1 TIMOTHI 5
5
Kamalum mei dakii tiitang karam daitu
1Katingmeigo n-gisulo, nlenii mpougo go pfii takumpii, sapfiimei karanumeigo gosanamei takumpii, 2sapwimei katingmeigo pwimei takumpii, sateichii sapwimei kara- numeigo go taipwi takumpii lung matei sageisii katwikai pyiilo.
3Kamipwimei tiisii kaleimei hang go sadzyii ngariit tiilo. 4Nlenii kamipwimei hangninanii mpoupei taa nahmei leileponii, taa nahmei teinii ahnyii kikalung mpung ki sek teito reipii dormomah tingnei ting- neikii tiikamajyii tha tei tiirali matusii ahnyii pwi-pfii ninado ahnyiipei paomei dakii ruitang karam tei rali matulo, dapokii ai ai Saraamah mikjot kito kamazhii teile. 5Mei kado jukasei kaga, mpoupei roinapii kalei kamipwimei teinii mpoupeimah maning kamalum tei Saraa dakii satsii ninado taksupii riitasii mpoumah tiikaha tei tinghum tingna khangsii leile. 6Nlenii mpou- pei roinapiinii kasamou kiteikii pyiisii kalei kamipwipei teinii mpou- peinii ringsii leikado, mpoupeinii taitakle. 7Mei kaniido ahnyii dato kama tei doukasu tiisii, sam hang ai ahnyiigo tampyiilo. 8Nlenii mei kata hangninanii ahki kalungmeigo, rou- tiisii ahki kalung mpungmeigo jusu- leponii, ahnii kamalum tei mazhii kasu tiitakle sateichii malum kasumei sungdo ahnii kisii shyiitakle.
9Tingkum reksiirok tangkasu kamipwimei kata hangninii kagodo kamipwimei mah safiiki teikii fiikaihai matu sulo. Teiphyiiryiito mpoupeinii kalak tiibinii roitang karamle. 10Sateichii mpoupeinii tha kabi hang jangpii zei katat katunii, mpoupeimah nahmeigo tiigatpii makot kamakhii, juti kasu saba- meigo pyiichii kaleimeigo tiikaha, sateichii mahlyii hang kito mpoupei roiniipii kabi tiitang karam jangpii lungswi pyiisii leileponii, mpoupeigo kamipwimei mah safii kitei haimatulo.
11Nlenii karanu kamipwimei mah safii kiteikii fiikaihai sulo, kadapokii ahnyii pumzaimah kamarei ka-ntha teinii ahnyiigo kalakna tiimatunyii sek-kii, ahnyiinii Krista dato tat nrek tule. 12Teitiisii ahnyiinii mpou dakii kareiki riishii tiikabam tei tiikapat jangpiinii kakui kama tei ahnyiinii doule. 13Teiphyiiryiito ahnyiinii ki hangninii kito ki hangninii ki tatpat tatliitsii ahnyiimah tinglang tei mahatsii tiikakadak tei ralitule, sa- teichii kamahat teiroi supii, ahnyiinii tamlak tang karam sam tamsii, kasampei sateichii siiha kahapwi teido tiitule. 14Teipiinii nyiigo ngou karoumeinii nyiigo tam mashyii tang karam jangpii bam pyii kasu tiisii, pumzai lamto karanu kamipwimei hangteinii kalakna katii, athiinaa kalung, sateichii ahnyii ki kalung mpung go ju kamatou tei Inii mareile. 15Dapokii kamipwimei kangkanii seitan tai switang karam jangpii nreksii tat tutakle. 16Ka- malum sapwimei kata hangninii kilung kamipwimei lei leponii, mpoupeinii ahnyiigo tiiha matulo, sa- teichii charshnii kasang kamipwimei hang go tiiha kabui tiisii, charsh go tiimaswi matu sulo.
17Doimajang katat tha tiigatpii tiisii kalei katingmeigo, routiisii samtam kito ninado katam karali kito tiigatpii tha tiisii kaleimei hang go njai hangna tiisii sadzyii ngariit katii tei tiimajyiilesii maning matulo. 18Kadapokii kabi rasam kito tam le, “Tchii padiit matusii kalei twom madang go nangnii mwi peinei sulo, sateichii tha katiimei teinii mpoumah magemai tei doumajyiile.” 19Meihangna hangtum mah sakchyii tei supiinii katingmei hangninii phyiiryiikii tamkai kapyii samtei poisulo. 20Mei kakimeiniido hing kabui tiisii, kem tiikalei katingmei gotei meihang doito duilo.
21Meiju jusii kagu kaphang mah kado tiisupii, reipii samtak katii tei haisupii nangnii sam hang ai ryiikabui tiisii, Saraa doito, Krista Jisu doito, sateichii kalai kalumei hang doito Inii godakii pyii leile. 22Mei hangninii phyiiryii kado kalangsii bah poikaipyii sulo, mei kakimeimah kem hangmah njai teido dou njoisulo, go roinapii n-go matei sageisii mbamlo.
23Nangnii rani jatjatsii kalei taiswisii, gomoigo tiiha tang karam jangpii, dwi roinii sak sulo, nlenii jou chengniikii saklo.
24Mei kangka mah kem kama hang teinii ahnyii doi reisii samtak tiikasunato tiigatpii laatle, sateichii mei kangkiimah kem kama hang- teinii kanakinii ngoule. 25Teitakumpii tha kabi hangtei ngoule, sateichii mangou mak kido kabaipeiwo lakle.
Currently Selected:
1 TIMOTHI 5: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
