1 KORINTHIA 13
13
Wonsat
1Neiji dulti mii leh waan tamsii rek pauvi kpau kurthuwk joring, neiji wonsat kthloi mabi, neia mukrowl pum kaanta mdit mata thlingdiing lulu nik di. 2Ungta neiji khulpu khat kurthuwk ki rutan thloida, ungta kukthuk pau mkheng leh tdee na mkheng dei dok daat joring, ungu krin cha mkheng thloi da, lownpii rek punthot pchaang daat joring, wonsat kthloi mabi, neia dosi chmaang. 3Neiji kdo thloi mkheng pii da, ungta mei thu mdo pkaak pthi ra kdaksaa parlaan pthi joring, wonsat kthloi mabi, neiji kdo phaak chaak ra do khat lee ame.
4Wonsat ta kdiil dei, ungu plung knei; wonsat va kheithe nme, mdit mata napal tlo me; 5wonsat ta plung ksel kut,lur ava pme. Wonsat va mdaksaa punmun me, sum pinsi me, 6mdit mata kar mak bin thlit me,pdainu kindit thu kanpa cha. 7Wonsat va do mkheng mdo parteel, do mkheng mdo rin chaak, do mkheng bin psuk da, do mkheng nga mdo diil pchaan.
8Wonsat ta kṭuw kro ava pme; pdainu pau kphuwng rekka mongtek daat ra, msik msik pau kphuwng ruk va kdown pthi ra; kdei dok lang lang ava ruk mongtek daat ra. 9Mleija nenki tdee na ava mkinreel ava pme, ungta nenki pauphuwn ruk mkinreel ava pme; 10pdainu mkinreel mthlen mpha thu, kinreel kma ava kṭuw chra. 11Neiji nao kukurthuw mpha thu, nao pauvi kpau ping, nao poi bin heppi kdo bin, nao dodee heppi kdo dee; neiji kvir dok thungta nao nopa ava kdo maak pthi. 12Mleija tun tunva nenni meenseen thu kjiing chechu ngi ndee inna, pdainu dil thangva mai leh maiji tkardee ra. Tunva neiji maklek daat kdo dee; pdainu dil thangva kurkhum riim mi nei mdo tdee dok lulu ngi, neiji kurkhummi dei chnik di. 13Ava leiji krin cha, kbin cha, wonsat, hava le kdumma ka am thlit; pdainu klin siia wonsat.
Currently Selected:
1 KORINTHIA 13: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
