ZAKARIA 2
2
Irkhîna hrui chôi
1Khan, ki mit ki hong inlêngtira, ki hong ena, mi inkhat a kuta irkhîna chôi hi ki hmua, 2khanchu, keima’n chu, “Khôn mo ni ife hrang?” ki tia. Ama khan ki kuang, “Jerusalem hi a khang i dôr mo a ni, a dung i dôr ten mo a ini inhre hranga irkhî hrangin,” a tia.
3Khan, irngai ta, vântirtôn ni biaktu kha a fe suak ta; khan, vântirtôn dang ama tong hrangin a hong suak saa, 4a kuang, “Intânin lân, hi ruatharte kuang hin,
“Jerusalem hi a mi tam sik le sapâl tam sikin khua inhrukna nei loi anga luan a iom hrang a ni. 5kei hi a vêla mei kul ni ki ta, a laia roiinpui kha ki ini sa hrang a nia,” ti hi Rengpa thu suak a ni.
Sal intânghai kîr nôk hranga ti
6Hong roi, hong roi, hmâr ram ata intân suak roi, ti hi Rengpa thu suak a ni. Irvân phâivua ang dênin kin darhtir tâka, ti hi Rengpa thu suak a ni. 7Hong ta roi, Zion, Babulon nâinu kuanga la om, relpat roh. 8Sipaihai Rengpa khan hiang hin a tia: roiinpuina hrang angzia zêlin nangni an siattu nam kuanga khan a ni tîr a ni: Nangni tôntu’n chu a mit lailên a itôn a ni. 9Irngai roi, ki kut ki inthik khum hrang a nia, anni sinthotuhai râllâk ni mai an ti: khanchu, sipaihai Rengpa khan a ni tîr a nih ti nin la inhriat hrang a ni. 10Zion nâinu, raiinfânin zâi ro, irngai ro, ki zuang e, ni kuang ki ilêng hrang a nia, ti hi Rengpa thu suak a ni.
11Kha nikhuaa khan nam tamtakin Rengpa kha hong zom an ta, ki mihai ni an ti: khan, ni kuanga khan lêng ki ta, khanchu, sipaihai Rengpa khan ni kuang a ni itîr a nih ti nin hriat tâk nin ti. 12Khan, Rengpa khan ram irthianga a dongtum hrangin Juda kha lua a ta, Jerusalem kha lan thang a ti. 13Mi murdihaio, Rengpa makunga khan dâichit roi: Ama kha a hmun irthiang ata a hong thoi tâka, tiin va hril ro, a tia.
Currently Selected:
ZAKARIA 2: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
