GALATIMEI 4
4
1Nlenii Inii tam leile, katunii, mahtou toutang karampii teinii tiimasii kaleita teinii ahnii mahlyii- hang go kasangpii Apum tiisii jumsii leikado, kikaleimei hangninii doito mahkado thamki makle. 2Nlenii pfiinii retkabam leimik tei gongtang kasuta ahnii katingmei ninado mahbam kajumei kang nkangsii leile. 3Teitakumpii nyiinii tiina kaleidou sazyii pouryiigo apum tiisii kalei rangiihang kang nkang matusii nyiigodo paineisii kaibamle. 4Nlenii kadou tinglang tei kagong kak, Saraanii mpounah sapfii mpougo lang m-mangpyiile. Mpounii meinah sapfii mpou hangninii tiisii gongle, sateichii Jehudimei mah ajaiting- shang kangto lungle, 5dapokii ajaitingshang kangto kalei meigotei kalei mpatpyiisii, Saraa nah sapfiimei hang tiimatu tang karam jangpii,
6Gonyii ai mpounah sapfiimei hangle katu mangoutang karam jangpii “Abba! Gu Pfii!” Sii saa ka-mpat, mpounah sapfii mpoumah rangii tei Saraanii gonyii lung kikii langkai pyiitakle.
7Teipiinii gonyiinii kikaleimei taisutakle, nlenii nah sapfii mpou tei takle; sateichii nah sapfii mpou teileponii, Saraa paito mahtou katou teido takle.
Galatimei jangpii Polnii kamaning
8Gonyiinii Saraago tisupiinii kalei karei tinglangki, nunuto sara kasuhang go gonyiinii maningsii leile. 9Nlenii aitoinii gonyiinii Sa- raago tigong takle, nle, teidoito kisii Saraanii gonyiigo tigong taklepokii, kasui ninado ka-nkhii rangii hang datei kada takumpii gonyiinii nryiigong loitupo? Teikito nlailoisii gonyiinii kikaleimei katii tei mareipo? 10Gonyiinii leimik sakhii tinglang ninado tingkum hang ryiile.
11Inii gonyii jangpii tha katii tei kadak taklesii Inii gonyii jangpii hingle.
12Kangsanamei, Inii gonyiigo khangleile, Gu takumlo, kadapokii I-do gonyii takumle. Gonyiinii n-gu makado tiima makle; 13nlenii gonyiinii tile katunii, gupum kasui jangpii karei tinglangki Inii gonyii dakii kabi rasam tam ralipyii takle. 14Sateichii gupum katii teipii gonyiigo jaikaju hangninii katii tei gonyiinii maning kamala mak-kii mazhii kasu tiisii makle; nlenii sating gamlui hangniniigo takumpii, nle, Krista Jisu sekgo takumpii gonyiinii n-gu lukaipyii takle. 15Gonyiinii hangkapii ka-ntatei kada takumpii tutakpo? Gonyiinii gonyiimah mik katangdo lat mpat tobui leponii, lat mpat tosii gonyii mah mik katangdo n-gu pyii kabui takumpii leilesii Inii tam wobuile. 16Teitiileponii, gonyii dakii kasang tam kalei teipii Inii gonyiimah angouroumei tiitu takpo?
17Mei kakimei teinii gonyiigo hangkapii lungkaring tei mangousii leile, nlenii ahnyii lungswi teinii bimakle, ahnyiinii kamarei teinii kadapeipokii gudato gonyii aigo paitam tang karam aile kadaponii ahnyiinii gonyiigo lungkaring kabam takumpii ahnyii lungto kalei lungkaring tei gonyiiniido bam matu tang karam jangpiile. 18Kadapokii Inii gonyiigo kaswisii kalei ting- langki roinii supii, tinglang kaleita kabi tha jangpii lungkaring kabam tei bile. 19Lungkasyii gunahmei! Gonyii lungto Krista mah jaitalui tei tiimakhii kasuta pwinii nah kamanaa- ki kamage kalei takumpii Inii gonyii jangpii Kamagesii bamle. 20Sateichii Inii aitoi gonyiigo kaswisii kabam ninado gurok shii kathai tang karam jangpii maningsii leile, kadapokii gonyii jangpii Inii lung kamage takle.
Hagar nei Sarah dato doukalu ndasam
21Ajaitingshang kang nkang kanhyiimei n-gu tampyiilo. Gonyiinii ajaitingshang teinii kada lesii tampo katu gonyii shii makde? 22Kadapokii aitiisii ryiibamle, katunii, Abraham nah sapfiimei hangna leile, hangni- nanii kabang peipwi nahle, sateichii hangninanii bang kasupei pwi nahle. 23Nlenii kikaleipei nah teinii pum taiswisii lungle, nlenii kileikasupei nah tei riishii paikito lungle. 24Aitoinii ai ai Saraanii tiidasii poi mpat kabam nda rasam teile. Ai sapwimei hangna ai Sat tang karam samtam hangna teile, hangninii teinii sinai-zang gamtole, kikalei mei tiimatu tang karam jangpii nah kalung Hagar teile. 25Arab sazyii kito kalei Sinai zangtung tiisii kabam Hagar ai aitoitoi kalei Jerosalemgo raile, daponii lupeinii mpoupei nahmeihang go pangsii kikaleimei tiisii bamle. 26Nlenii longryii lamto kalei Jerosalem teinii mpou rangra katii peile, sateichii mpoupeinii nyii pwile. 27Kadapokii aitiisii ryiibamle
“Nah kaga sapwimei hang gonyii ntalo nah kalungmah mage dousang doukasu sapwimei gonyii ka-ntapii karuk karangsii saalo;
kadaponii naanii toisang toikasu sapwi mpei mah nah sung mpoupei roinapiinii kalei sapwi mpei mah nah teinii kisii moitangle.”
28Aitoinii kangsanamei, nyiinii Isak takumpii riishii tiikabam mah nahmei hangle. 29Nlenii pum zai taiswisii lungkalu ahgo teitinglang ki kaset kalak kapyii takumpii, aitoido teitiisii leile, 30nlenii kabi rasam teinii dalesii tampo? “Kikalei sapwi mpei ninado mpoupei nah sapfii mpou gotei baatoi ailo, kadapokii kikalei sapwi mpeinah sapfii mpou teinii kileikalupei nah sapfii mpougo kaswisii pfiimah mahtou tei dou njoilakle.” 31Teijangpiinii kangsa- namei, nyiinii kikalei sapwi mpei mah nahmei makle, nlenii rangra katiipei nahmeile.
Currently Selected:
GALATIMEI 4: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
