PILIPIMEI 1
1
Salam kapyii
1Krista Jisumah kikaleimei tiisii kalei Pol ninado Timothi dato, Charsh kito doimajang kapyiimei ninado tiikahamei hang go njasii Philipiya kito kalei Krista Jisu zei kito kamateimei hang dakii:
2Nyii Pfii Saraa ninado Bangpii Jisu Kristanii jumage kapyii ninado kamajung tei gonyiigo pyii matulo.
Polnii tam kamatoi ninado ka-nta
3Inii gonyiigo kamaningta gu Saraago Inii halangle. 4Inii gonyii hang jangpiinii kariita-ta tei Inii ntasii riitale, 5dapokii karei kito tingnei katangpii kabi rasam katam kito gonyiinii n-gu tiikaha jangpii. 6Teijangpii gonyii lungto ai ai kabi tha tiihao kapyii Saraa teinii Krista Jisu mah leimik piinei katang tei, lui kasuta kaswisii tha tiijou pyii tangle katu tei Inii malumle. 7Gonyiihang jangpii Inii aitiisii maning majyiile, kadapokii gonyiinii gulung kito leile, sateichii n-gu sagyiirengpii kapei tinglang kak, sateichii kabi rasam katam kito, saryii tiisii kadang kito, sateichii tiisangting katu, gonyii hangnii n-gu kaswisii jumage kati mah njai dou njoi katu meihangle. 8Kadapokii Inii Krista Jisumah lungkasyii teipii njasii gonyiihang go kadaziikapii mangwisii leipo katu, Saraanii gumah sakchyiile.
9Kasang swirek kabi ninado lungswi kati kangouhang tei kaswisii gonyii mah lungkasyii tei kisii kisii dibuibui matu tang karam jangpii Inii riitale; 10kadapokii gonyiinii bikaki tei kalaiwo kabui jangpii. Teitii leponii Kristamah leimik piinei tei gonyiinii matei kasu ninado sajek katii tei gatangle. 11Jisu Krista roinii pyii wokabui pumtei kava ninado Saraago tam kamatoi, kasang kabi hangteipii gonyiimah tiilung tei tokryii tangle.
Ringtang karam ai Kristale
12Kangsanamei, guphyiiryiito pat kalei hangteinii kabi rasam tei kasangpii kisii bisii timatu tang karam jangpii pat takle katu tei Inii gonyiigo matinyiile. 13Teijangpiinii n-gu kabang kikii kabang ai Krista jangpiiniile katu sagongki koikalei- mei hangnii tigong takle. 14Sateichii kabang kikii n-gu kabang jangpiinii kangsanamei kamoilamgo Bangpii zei kikii malumwo takle, sateichii kahing gasii Saraamah samtam tei tam tang karam jangpii lungdi tutakle.
15Kangkanii kasangpii kamai- mhii ninado n-girazyii jangpii sateichii kangkanii kabi lungswi jangpii Kris- tamah kabi rasam tei tam ralipyiile. 16Mei kangkanii kabi rasam mah saryii dangtang karam jangpii n-gu aikikii kaibamle katu tisii, lung- kasyii kito; 17nlenii kangkanii n-gu kabang kikii bang kabam tinglang kak, ahnyiinii n-gu kisii tiikamage tangle katupii, mpou mpou jangpiinii kamaning lungswi kito, lung matei supii Kristamah kabi rasam tei tam ralipyiile.
18Teitii leponii kadapeipo? Nlenii mahlyii hang kito, jai katii kito kado, kasang kito kado, Kristamah kabi rasam tei tam ralipyiile, sateichii teito Inii ntale. 19Nle, Inii nta tangle, kadapokii gonyiimah kariita ninado Jisu Kristamah rangiimah tiikaha paikito ai ai n-gu laat mpat kapyii tei ndat tangle katu tei Inii tile. 20Inii samah kado nroulakle, nlenii ting- lang kaleita lungdisii kalei takumpii aitoido Inii ringkado taikado, gu pum kito Kristago tam matoi tangle katu ai ai gumah saryiisii koikalei ninado maning kamalum teile. 21Kadapokii gujangpiinii karing ai Kristale, sateichii katai ai katongle. 22Nlenii ringjousii kalei teipii Inii kisii tha kabi tei tiiwobui leponii, Inii kadapii tei kalai tangpo tisutakle. 23Inii tiilung aikito tat maju wosii Kristago kaswisii bamtunyii takle, kadapokii teiteinii bisang bibwile, tei hang- namah kak kiteito n-gu biitnai bamsii leitakle; 24Nlenii gonyii jangpiinanii Inii ringjousii kalei ai kisii aroutii buile. 25Ai ai Inii tiigatpii titakle, teipiinii Inii bam tang takle, kamalum kito gonyiimah tha tiikalei ninado ka-nta tei kai mpam tang karam jangpii, Inii gonyii hang go kaswisii bamjou tang takle; 26Inii gonyiigo kaswisii bamloi katu kak, gonyiinii Krista Jisugo njasii hangninii tiikalu kito, gonyiinii gujangpii kisii detdi tang karam kaang tei leitangle.
27Inii gonyiigo gong kadou kado, kadoumak kado, gonyiinii lungswi hangninii tiisii kabi rasam kito kamalum jangteipii kamagasii rangii hangninii kito sangtingsii satle katu gonyiimah kaang kito Inii shiiwo kabui tiisii gonyiinii lungkalei gonyii tiilungmah tingshang rali tei Kristamah kabi rasamgo masam matulo. 28Gonyiimah saryiimeigo hing sulo, tinglang kaleita rai kulo, sateichii aipiinii ahnyii koutang takle sateichii gonyiinii nam tang takle katu tei ahnyiigo maning riirhii katu gasii tiimangou tangle, kada- pokii ngam matu wokalu tei Saraanii gonyiigo pyiile. 29Kadapokii gonyii- nii Krista zei kito kamalum teiroi supiinii, mpou jangpii kamage kalak kapung teipiiniido Krista nga kanga tinglang kabi tei gonyii dakii pyiibam takle. 30Gonyiinii kangou ninado kashii takumpii Inii saryii tiisii kalei kitei aitoinii gonyiinii saryii tei njoisii leitakle.
Currently Selected:
PILIPIMEI 1: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
