1 KORINTHIA 5
5
Rinlop thu pang Turkuiji Kturkui cha
1Naan arlakki pang turkuiji kturkui cha mii ka amma tdit ki pau mson pik chlam da, ungta anto lua ktlok chati rek arlak daat ruk va ka am pme; mleija miilai khatti mpah numei iiṭhi da. 2Ungta naanni ava kanpat loi in tinu! Ava kchang nga aplung in kja rang pme mo? Ava ktlo miilaija naan arlak in ki akneng pthiin.
3Mleija dakki am mjo ring pthla va ado ka am ṭhiin, ungu neiji ava tha ka am daat kukurthut bi, kṭewl dok nik di. 4Hanto lu nong ktlo mii ava Mukpu Jisu miing ngi neiji kekṭewlla. Naanni akurku in mpha thu, nenki Mukpu Jisu Khrista ki rutan tu kilṭhi ngi kapthla va ado ka am ṭhiin. 5Mukpu Jisu nit thu pthla mdo ktlan pik nra, mdaksaa mmaan chaak nrangki tummi mii ava seitaan hin aparlaan pthiin.
6Anapal tlot inna ṭha chme. Thowl kṭiik suwnni thowlpen knempok mdo archik ava dei maan timo? 7Naan ava thowl ktaak lulu mpen ren akurthut nraan, thowl pliw ava aktleu dok in. Mleija nenki taplaanna rangki Jao nao Khrista ava eayou lamda. 8Ava leiji, khusiir tparthit nra ktlo ungta kṭha kma thowl kmaal mdo tlot in thowl pliw ava chaa maan che, pdainu thowl ktaak thenpen kartleu ungu kindit ava nenni chaan che. 9Nei kchethi thu pang turkuiji kturkui miirek tu akurchuwm ma nraan neiji naan hin kikjit chaakka; 10hava dultipaam thu pang turkuiji kturkui cha, mdit mata hangmal leh namtrom nong ktlo, mata khut dosak pthla luw kbuk kdo the na liit pme, ava mkurthutbi, hava dultipaam thungki asun raan tha kthuwk ra. 11Pdainu makchang ra naan hin kdo kjit ava ku mii khatti mu u mnao miing hurda pang turkuiji kturkui cha mdit mata hangmal, mata khut do sak pthla luw kbuk, kar ai kalrai, ju kipri, mdit mata namtrom nong ngi klowng hava lu ma amta kurhou ṭhi maan kdo dit na ava pme, hanto lu kdu mii ava then maal ṭhi maan. 12Mleija talu rangsu dida neiji duwnki mii ava kṭewl nikdi? Naan do kṭewl rang nga rinlop thu ka am rek ava rang pme mo? 13Duwn kia Isowr ri kekṭewl chra. “Naan arlakki kṭha kma nong ktlo miia akneng pthiin.”
Currently Selected:
1 KORINTHIA 5: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
