Matie 10

Mɔcɔ maateeji ŋau

(Cɔ Maaku 3:13-19; Luku 6:12-16)

1Si anyii nŋu, Jesu í kpe mɔcɔ maateejiɛ ŋau í tɔtɔɔ ŋa bi tɛɛ. Nɔ í mu nŋa gbugbã a leleò inɛi inɔɔko ŋa nɔ a jɔ̀ kɔ̃ɔ ŋa a ba iri do inɛ ŋa iyi à waa ce bɔ̃ɔ dimi ikã ikã fei. 2Irii woo bɛ maateeji ŋau wee. Sinte, Simɔɔ iyi à ya kpe Piɛɛu do ifɔɛ Anderee, do ama minjii Zebedee ŋa Zaaki do ifɔɛ Zãa, 3do Filipu do Baatelemi, do Tomaa, do Matie iyi í tako í jɛ woo gba fiai lɛmpoo, do Zaaki amai Alifee do Tadee, 4do Simɔɔ inɛi igbɛi Zelɔtu, do Zudasi Isikariɔti, inɛ iyi á na ku zambaɛu.

Jesu í bɛ mɔcɔ maateeji ŋau

(Cɔ Maaku 6:7-13; Luku 9:1-6)

5Jesu í bɛ amanɛ maateeji ŋau nɔ í sɔ̃ ŋa bɛi nŋu í bi a ce. Í ni, i maà bɔ bi dimi mmu ŋa, nɔ i maà lɔ si ilui inɛi Samari kãma ŋa. 6Amma i bɔ bi inɛi Izirɛli ŋa, aŋa iyi à nyɔ bɛi angudã ŋa. 7I koo i waazo nŋa i ni, Ilaaɔ̃ í maai ku jɛ bommaɛ. 8Nɔ i jɔ̀ bɔ̃ɔ ŋa a ba iri nɔ i jĩ iku ŋa, i jɔ̀ dintɛ ŋa a ba iri a jɛ inɛ kumaaju, nɔ i lele inɛi inɔɔko ŋa iyi à wa si inɛ ŋa. Si bɛi ì ba hai nɛ ku sã ŋa, iŋɛ mɔ i na hai nɛ ku sã. 9I maà ti i so fia ŋa. 10I maà ti i so bɔgɔ, i maà ti i so ibɔ minjisia ŋa, walakɔ baata, walakɔ golo. I maà so mii ŋau bɛ kãma ŋa si na iyi í jɔ̀ woo ce icɛ í nɛ kpãai a náa bukaatai mii iyi í nɛ ku maa wɛɛò.

11Bii ì to ilu nla walakɔ si ilɛɛko gɔ, i dɛdɛ inɛ iyi á jɛsi ku gba ŋɛ, nɔ i buba kpasɛ̃ɛ bɛ ŋa hee ku to ajɔ iyi ì waa nɛ hai si iluu. 12Bii ì lɔ kpasɛ̃ gɔ i ya ce inɛ ŋau fɔɔ i ni ŋa, laakai ku sũ ku wɛɛ do iŋɛ. 13Bii à gba ŋɛ, laakai ku sũu á wɛɛ do aŋai, amma bii a kù gba ŋɛ, á baa si ŋɛi. 14Si ilu gɔ walakɔ si kpasɛ̃ gɔ, bii inɛ ŋau à kɔ̀ ku gba ŋɛ, hee má jɛ a gbɔ ide nŋɛ, i nɛ hai bɛ nɔ i gbugbã nŋa ilùlùi baata nŋɛ ŋa ku ba ku jɛ nŋa sɛɛda iyi kiitii Ilaaɔ̃ á naa si ŋa. 15Ntɔ ntɔ, an sɔ̃ ŋɛ, si ajɔi kiitiu, Ilaaɔ̃ á ce araarei inɛi Sodomu do Gomɔɔ#10:15 Sodomu do Gomɔɔ Ilu minji ŋau, Ilaaɔ̃ í tako í ce nfe nŋa ŋa à kpɔò bomma si na iyi í jɔ̀ dulum dii inɛ nŋa ŋa í caa. ŋa ku re inɛi ilu dimi bɛɛbɛ ŋau bɛ.

Ijuukpã iyi á naa

(Cɔ Maaku 13:9-13; Luku 21:12-17)

16Jesu í sɔ̃ ŋa má í ni, wee ǹ wa n bɛ ŋɛ nɔ aa yɛ ŋai bɛi angudã ŋa si inɔi mbo ŋa. Na nŋu, i jɔ̀ i nɛ bisi bɛi njo ŋa, nɔ i jɛ hai ce laalɔ bɛi ankasiidi ŋa. 17Nɔ i ce laakai ŋa si na iyi í jɔ̀ inɛ gɔ ŋa aa na a mu ŋɛ a bɔò ŋɛ bi ku ce kiiti, aa nɔ a cã ŋɛ ile bi ku ce kutɔtɔɔ nŋa ŋa. 18Aa bɔò ŋɛ si wajui ilu ilɛ ŋa do bi amanlu ŋa na irim, ku ba i jɛ sɛɛdam si waju nŋa ŋa do bi dimi mmu ŋa. 19Amma bii à bɔò ŋɛ bi ku kiiti, i maà ti i biti do ide iyi aa fɔ ŋa walakɔ do yaase bɛi aa fɔɔò ŋa. Bii waatiu í to, Ilaaɔ̃ á mu nŋɛ ide iyi aa fɔ ŋa. 20Nɔ ide iyi aa fɔ ŋa kaa jɛ ide nŋɛ, á naai hai bi Hundei Ilaaɔ̃ Baa nŋɛ iyi í wa si ŋɛ.

21Inɛ gɔ ŋa aa zamba ifɔ nŋa ŋa walakɔ igbã nŋa ŋa ku ba a kpa ŋa. Bɛɛbɛ mɔi baa ŋa aa maa cea ama nŋa ŋa. Amu ŋa mɔ aa dede si baa nŋa ŋa ku ba a kpa ŋa. 22Inɛ fei á cé ŋɛi na irim, amma inɛ iyi í temua hee kɔɔ á ba faaba. 23Bii à waa kpã ŋɛ iju si ilu gɔ i sa i bɔ ilu mmu. Ntɔ ntɔ, an sɔ̃ ŋɛ, i kaa dabii si ilɛi Izirɛliu i kpa iriɛ ŋa amu Amai Amanɛ n to wa.

24Ama cio ci ya re woo kɔsiɛ, amaacɛ mɔ ci ya re lafɛ̃ɛɛ. 25Na nŋu, í sĩa ama cio ku jɛsi a cea nŋu bɛi à cea woo kɔsiɛ. Bɛɛbɛ mɔi, í sĩa amaacɛ mɔ ku jɛsi a cea nŋu bɛi à cea lafɛ̃ɛɛ. Bii à waa kpe amu ilu kpasɛ̃u Seetam, aa sɔ iŋɛ inɛi kpasɛ̃ɛ ŋau iri laalɔ iyi í re bɛɛbɛ.

Njoi inɛ iyi í jɔ i ce ŋa

(Cɔ Luku 12:2-7)

26Nɔ Jesu í ni má, do nŋu fei i maà ce njo nŋa ŋa, domi ngɔgɔ kù wɛɛ iyi wa manji iyi kaa fita gbugbãa, nɔ asii kãma kù wɛɛ iyi a kàa na a mà. 27Iyi ǹ wa n sɔ̃ ŋɛ si ilu kuku, i fɔɔ si inya kumá ŋa. Iyi ì gbɔ si asii ŋa i cã kɛsɛɛdɛ. 28I maà ce njoi inɛ ŋa iyi aa kpa ara nŋu akã, nɔ a kaa yɔkɔ a kpa hunde. Amma i ce njoi inɛ iyi á yɔkɔ ku kpa ara do hunde ajɔ si ina iyi ci ya ku. 29A ci ya ta ama yɛi minji súù akã ba. Do nŋu fei, Ilaaɔ̃ wa mà baani nŋa. Baa akã nŋa ci ya nɔ ku ku iyi kù jɛ do kumàsiɛ. 30Iŋɛ mɔ, hee do ntoi iri nŋɛ ŋa fei Ilaaɔ̃ í mà jia nŋa. 31Na nŋu, i maà ce njo ŋa, bɛɛrɛ nŋɛ í re yɛi ŋa hee bii í jĩ.

32Na nŋu, inɛ iyi í fɔ si wajui amanɛ ŋa í ni nŋu í gbam, amu mɔ an gbaa si wajui Baam iyi í wa lele. 33Amma inɛ iyi í kɔ̀sim si wajui amanɛ ŋa, amu mɔ an kɔ̀siɛ si wajui Baam iyi í wa lele.

Kù jɛ laakai ku sũ, ijai

(Cɔ Luku 12:51-53; 14:26-27)

34Í sɔ̃ ŋa má í ni, i maà tamaa mà laakai ku sũi ǹ naaò wa si andunya. Aawo, ijai ǹ naaò wa. 35Ǹ naa ku kosi ama inɛmɔkɔ do baaɛi, ama inaabo mɔ do iyeɛ, à so mɔkɔ mɔ do iyei mɔkɔɛ. 36Inɛi kpasɛ̃ nŋɛ ŋai aa jɛ mbɛɛ nŋɛ ŋa.#10:36 Cɔ Misee 7:6.

37Inɛ iyi í bi baaɛ walakɔ iyeɛ í rem, lafɛ̃ɛ kù to ku jɛ inɛm. Bɛɛbɛ mɔi inɛ iyi í bi ama inɛmɔkɔɛ walakɔ ama inaaboɛ í rem, lafɛ̃ɛ kù to ku jɛ inɛm. 38Inɛ iyi kù jɛsi nŋu ku so jĩi ku gaauɛ#10:38 jĩi ku gaauɛ Inɛ ŋa iyi à kua wooda gɔ ŋa, inɛi Romu ŋa à ya kpa ŋai si jĩi ku gaau. Nɔ inɛ iyi à yɛ taaleɛu nŋui í ya so jĩi nɔu ku bɔò hee tengi bii aa kpaau. ku toom do wa, kù to ku jɛ inɛm. 39Inɛ iyi í bi ku jɛ kuwɛɛ do idɔɔbiɛ á na ku kuaɛ. Amma inɛ iyi í kɔ̀si kuwɛɛɛ na irim, lafɛ̃ɛ á na ku báa ntɔ ntɔ.

Idei riba

(Cɔ Maaku 9:41)

40Jesu í ni má, inɛ iyi í gba ŋɛ í gbam nii, nɔ inɛ iyi í gbam í gba inɛ iyi í bɛm wai. 41Inɛ iyi í gba walii si na iyi í jɔ̀ Ilaaɔ̃ í bɔɔ wa, Ilaaɔ̃ á na nŋu mɔ ribai walii, nɔ inɛ iyi í gba amanɛ iyi wa ce idɔɔbii Ilaaɔ̃ si na iyi í jɔ̀ í jɛ dee dee, Ilaaɔ̃ á na nŋu mɔ ribai inɛ dee dee. 42Inɛ mɔ iyi í mua inɛ gɔ iyi a kù waa saalu baa inyi tũtũ si na iyi í jɔ̀ í jɛ mɔcɔm, ǹ wa n sɔ̃ ŋɛi, lafɛ̃ɛ kaa kua ribaɛ pai.

Currently Selected:

Matie 10: MKL

Highlight

Compare

Copy