HEBRUMEI 1

Mpounah sapfii mpou paikito kagong samtam

1Ndou kareiki Saraanii lungka- kalingmei paikito nyiipei nyii- paomeigo jairali kataam kataam kito nlai nlailoisii sam rashiile, 2nlenii ai kalui tinglang leimik aikito nah sapfii mpou paikito nyii dakii mpounii sam rashiile. Mpougo mahlyii hangmah matou katou tei tiipyii takle, sateichii mpounii mpou paikito sazyii pouryiido tiipyiile; 3Mpounii Saraamah pumtei kava tei seikalatsii leile sateichii mpounii nunuto kalei Saraamah jaitalui gotei njoichak thiile; Sazyii pouryiigo mpoumah teimaham kalei samkang teipii panglungsii leile. Sazyii pouryiimei mah kem jangpiinii kaleikapyii doukalu taito, dikaki teimaham, Sating gam Saraamah bah ajiilam teito mpounii bam takle.

Kadi kathang Saraanah sapfii mpou

4Mpounii sating gamlui hang doito kisii bikaki zei doukalu takum- pii, ahnyii hang doito teiziikapii kisii bikaki tei tiipyii takle.

5“Kadapokii nang gunah sapfii mpoule,

tingnei Inii go pfii tiiwo takle,”

mak-kii nlailoisii

“Inii mpoumah Pfii tei tangle,

sateichii mpounii gunah sapfii mpou tei tangle,”

sii Saraanii mpoumah sating gamlui hangninii dakiido tamsang tam makle. 6Sateichii Saraanii lungkarei mpounah sapfii mpougo sazyii pouryiikii lang m-mang katu kak, mpounii tamle,

“Saraamah sating gamlui hangnii mpougo mata tang karamle.”

7Sateichii sating gamluimah kaang kito Saraanii tamle,

“Saraanii mpoumah sating gamluigo tingkai tiipyiile,

sateichii mpou nga kangameigo mi mah mishong tiipyiile.”

8Nlenii Nah sapfii mpoumah kaang kito mpounii tamle,

“O, Saraa, gomah sating sazyii tei kalui tiisang tiimakle,

sateichii kagu kapang gasii nangnii gomeigo apum tiisii lungle.

9Kasang kamajyii tei nangnii mareile,

sateichii kama gotei ngouroule, teijangpii Saraanii, go Saraanii, go bemei doito n-go kisii ka-ntamah thao manukpyii takle.”

10Sateichii mpounii tamle,

“He Bangpii, saroisekto sazyii tii mpatpyii takle,

sating hang ainii go baichemle;

11ahnyiinii gatutangle,

nlenii nangnii bamjou tangle;

ahnyiihangnii peimaninii ham katu takumpii hamtu tangle.

12Sateichii kabapei takumpii nangnii teigo tei kadiitsii kajui tangle,

sateichii ahnyii teinii peimani takumpii taamdo taam tutangle.

Nlenii nangnii njoisii leihumle,

sateichii gomah tingkum teinii luisang luilakle.”

13Inii n-go ngou karoumeigo gopi kangkii kai kasuta

“Gubah ajiilam aito bamlo sii

Saraanii mpoumah Sating gamlui hangninii dakiido tamsang tam makle.”

14Sating gamlui hang ai kada- peipo, teitiileponii? Ahnyiinii Saraa nga ngasii kalei ninado keikapyii karing doutang karam meigo tiiha matu tang karam jangpii mpounii m-mang kabam rangii teile.

Currently Selected:

HEBRUMEI 1: NAG2

Highlight

Copy

Compare