ROMIA 6
6
Pnu ngi Kdiyou pdainu Khrista tu Kilṭhi ngi Kringve
1Ava mkurthuttu neenva talu the nikaan di? Mleija plungnee mnem nra, pnu thu nenni ktir tlit daat che naanmo? 2Anto liit pme. Pnu thu kdiyou nenva tak heppi anto trin tlit daat raan da? 3Jisu Khrista hinki baptis klou dok nenva, Mma diyo thung ngi baptis talo dok in tdit naanni dei maan timo? 4Mpah laarnee ngi Khrista ngi kdiyou thung ki mrin kinlet lulungi, nen rukva rinkhu ren deekki tche chaak nraan, kdiyou ki baptis talo chaak in ava ngi nenna Mma tu kilṭhi ngi kulruwl in pmin.
5Mleija Mma diyo lulungi nenni Mma tu kiilṭhi ngi khdaatti na am inbi, Mma rinkarheel lulungi nen rukka Mma tu kilṭhi ngi trin karheel chaak raan. 6Nen ndaksaan thuwnki pnu mmaan dok chaak nra, ungta nenni pnu suwkki ta am bong ma nra, nenki ndaksaan pliw ava Mma tu kiilṭhi ngi khros leen kuk thoive tdit nenni ndee chaak dok in. 7Mleija kdiyou dok mii ava pnu thungki kintek kcha a. 8Pdainu nenni Khrista tu kilṭhi ngi ndiyo inbi, Mma tu kilṭhi ngi nen rukka trin chaak raan kdingi nenni krin cha tkurthut in. 9Mleija kdiyou thungki kring kinle Khrista ava diyou kurnowl liit nime; kdiyouvi Mma leen paal kurnowl me tdit nenni ndee in. 10Mma diyo ki kdiyou ava Mma ngi pnu ktong tha vei khat pangngi mii mkheng tummi kdiyou kurthuwk, pdainu kringki Mma rinkhu ava Isowr hin tha kring kcha kurthuwk. 11Ava leiji naan rukva adak saanna pnu ktong tha kdiyouvi abin in, ungta Isowr hin tha Khrista Jisu thung ngi kring imping kdingi abin chaan.
12Ava leiji, pnu dongei thung ngi ado pṭoi ma nraan, kdiyou chrangki adaksaan ava pnu ngi arjiil na mso. 13Naan adaksaan thung ki khat ava kṭhakma ado tlot nraan pnu hin pii maan, pdainu naan adaksaan ava Isowr hintha kdiyou dok thungki rinkhu kpha kcha miirek lulungi am in. Ungta naan adaksaan thungki khat ava Isowr hintha rinkindit nong ado tlot nraan apii chaan. 14Mleija naanni Nowlam kurdu kma pdainu plungnee kurdu ngi a am lei inni, pnu ngi naan leenni arjiil nime.
Rinkindit Suwk rek
15Ava mkurthuttu talu rang? Nenni Nowlam kurdu ngi ka am kma pdainu plungnee kurdu ngi ta am lei inni nenni pnu tla che naanmo? Anto liit pme! 16Kdiyou hin kṭhi pnu daat don mata rinkindit hin kṭhi pau kupṭoi ava daat don, naanni adaksaanna havale thungki kupṭoi ki suwk rek akurthut inbi, naanni khat ado pṭoi in thungki suwk kurthuwk imping tdit naanni dei maan timo? 17Pdainu mpha khat thu naanni pnu suwk kurthuwk daat jownti, mdo purchu thungki plung kurthlutti kupṭoi khat kurthuwk inti, 18ungta, pnu thungki apintek chaanda, rinkindit suwk rek akurthut lei inni, Isowr kpanpaak cha kurthuwk so! 19Naan adaksaanki apnu ton in nopa leiji, neiji dultimii pauvi kpau kcha ping, mleija naan adaksaan thungki khatti kbuwr ki nong klin klinni kṭha kma ado tlot in lulungi, tunva naan adaksaan thungki khat ava kpinchel deekki mchui nra, rinkindit hin apii chaan.
20Naanni pnu suwk akurthut inki mpha thu naanna rinkindit ktong tha kintek in pti. 21Pdainu tun tun naanni ning ado tipja naan thungki talu kinle aphaak chaak inna? Ava le ṭut naki nong nga kdiyou daat kurthuwk. 22Pdainu tunva pnu thungki kintek inti ungta Isowr suwk in pti, mṭutna ki naan dophaak chaak ra ava kpinchel leh kṭuw knaima ki rinkhu kurthuwk. 23Mleija pnu nong manna kdiyou, pdainu Isowr ki leemna chla piik ava nenki Mukpu Jisu Khrista ki kṭuw knaima rinkhu.
Currently Selected:
ROMIA 6: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
