1 KORINTHIA 4
4
Khrista ki Kenyee rek
1Hanto ngi neenna Khrista sra owr rek ungta kukthuk sii ngi Isowr vai klou rek lulu ngi ku mii khat va mik kbin pik chraan. 2Hanto hep daat sra owr khat hinki mdo ngeen ava trin chaak kuhuiji vai klou cha ava. 3Pdainu neia naan mdit mata dultimii ku mii khat kurdu ngi mdo tikṭewl rang nga mikdil sii kurthuwk. Nei kdak kat daat rukva kdaksaa kṭewl maang. 4Nei kdaksaa mkap plaal ra ava neiji do khat lee tuk sut maang, pdainu neia parmak chmaang. Nei mkikṭewl la Mukpu. 5Ava leiji, tun tunni kjiing thu kurdowl daat da ka am do ava mar awng tha kthuw ṭhira, ungta plung do bin kthe thuw rang ngi Mukpu murjun du, mpha mvee du ngi kṭewl maan. Audilli mii pum ktaiji Isowr do panpaak karlaang chra.
6Ava leiji ku u knao rek, mdo kjit dok ava kheel li kchet kma neen ki hin akurchu chaak nraan, mleija naan ku mii khat lee naar mlin ma nra, khat san da ktlok khat mraal kpii tdit ma amma nra, akat nraan neiji hava mkheng nga kdaksaa leh Apollo purtol nu kdo saam chaak. 7Mleija msik khatti ku ngi ati dee inda? Karlaang kma ngi ado thloi in tak ka am da? Naanni karlaang cha akurthut innu, leemna chla kma lulu ngi tak heppi napal atlot psuk inna?
8Naanna kdim chdok in pti! Suwang kthuwk dok in pti! Neen ktaakki kruwng rek kurthuwk dok in pti! Neen rukka naan tu kilṭhi ngi paam kpu kukur thut nraan, naanni kruwng ngi apaal raan ava neiji kngei chaakka! 9Mleija kdiyou rangki mii rek lulu ngi, Isowr ri kenyee rek neenna mṭut na rel tha mhai pdaar chaanda kdingi neiva kbin chaakka; mleija waan tamsii rek leh mii rek hinni dultipaam thu mii dosut thlaang thlaang ngaalra kurthuwk kchaan ping. 10Neenna Khrista leiji ka aak rek in ping, pdainu naanna Khrista hin ksing rek in pti. Neenna ksowl kchaan ping, pdainu naanna ru ktang in pti. Neenva ningkja kdo dut in, pdainu naanna kanpa ado phaak chaak in. 11Tun tunki mpha thungva neenna kpoi in ktham ungu kning in kakraal, dona pliw hiil naa innu, ungu mbun chaanda, ungta ka am nraan inn ruk am chme, 12ungta neenni ku khut kat inni nong lou innu kdo tlot in, pauhur mtubuk in thuwnni phowl kṭha parlaan innu; kja kakham kdut in thu diil dei chaannu; 13mtrai chaak in thu pau kparneem mi kdo the nraan tlownnu, tunva neenna dultipaam ki junthil lulu ngi do mkheng kukchou krep kurthuwk in ping.
14Naan ningkja kdo piik nra neiva hava kjit chmaang, pdainu nei kwonsat lo knaole lulu akparseel kchaan ping. 15Mleija naanni Khrista hin tha ber aksuk pik chraan mii knempok thloi daat jownti, naanni apah le knempokki thloi maan ti. Mleija Jisu Khrista ki kṭha paumin ava ngi neia naan pah kurthuwk cha ping. 16Ava mkurthut bi nei knopa akurchu chaak nraan aka ktham chaak inna. 17Ava leiji, Mukpu hin trin chaak kurhui nao, nei kwonsat lo Timothi ava naan hinni neiji ksii chaakka, mmun ktai thu rinlop ktai hin neiji kdo purchu chaak lam lulu ngi, neiji Khrista hin kche tlown ava mma ngi akpibin phaak chraan. 18Naan hin nei kthlen ma ava naan mii angṭhe ngi mdo kanpat loi. 19Pdainu Mukpu do ngei mkurthut bi, naan hin kbeiji thleng nik di, ungta kanpat loi rek pauthe ava kma pdainu mrutan in neiji thlaam nik di. 20Mleija Isowr Kruwng paamma kpau ki ava pme, pdainu rutan ki. 21Tak angei inna? Neiji naan hin kchung khat tu kilṭhi ngi thleng nik mo mdit mata pthla kparneem wonsat ava ngi thleng nik da?
Currently Selected:
1 KORINTHIA 4: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
