ROMIA 4
4
Abraham mdo Purtol
1Ava mkurthut tu daksaa dil kṭoiji nenni npah in Abraham mlei thu talu the chenaan? 2Mleija nong rekki Abraham ma mpinrit pikbi, ava mlei thung ngi mnapal tlot nra ka am, pdainu Isowr maiṭhuwm pme. 3Mleija Laaika va tak mthe? “Abraham mi Isowr rin chda, ungta mma ava rinkindit ti mdolo pik.” 4Tunva nong ktlo ku mii khat ava chla ngi tai pikme pdainu lei ktuwlli mdolo. 5Ungta ku mii khatti nong ktlo kma pdainu kpinrit Isowr Mma rin chda, Mma mdo rin chaakki rinkindit kdingi lo pikda. 6Mma leiji nong ktaak mii ava hin Isowr ri rinkindit dida phowl kṭha mdo piik lulungi Devid rukva hanto theda:
7“Naan thungki karmak ptlot pikda,
ungta mupnu ton in thungki kdo pirliin pik miirek ava msuwkṭha;
8Mukpu ngi pnu kdingi
mdolo pik mara mii ava msuwkṭha.”
9Hava phowl kṭha mdo piikka vunmor kreen rek hin daat mo, mata vunmor kreen kma rek hin rukda? Krin cha thu Abraham hin rinkindit kdingi mdolo pik diin minnu ntheen. 10Ava mkurthut tu tak heppi mdo piik da? Vunmor mreen dumo mata mreen dilda? Vunmor mreen dil pme, pdainu mma ngi mreen duki. 11Mma ngi vunmor mreen dungi krin cha mdo thloi ava ngi rinkindit ki titinna mata kbiinamki vunmor kreen mdo arlaan chaak. Mmaan hin rinkindit kdingi mdolo pik vunmor kreen mlaiji krin cha mii mkhengki mpah mkurthut nrangki lei. 12Ungta vunmor kreen daat kma, nenki npah in Abraham mi vunmor mreen dungi krin cha doṭoi nrang tha oida, hanto vunmor kreen rek pah kurthuwk.
Krin cha ngi Isowr Paureel Karlaang
13Abraham leh mma charuwl rek hin dultipaam ava mma do kurthuwk ra dida pau mdoreel dok ava Nowlam leiki pme, pdainu krin chaki rinkindit mkurthut lei. 14Nowlam kupṭoi mii hin daatti kpii mkurthut bi, krin cha ava dosime ungta paureel ava do khat lee kurthuwk nime. 15Mleija Nowlamva plung thit mdo thuw ṭhi, pdainu Nowlam amna thungva, Nowlam kupkui ruk ame.
16Ava leiji plungnee ki plungreel ava krin cha thu amda, ungta mma charuwl rek mkheng hin mdo piik, Nowlam kupṭoi rek hin daat pme pdainu Abraham dorin thung ngi krin cha rek ruk kurthuwk, mleija mma nen nkheng inki npah in. 17Mleija hanto kjitda, “Neiji nang ava chati rek maknem ki mpah akpurthua.” Mma ngi Mhin mdo rin chaak, kdiyou rek hin rinkhu kpii ungta ka amkma ava ownda kpa am Isowr maiṭhuwm ki. 18“Nah acharuwl rekka,” dida mhin mdothe pik lulungi, chati rek maknemki mpah mkurthut nra kilrin chpa kmangi kdung rinda bin chda. 19Kdiyou tiing tiing cha, mleija mma kum arjaa khat arveel kurthuwkda, mma ngi ava mbin mpha thu mdit mata mnumei Sarah ava kdongnu kurthuwkda ava kpha thu mdo rin chaak ava down liit me. 20Isowr paureel thung ngi plung kunchul tlome, kheel setsetti rin chda Isowr punlorda, 21Isowr paureel dok ava ktlo pchaang kat ra kdingi kdung bin chda. 22Ava leiji mma do rin chaakka, “Rinkindit kdingi mdolo pik.” 23Pdainu “Mma mdolo pik,” kdi ki pauna rekva mma tum daatti mdo kjit pik pme, 24pdainu nen ntum ruk kurthuwk. Kdiyou thungki kring kardel nenki Mukpu Jisu krin kcha nen ruk miido talo pik in, 25nenki pnu ton leiji midiyo pik inda, ungta nen mikpindit pik raan ring kardel da.
Currently Selected:
ROMIA 4: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
