ Luku 10:21-22)

25Waati bɛɛbɛ ŋɔi Jesu í ni, Baaba, awɔ iyi ì jɛ Lafɛ̃ɛi lele do ilɛ, ǹ wa n saabuɛ do iyi ì singaa ilu bisi do woo mà ŋa mii ŋau ihɛ̃ nɔ ì nyisi amu ŋa. 26Í sĩa Baaba, si na iyi í jɔ̀ bɛɛbɛi ì bi.

27Nɔ í sɔ̃ inɛ ŋa í ni, Baam nii í daam mii fei si awɔ. Inɛ kãma kù mà amu Amau bii kù jɛ Baau. Nɔ inɛ kãma kù mà Baau bii kù jɛ amu Amau do inɛ ŋa iyi ǹ bi n nyisi ŋa.

28Iŋɛ iyi ì gbɛɛji nɔ aso wa wɔ ŋɛ fei i naa wa bi tom an mu nŋɛ kusĩmi. 29I jɛsi n lesi ŋɛ zuugum nɔ i gba idei ciom ŋa, si na iyi í jɔ̀ amu amanɛ kurɔ do woo kaye arai. Bii ì jɛsi bɛɛbɛ, aa ba kusĩmi ŋa. 30Ntɔ ntɔ, zuugum nɔu kù gaabu nɔ aso iyi an kã nŋɛ kù wo.

Currently Selected:

Matie 11: MKL

Highlight

Compare

Copy