HEBRUMEI 3
3
Jisunii Moses sung dikile
1Teijangpii Saraanii lat kalu, kamatei gukangsanamei, nyiinii tam mpatsii kalei kamalum mah kanat kajum tingdipii tiimatu tang karam jangpii Saraanii lang m-mang kapyii Jisu gotei maninglo. 2Saraa kilungto Mosesnii malum kabui tha tiikatu takumpii ai tha tiimatu tang karam jangpii mpougo kalai kapyii, Saraa sam tei swisii leile. 3Kadapokii ki tiimakhii kalei mei teinii kigo tei sung kisii dzyii ka-nrou doukalei takumpii, Jisunii Moses sung kisii dikaki dzyii ka-nrou tei doumajyiile. 4Kadapokii ki hang tei mei kata kangkanii tiimakhiile, nlenii mahlyii hang go tiikapyii teinii Saraale. 5Ki kaleimei hangninii tiisii Mosesnii Saraa kilungto malum kabui tha tei tiile, sateichii gong tang karam tinglang kanaki Saraanii tam tang karam mah hang mah kaang kito mpounii tamle. 6Nlenii Saraamah ki kalung teito nah sapfii mpou tei tiisii Kristanii malum kabui tei tiile. Nyiinii maning malumsii kalei kiteito nyiinii lung kadi ninado nyiimah lung kalum tei jumsii lei leponii, nyiinii mpoumah ki teile.
Saraago kamalum mei jangpii ka-ntak
7Teijangpii rangii kamateinii tam kalei takumpii,
“Gonyiinii tingnei mpoumah rok tei shii leponii,
8sazyii kamarong ki teito jaikaju piinei leimik,
rangpa katu ki takumpii, gonyii lung teisulo,
9tei kito gonyii peipao meinii n-gu jai jule sateichii tingkum rekdai katang tei ahnyiinii gumah tha tei ngoutakle.
10Teijangpii Inii teiha gotei rarhiisii tamle,
ahnyiinii tinglang kaleita ahnyii mah lung kiteito dhiisii tat tule,
ahnyiinii gumah pwidi timakle.
11Inii rakarhii kito riishii tiikabam takumpii,
‘ahnyiinii gumah ntakbam kitei liitsang liitlakle.’ ”
12Kangsanamei, gonyii kak kito mei kado kashyii lung kapung, sateichii malum kasu tei patsii mpounii karing Saraa dato dhiisii tat tu kasu tiisii sakai wolo. 13Nlenii gonyii kata kangkago kem mah kasang kasu chuisii kahem teipii gonyii lung tei teimatu kasu tiisii “Tingnei” katu lat kaleita tei, sating kata hangninanii hangniniigo lung tiimadilo. 14Kadapokii nyiinii nyiimah lung kalum tei karei sekto kalui katang tei sangtingsii jum woleponii, nyii hang ai Kristago kaswisii njai dou njoi katumei takle:
15ai tiisii tam bamle,
“Gonyiinii tingnei mpoumah roktei shii leponii,
rangpa katu ki takumpii,
gonyii lung teisulo.”
16Shii wosii rangpa katu ahnyii tei tatapo? Moses nii doimajang tatsii kalai kangto Izip sazyii toikalei mei hang tei makpo? 17Sateichii mpounii tata phyii ryiikii tingkum rekdai katang tei rarhiipo? Sazyii kamarong kito pum koukalei kem tiikalei ahnyii phyiiryiikii makpo? 18Sateichii ka- khatsam swikasu meida teikii supii, ahnyiinii mpoumah ntakbam kitei liitsang liit laklesii mpounii tadakii riishii tiipyiipo? 19Teipiinii malum kasu jangpii ahnyiinii ntakbam kitei liitpei wolak kiile katu nyiinii ngoule.
Currently Selected:
HEBRUMEI 3: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
