1 KORINTHIA 11
11
1Neiji Khrista nopa kdo pṭoi lulu ngi, nei knopa apṭoi chaan.
Luwkbuk thu Luw Kukhum
2Mleija naan ni do khim khai thu nei mbin phaak chaan ti, naan hin ado kpiik in nopa ava kṭha deekki pṭoi inti, ava leiji ak panpaak chaak inna. 3Pdainu pselpa luw khim khaija Khrista, snu luw ava pselpa, ungta Khrista luw ava Isowr tdit naanni adodee raan ava neiji kngei chaakka. 4Pselpa ku mii khatti mluw khum sora mṭhil chaak bi, mdit mata pau mphuwnbi, mma ngi mluw ava kjat pik me, 5pdainu snu ku mii khatti mluw kukhum kma mṭhil chaak, mdit mata pau mphuwn bi, mma ngi mluw ava kjat pikme mluw kngeu snu ava tu kinṭim ma. 6Mleija snu miilai khatti mluw mkhum mabi, mma ngi mluw angeu so; pdainu luw kngeu mdit mata kthim ava snu khat tummi ning kja na mkurthut leiji, mma ngi mluw akhum so. 7Mleija pselpa ava Isowr arling ungu laarnee mkurthut leiji, mma ngi mluw mdo khum rang pme; pdainu snua pselpa laarnee. 8Mleija pselpa khat ava snu khat thungki mdo seem ava pme, pdainu snu khat ava pselpa khat thungki mdo seem. 9Mdit mata snu tummi pselpa ava mdo seem ava pme, pdainu pselpa tummi snu ava mdo seem. 10Ava leiji waan tamsii rekki mlei kurthuwk da, snu khatti mluw mdo khum ra. 11Anto chdaat joso, Mukpu hin thangva psel ktaakki snu ame, mdit mata snu ktaakki psel ame; 12mleija psel thungki snu mdo seem ava lulu ngi, tunva psella snu thungki kṭou. ungta do mkheng nga Isowr hinki kthuwk. 13Adaksaan karṭewl chaan; snu miilai khatti mluw kukhum kma Isowr hin kṭhil cha kro mo? 14Psel khatti msam ksaang ngi mhaal bi, mma hin ningkja na tdit ki nopa ka am, 15pdainu snu miilai khat ta msam msaan bi, avaa naarlinna pme mo? Mleija mluw khum ra mhin msam mdo piik chaak. 16Ku mii khatti ava mkarteen nabi, nen nhin daat ruk Isowr rinlop hin daat ruk anto lu ktlo ava ka am pme.
Mukpu ki Kmaal
17Pdainu naanni athuw kurku in mpha thu, mṭhat nrang mda pdainu kheel setti mthit nra kurthuwk da, ava leiji neiji ado kparseel in thungva apanpaak maan ring. 18Mleija chodu ki mun thu, Rinlop khatti akunpun in mpha thu, naan arlakki kinṭhen ka amma tdit neiji aryaa chnu, ungbi ava neiji mruk rin nu, 19mleija naan arlakki plung klut rek do tin chaak na mkurthut nra, naan arlak inni kinṭhen tdit ka am. 20Naanni athuw kurdut in mpha thu, naanni ado chaak in Mukpu ki kmaal ava pme. 21Mleija kmaal lu thu naan mii pum ktaiva mma mma ki then chaa da, khat ta mpoi mtham arlaanni ktlok khatta rikrou diingi prida. 22Talu lei da? Ado chaak ado neek nraan inn thloi maan timo? Mdit mata Isowr Rinlop ningkja ado piik nraan ungta kthloi kma rek ado kinsiir nraan atlot inna? Naan hin neiva tak the nik di? Hava leiji apanpaak ni kaan mo? Eme, aju panpaak liit in ni maang.
23Mleija neiji naan hin ado kparlaan inna neiji Mukpu hinki kdo arlaan ava kurthuwk, mleija Mukpu Jisu mparlaan pthi nit ava jaan ni Mma ngi thenpen louda, 24Mma ngi mpanpaak dil tha khuida, ungu theda, “Havaa naan tum rangki Nei kdaksaa, Nei ado tbin phaak naanni hava atlo in.” 25Anto heppi Mma ngi mmaal dok diltha tong rukka louda, ungu theda, “Hava tong nga ren paurina Nei kihii. Hava atlo in, mpha ktai thu Nei ado tbin phaak naanni anee in.” 26Mleija naanni hava thenpen chaa da hava tong aneek in ktai thu Mma murjun du khim khaiji naanni Mukpu diyo kparyaam kurthuwk in pti.
27Ava leiji, kurhui liit kma do tlotti Mukpu thenpen chaa da, mdit mata tong knee ku mii khat ava Mukpu daksaa leh mhii tunni kar mak nong mtlotta. 28Mii ava ngi mdaksaa kparsin na thi sora, thenpen ava achaa so ungta tong ruk anee so. 29Mleija ku mii khatti mdaksaa karbin liit kma pangi mchaak mneek bi, mdaksaa mthina tuwn mdo kṭewl nra kchaa knee kurthuwkka. 30Ava leiji naan mii maknem ma sowlda koida, ungu kdiyou chlam. 31Pdainu nenni ndaksaa ava kindit deekki nkṭewl chaak bi, nenna mi kṭewl in nime. 32Pdainu dultipaam tu kilṭhi ngi nraal in mido tpiik ma nraan, Mukpu ngi mido tikṭewl in.
33Ava leiji ku u knao rek, kmaal ra athuw kurku in mpha thu, khat leh khat karda in, 34Mpoi ktham ku mii khat ma amta, kthuwk kurkukki araal in akpii raanki mkurthutta, mi inn tha maal chdaat so. Pau murson ki mleija neiji kthlen mpha thu athe pik ro lai inni.
Currently Selected:
1 KORINTHIA 11: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
