1 KORINTHIA 6
6
Khristen rek Mraal Kpiiva Nowlam ma Kro
1Naan thungki miilai khat ava ngi mu u mnao mraal piida pau mupthuw mpha thu, kintiing rek hin kchet kma rinkindit kma rek hin kchet nuwm mo? 2Dultipaam ma rinkindit rek do kṭewl ra tdit dei maan timo? Ungta dultipaam ma naan do kṭewl ra mkurthuttu, pau kdil suwn kekṭewl rang nga kurhui maan timo? 3Nenni waan tamsii rek tekṭewl raan na dei maan timo? Hava rinkhu ki do ava tija thu kheel sii kurthuwk chdaat ta! 4Anto mkurthuttu hantolu hep daat pau ma ammu, talu leiji rinlop thu do khat lee kurthuwk kma rek ado pṭewl inda? 5Hava naan ningkja nra ado kthe pik in. Naan a u anao in arlakki pau kupṭuw ra ksing miilai ame. 6Pdainu mu u mnao khatti mu u mnao khat tun mraal piida Nowlam tha kchet in pti, ungta ava krin kma rek kurthuwk pme mo?
7Naan thung ngi khat leh khat arlakki pau mthuw bi, ava naan do pchaan ma. Ava kchang nga talu leiji kar makka diil pchaang maan ti? Ava kchang nga talu leiji alrowt inna? 8Pdainu naan adaksaan katti parmak inti ado alrowt in, ungu naan a u anao in kat tunni ava kthuwkka.
9Isowr Kruwngpaam ava rinkindit kma rek va pha chnime tdit naan ni aryaa maanti mo? Kurhuwng kcha, pang turkuiji kturkui, khut do sak pthla luw kbuk mdit mata losang kṭhi, cham turkuiji kturkui, 10kup pru, hangmal, ju kipri, kar ai kalrai namtrommi klowng, mmaanni Isowr Kruwngpaam thlung pchaang nime. 11Naan mii angṭhea anto lu hep daat kurthuwk. Pdainu naanna Mukpu Jisu Khrista leh nenki Isowr pthla miing ngi mdo alṭhut dok, mdo tpinchel dok, mdo pindit dok in pti.
Isowr Laarnee tummi Daksaa ksinton
12“Nei ktumva do mkheng nga kro cha,” Pdainu do mkheng nga do ksi ava pme. “Nei ktumva do mkheng nga kro cha,” Pdainu neia do khat ava suwk owrri am nimaang. 13“Then na poi ki tum ungta poija then ki tum” Ungu Isowr ri khat ruk khat ruk ke eakrep ra. Daksaa ava pang turkuiji tuturkui nrang pme, pdainu Mukpu tum, ungta Mukpua daksaa tum kurthuwk. 14Ungu Isowr ri Mukpu tipring pinle da ungta Mma rutanni nen rukka mi kipring pinle chraan. 15Naan adaksaan na Khrista ki khat tdit dei maan timo? Ava ngi mlei kurthuwk da, Khrista ki khat ava neiji louda snu ko ok kma kira tpurthut pthi nimo? Anto liit pme! 16Ko ok kma snu tu mdaksaa kurjom mii ava mma tu daksaa khdaatti ka am tdit naanni dei maan timo? Mleija mdo kjit dok ava lulu, “Knii ava daksaa khdaat ra.” 17Pdainu Mukpu tu kunlom mii ava Mma tu kilṭhi ngi pthla khdaat. 18Pang turkuiji kturkui mii ava aser in. Pnu murson khim khai miilai ava daksaa duwnki kthuwk; pdainu pang turkuiji kturkui ava mdaksaa kat mraal karpii cha. 19Naanni Isowr hinki ado thloi in, naan adaksaan mthung ava pthla kchiir luwbuk Inn tdit naanni dei maan timo? Naanna athi naanki in pti me; 20mman ni ado tren dok in. Ava leiji naanki daksaa ava ngi Isowr apunlor chaan.
Currently Selected:
1 KORINTHIA 6: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
