IPISAMEI 5
5
Kava kito kalung
1Gonyii ai Saraamah lungkasyii nahmei katu taiswisii, gonyiinii mpougo njoitang karam tei tiitang karamle. 2Sateichii Kristanii nyiigo lungsyii pyiisanii, nyii jangpii mpou- mah pumsekpii pyiitoi tang karam manam kabi pot hangninii tiisii, Saraa dakii karat kapyii takumpii gonyiinii lungkasyii kito tatpyiilo.
3Gonyii ai Saraago kamalum mei katu taiswisii, sapwimei sapfiimei mah kashyii kahong tha katii, mak-kii matei kasu, mak-kii lukanyii mah samlat katangdo tamlak tang karamle. 4Gonyii kak kito tamjyii kasu katham karaam sam, kapang kamang sam, mak-kii dok tiikasu sam tei gasii, teitungpii gonyiinii Saraago hakalang tei pyii matulo. 5Gonyiinii ai tigat tolo, katunii kashyii kahong tha katiimei, matei kasu, mak-kii lukanyii... (kadapokii lukanyii ai tingtugo kariita hang- niniile) mei teinii Saraamah ninado Kristamah sagong sazyii kiteito njai dousang doulakle.
6Kapang kamang sam hangteipii gonyiigo meikaniido chuisii tamsii hem maluwo sulo; kadapokii katam swikasumei hang phyiiryii Saraa mah rakarhii gongliit tang karam teinii ai kakum hang jangpii sekle. 7Teijangpii gonyiinii ahnyiigo nja sulo. 8Kadapokii tinglang kareiki gonyiinii kamyii kito leile; nlenii aitoinii Bangpii zei kito gonyiinii kava kito leitakle, teijangpiinii kavamah nahmei takumpii tatlo. 9Kadapokii kavamah riiti teinii kabi, kasang ninado kamajyii hang kito doule. 10Sateichii Saraanii kadapei mareipo katu tei tikabui tiilo. 11Sateichii riiti mati kasu kamyii- mah tha hang kiteito njai poihai sulo, nlenii teitungpii kama tei laat mpat matulo. 12Kadapokii ahnyiinii makumpii tiikalei tha hangtei tam mpat tang karam katangpiinado nroule. 13Nlenii tam mpat katu hangtei kavapii tam mpat matule, kadaponii tam mpat katu tha hangtei kavale. 14Teijangpii aitiisii tamle,
“Gungkhii wolo; O, ziitsii kalei nang,
sateichii katai kiteito ringkhii wolo,
sateichii Kristanii go phyiiryiito vapyii tangle.”
15Teipiinii gonyiinii lungkalei tiilung tei machyiigat wolo, kapang kamangmei takumpiinii lung sulo; nlenii kasakaimei takumpiinii lunglo. 16Gonyiinii kadou tinglang kabi hangtei kabi tha tiisii jum matou wolo. Kadapokii tinglang ai bimakle. 17Teijangpii gonyiinii kapangmei tiisulo, nlenii Bangpiimah kamaning kamarei tei kadapeipo katu tilo.
18Gonyiinii tiimagasii kalei, jou tei sak panhii sulo, nlenii rangiipii tokryiilo, 19hangninanii hangniniigo tam kamatoi lhii hang teipii, lhii teipii, sateichii rangiimah lhii hang teipii kake kalatlo, sateichii gonyii lungto tam kamatoi teipii njasii Bangpii dakii lhii tei tiilo. 20Nyii Bangpii Jisu Krista zei kito Pfii Sa- raago mahlyii hang jangpii tinglang kaleita hakalang tei pyiilo.
Nounahmei
21Kristago dzyii ka-nrou kito gonyii hangninanii hangninii kang nkanglo.
22Noumei Bangpii kang ka-nkang takumpiinii, gonyiinii gonyii naamei kang nkanglo. 23Kadapokii Kristanii Charsh phyiiryii kasat takumpii naameinii noumei phyiiryii satle, sateichii Kristanii mpou pum Char- shgo keikapyiipii teile. 24Charshnii Krista kang ka-nkang takumpii, noumeiniido mahlyii hang kito ahnyii naamei kang nkang matulo.
25Kristanii Charshgo lungkasyii ninado mpoupei jangpii mpoumah karing tiilung kapyii takumpiinii, naamei, gonyii noumeigo gonyiinii lungsyiilo. 26Dwi kito shyiisii tii- matei kalei tai charshgo Saraa dakii pyiitoi tang karam jangpii, mpounii ai ai tiile. 27Katunii, mahlyii hang kito mpoumah ngoukabi...kamatei ninado kama kaga, sajek kaga mak-kii ndouliit liit katu, mak-kii kaki kaki bimasang kasu tei gasii mpouda sek-kii pyii matu tang karam jangpiile. 28Ahnyiinii ahnyii pumgo lungkasyii takumpii, sapfii- meinii ahnyii noumeigo lungsyii tang karamle. Mpou nougo lungkasyii sapfii mpou teinii mpou roinapii mpougo lungsyiile. 29Kadapokii meikaniido mpou pumgo ngou karou gale, nlenii chiitak gwisii jumatou leile. Kristaniido tei takumpii tiipyiile. 30Kadaponii nyii ai mpou pum mah njai nsang nsang teile. 31“Kaang aijangpii sapfiimei hang- ninanii mpou pwi mpou pfiigo toi aisii mpou nougo kaswisii kang hangninii tiitangle, sateichii hangna tei pum hangninii mitangle.” 32Samkang hang ai Krista ninado Charshgo tam leile katu Inii kati, kasang kamakum kathok samtei kabi rasam aiki aito mati mangoupyii takle. 33Nlenii samkang hang ai gonyii godo tam leile: Mpou roinapii mpougo lungkasyii takumpii naamei hangnii mpou mpou noumeigo lung- syii tang karamle; sateichii noumei hangnii mpou mpoupei mah naameigo sadzyii ngariit tiitang karamle.
Currently Selected:
IPISAMEI 5: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
