ROMIA 5
5
Isowr tu Kilṭhi ngi Kindit
1Ava leiji, nenki Mukpu Jisu Khrista nenni trin chaak lei inni mipindit pik inda, Isowr tu kilṭhi ngi kdaai tphaak chaak in. 2Mma ar awng ngi nenni tri naan thu kheel siiki wonsat hava pha chaan min ungta Isowr kullaar kthem thu plung ngi bin psuk in minnu tkanpat chaak in. 3Ava kheel dekki nenni kja kakham thung ngi tkanpat raan, kja kakhammi kakhaang thuwṭhi da, 4ka khaang kchangi plung kurkhum thuwṭhi da, ungta plung kurkhummi plungbin thuwṭhi da, 5plungbin va tkinsiir in pme, mleija nen nhin mido tpiik chaak in Pthla Kchiir ava ngi Isowr wonsat ava nen nuplung ril thung ngi miptlon pik chaanda.
6Nenni nsowl chaak slii thuwnni Khrista ngi mpha kcha deekki Isowr krin kma tummi diyouda. 7Rinkindit miilai khat tummi khat mdiyora ava kparsa langlang, anto daat joso kṭha miilai khat tumva khatti kdiyou nuwm cha kro. 8Pdainu nenni pnu ktong nkurthut slii arlaanni nen ntum raan Khrista diyouda Isowr ri Mma ki wonsat mihai tdee chaanda. 9Tunva ava ngi mlei kurthuwkda, nenna Mma hii ngi mido tpindit pik dok lei inni, Isowr plungthit thung ki Mma ngi kheel dekki mikaktlan pik chraan. 10Mleija nenni Mma nhal chaak slii arlaan, Mchapa diyo ngi nnenna Isowr hin mipipinpik dok inda, tunva mido tpipin pik lei inni, kheel setti Mma rinkhu ngi miktlan chaanda. 11Ava daat kma, pdainu nenki Mukpu Jisu Khrista ki ar awng ngi Isowr hin tkanpat chaak in, Mma ar awng ngi tunva nenni kpipin pik tarlaan chaak in.
Adam leh Khrista
12Ava leiji, dultipaam thu miilai khatti pnu thuwṭhida ungta pnu thu diyouda, ungta mii mkheng ngi pnu mdo arve leiji kdiyou ava mii mkheng leen kurjouda. 13Nowlam mpiik du liitti pnu ava dultipaam thu ka am dok, pdainu Nowlam am nma thungva pnu ame. 14Anto daat joso Adam kingi Mousi kpha kdiyouvi paalda, Adam mi paureel mdo leek lulua kurthuwk mjoso miirek leenni pnu ktong tdit amda, Mma ava kurjung rangki khat ava lulu.
15Pdainu pnu kirvei ava leemna chla lulu pme. Mleija miilai khat pnu arve ngi mii knempok mdiyobi, Isowr wonsat lo Miilai khat ditta Jisu Khrista wonsat leemna chla ava ngi mii knempok mdo pdim pik. 16Ungta leemna chla ava miilai khat pnu ton hep lua kurthuwk me. Mleija khat pnu arve ava mraal piida kekṭewl li mdil mdoṭoi, pdainu leemna chlava pnu ktong mii knempok ava mdo pindit pik. 17Miilai khat pnu ton leiji kdiyou ava ngi mpaalbi, wonsat leh leemna chla karlaang kcha rekka kheel siingi Miilai khat ditta Jisu Khrista thu rinkhu ngi kpaal chra.
18Miilai khat pnuton ava ngi mii mkheng mraal mdo piik lulungi, Miilai khat rinkindit nong tlotti mii mkheng ngi rinkhu kpha chra. 19Mleija miilai khat doleekki mii knempokki pnu mdo arve lulungi, Miilai khat pau pṭoiji mii knempok rinpindit pik chda. 20Karmak nong mnem nra Nowlam arvang lutda, pdainu pnu mnem set set na thung ngi kheel siiki plungnee nemda, 21ava leiji kdiyou ki pnu ava ngi mpaal lulu,plungnee rukva nenki Mukpu Jisu Khrista ngi Kṭuw knaima rinkhu rinkinditti kpaalra.
Currently Selected:
ROMIA 5: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
