1 KORINTHIA 12
12
Pthla Kchiir hinki Chla
1Tunva ku u knao rek, pthla ktongki chla mlei thu neiji ado kthe pik maan rang nga ngei chmaang. 2Naanni ktlok chati akurthut in mpha thu, khut do sak Pthla ka aak kcha hin lele tha ado tiṭhiin tdit neiji kdo dee. 3Ava leiji, Isowr pthla do pthe ngi, “Jisua pauhurri abuk so!” dida ku khat lee ngi pau the me. Ungta Pthla Kchiir kma donle ku khat lee ngi, “Jisua Mukpu,” dida the me tdit naan dodee pandit ra ava neiji kngei chaakka.
4Tunva chla ava msik msik pdainu Pthla khdaat. 5Mnong nga msik msik, pdainu Mukpua khdaat; 6ungta msik msik nong ktlo ka am, pdainu Isowr khdaat ava ngi mii pum ktai hin mkheng nga pii chda mdo mu pik. 7Mii mkheng ṭhat nra mii pum ktai hin Pthla ava pandan pik chda. 8Khat hin thangva Pthla ava ngi lousing pii chda, ungu ktlok khat hin thangva Pthla ava katti kdei kcha ki piida, 9ktlok khat hin thangva Pthla ava katti krin ki pii chda, ktlok khat hin thangva Pthla khdaat ava ngi kapdam ki pii chda, 10ktlok khat hin thangva tngana ki nong ktlo ki pii chda, ktlok khat hin thangva pau kphuwng ki pii chda, ktlok khat hin thangva Pthla rek ktin kcha ki pii chda, ktlok khat hin thangva msik msik pauvi kpau ki pii chda, ktlok khat hin thangva msik msik pau kpurlup ki kpii kcha. 11Mma poibin dil kṭoiji havale mkheng nga mma mma ki tummi them pik da, khdaat chrel Pthla ava katti them pik lamda.
Msing Knempokki Daksaa Khdaat
12Mleija daksaa khdaat ava ngi msing knempokki ma am lulu ngi, daksaa msing mkheng nga knempokki am chdaat joso daksaa ava khdaat mkurthut leiji Khrista ruk anto. 13Mleija Jihudia rek daat don Grik rek daat don suwk owr daat don kintek mii daat don, Pthla khdaat ava ngi mkheng nga daksaa khdaat thu baptis ptlot da, ungta mkheng nga daksaa khdaat thungki mdo pneek sap lam.
14Mleija daksaa ava msing khdaatti mdo tpa am ava pme, pdainu msing knempok. 15Khu ngi “Neia khut pmaang,” dida kthe mkurthut bi, “Neia daksaa thungki pmaang,” ava leiji daksaa thungki pme tdit ro nime. 16Knaa ngi, “Neia mik kukurthut ma leiji, neia daksaa thungki pmaang,” dida mthe bi, ava leiji daksaa thungki pme dida tithe rome. 17Daksaa mkheng nga mik mkurthuttu, taryaak nrang nga talu rang da? Daksaa mkheng nga knaa mkurthut tu, mikrim mdo pniim nrang nga talu thung rang da? 18Pdainu anto katti Isowr va kchol da, khat khat ava msing ngi mi parnaak ṭip inda. 19Mkheng nga msing khdaat mkurthut bi, daksaa talu rang da? 20Anto lulu ngi msing ava knempokki ka am, joso daksaa ava khdaat. 21Mik ki “Nang nga aju kriing maang,” dida khut hin kthe pchaang me mdit mata vei khat nowlli luw ava ngi, “Nang nga aju kriing maang,” dida khu hin kthe pchaang me. 22Anto paa le rang ngi, daksaa thungki ksowl sii kcha msing ava ngi msit ka am sii, 23ungta arleek setti tak kjat nra ame kdingi nenni tbin psuk in daksaa thungki msing rek ava hin tha kheel sii ngi tak kjat kat ra, ungta nenki do ksi kma msing ava kheel sii ngi kṭha ruk ka am, 24msing thungki kṭha sii ava nenni do tipsit lu in pme. Pdainu nenni tkinsiir psuk in msing hin Isowr ri kheel sii ki tak kjat piida daksaa ava mdo punlom. 25Ungta daksaa thu mkurnur ma nraan, pdainu msing rek ava ngi khat leh khat tuk mkursut nraan lei. 26Msing khatti kja mparteel bi, mkheng kheng inni mdo jat ṭhi in; msing khatti kanpa mphaak bi, mkheng kheng inni mdo kanpat ṭhi in.
27Tunva naanna Khrista ki daksaa in pti ungta naan mii pum ktaija msing in pti. 28Ungta Rinlop thu Isowr va ru kri reeppi kenyee rek, mknit na thu khulpu rek, muk kdum na thu chukpu rek, ava dilli tngana rek nong ktlo rek, ava dilli kapdam rek, kbom rek, ber suda nong ktlo rek, msik msik pleiji kpau rangki kchol da pthuwk da. ka am. 29Mkheng nga kenyee rek mo? Mkheng nga khulpu rek mo? Mkheng nga chukpu rek mo? Mkheng nga tngana rek ktlo lammo? 30Mkheng inni kapdam ki chla mthloi inmo? Mkheng inni pleiji kpau lammo? Mkheng inni pau mpurlu inmo? 31Pdainu kanthang sii ki leemna chla ava angeen chaan.
Ungta kinreel sii ki lam ava neiji aju tdet in nik di.
Currently Selected:
1 KORINTHIA 12: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
