ZEFANIA 3
3
Jerusalem sualna le saninzôkna
1Tehelzong ngai le porinche,
opbe hmang khopui chung kha a rik e!
2Hnukirhâi kha zôm maka;
halirchûna pom maka;
Rengpa kha iam maka;
a Pathian tiang nâi nuam ma.
3A sûnga a hruaituhai kha kâmkeibaknei inrûm lai an nia;
a roirêltuhai kha khohloi tianga ine an nia;
a tûk dêna insoi hrang ite hôi mahai.
4A deipuhai khom kha mi huang hmang le mi hmangnaboi an nia,
a ochaihai rêk khan hmun irthiang kha an porinchetir tâka,
Pathian dân kha an nuam lam lamin an inkôktir ngai.
5A sûnga khan Rengpa kha mi dik a nia;
siatna tho no ni;
zîng tinin a roirêlna kha an langtira,
lôipai ngai maka;
aniachu mi felloi khan inzakna lam reng inhre mah.
6Namhai kha kin boipaia,
an kulhai ten khom kha a ram chit tâka;
an kholai dunghai kha kin siatpai zita,
tukhomin hro ta mahai;
an khopuihai kha insiatin a oma,
khanchu mi om ta mahaia,
a luatu khom om ta mahai.
7Nangin ni chi photin lân,
halirchûna hi lei pomin lân;
khanchu ama chungchânga ki inkung murdihai ang khan a omna kha inboipai pat ni no nia, ki tia.
Khannisian zînga an thoia,
an thiltho murdi an tho’nchâi zit tâka.
8Khasikin râllâk la hranga ki thoi ni dênin ni nghâk roi,
ti hi Rengpa thu suak a ni.
Ki thil tum kha an chunga ki ninginmurna ichiom tak kha insum hranga inlalna ramhai irbuktira namhai koi buk hi a nia;
irnêng murdi hi ki khôkmâkna meia a la ikâng fâi zit hrang a ni.
9Kha tika chu mipuihai kha hmûr irthiang irputtir nôk ki ta,
Rengpa irhming kha an inzaa anni tiang inthuruala a sin an tho suam theina hrangin,
10Ethiopia dung pên tiang ata ki kuanga ngêntuhai,
ki mi indarhai nâinu khan ki thilinhlan hong la an ti.
11Kha nikhuaa khan ki chunga ni tho’nchâina thiltho sikhaia khan inzak ta no chi ni,
kha tika chu ni sûng ata ni mi,
lârirpâkna raiinfânpuituhai kha la pai ki ta,
ki tâng irthianga hin lârirpâk hrangin om ta no chi ni.
12Ni sûng ata mi inrianghai le denginthei tuanghai kha hôi ki ta,
Rengpa irhming kha iam an ti.
13 #
Thup 14.5
Israel mi la omsunhai khan pualoina tho no nihaia,
milak tho sa no nihaia,
An bâia khom huangna chong om ual hliak no nia:
an fâkin zâl an ta, tûte’n inchitir ta no nihai.
Lômna hla
14O Zion nâinu, zâi ro;
O Israel, khêk rak rak ro;
O Jerusalem nâinu, ni milung murdi’n lômin lân,
raiinfân roh.
15 Rengpa’n ni chungchâng rêlnahai kha a lâkpai tâka,
Ni râl a pai suak ta:
Israel inlaltak, Rengpa khom kha ni chunga a om e:
Thil saloi chi ngai ta no chi ni.
16Kha nikhua khan Jerusalem
kuang, chi no roh,
O Zion, Ni kut khom irzal no ri se, ti an ti. 17RENGPA ni Pathian kha ni chunga a om e,
Saninhringtu hrang mi hrât tak kha:
Lômin ni chunga raiinfân a ta,
a lungthungna inthartir a ta,
hla sakin ni chunga lôm a ti. 18Nangmaa mi, inkhômpuia
kop phâk loia beiindonghai kha,
hruai khôm ki ti, nangma sika
hrilinsiatna puakrik pêltuhai kha. 19Irngai ro, kha tika chu nang
ngaisaktu murdi kha ngaitua ki ti.
Khan, ke’nbâi kha saninhring ki ta,
Inhnotpaia om kha hruai khôm ki ti,
Khan, irnêng chung murdia lei mualinphoina kha,
Inpâkna le irhming inthangnaa inchangtir ki ti. 20Kha tika chu nangni hruai lût ki ta,
kha tika nangni hruai khôm nôk ki ta:
Nin ihmu ngeia nin sal intângnaa ki’rheikîr tika chu,
Irnêng chung murdihai laia
Irhming inthangna le inpâkna nangni siam pe ki ti,
RENGPA’N a ti.
Currently Selected:
ZEFANIA 3: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
