ZAKARIA 1
1
Rengpa’n a mihai ama tiang irhei hranga fialna
1 #
Ezr 4.24—5.1; 6.14 Daria inlal kum hnina, tha riatnaa deipu Zakaria kuanga khan Rengpa thu a zuang tunga: 2Rengpa kha nin pahai chunga khan a sân a milunghoi maka. 3Khasikin hiang hin an kuang van sîr ro: Sipaihai Rengpa khan hiang hin a ti, keima tiang hong irhei unglân, kei khom nangni tiang zuang irhei ki ti, ti hi sipaihai Rengpa thu suak a ni. 4Deipu masahaiin, sipaihai Rengpa khan, nin om hrang dân suala atûn hong irhei unglân, nin thilsual kha chu hong irheisan roi, a ti e, tia nin pahai an hril khoma irngaitua loia, mikuar sung loi ang khan om no roi, ti hi Rengpa thu suak a ni. 5Nin pahai kha khôn mo an om? Deipuhai khom kha an hring kumkhua tâk ma ni? 6Ki thu le ki thu’nkunghai, ki siahlo deipuhai kuang, ki pêkhaia khan, nin pahai kha a innang tak khom a ini mo ni ma? khanchu, an hong irheia, sipaihai Rengpa khan kin chungchânga ti a tum ngai angin kin om dân ang zêl le kin thiltho ang zêlin keinia a ti tâk a ni, an ti kha, tiin.
Inlârna sakor hmu
7Daria kum hnina, tha sôm le tha khatna, kha kha Sebat tha a nia, sûn sômhni minlinaa khan Idoa nâi Barakia nâipa, deipu Zakaria kuanga khan Rengpa thu a zuang tunga; 8#Thup 6.2,4 zâna khan sakor sen chunga mi inkhat chuang ki hmua, irhôr irhmûithing kôla hin a ngîra; khan, a hnunga khan sakor, a senhai, a pôlhai a ngoihai an oma. 9Kha khan keiin, “O ki Rengpa, hihai hi i ma ni?” ki tia. Vântirtôn ni chongpuitu khan ki kuang, “Hihai hi imo an ini keima’n nang inentir ki ti,” a tia. 10Khan, mi irhmûithing laia ngîr khan a sâma, “Hihai hi Rengpa’n irnêng murdi irfang suak hranga a itîrhai kha an ni hi,” a tia. 11Khan, anni khan, Rengpa vântirtôn irhmûithing laia ngîr kha a sâma, irnêng murdi kha ei irfang suak tâka, irngai ro, irnêng kha a om chian chiana, a om mai mai a ni, an tia.
12Khataka Rengpa vântîrtôn khan a sâma, “O sipaihai Rengpa, Jerusalem le Juda khopui chunga, hi kum sômsari ni ninginmurnahai hi i dôr ten mo lung ni inkham loi hrang?” a tia. 13Khan, Rengpa khan, vântirtôn, thu satak thu irtharngam om taka ni chongpuitu kha a sâm tâka. 14Khanchu vântîrtôn ni chongpuitu khan, ki kuang, “Hiang hin va insam ro,” a tia: sipaihai Rengpa khan hiang hin a iti a ni: Jerusalem le Zion hi irvei ta takin ki’rveia, 15khan, nam chai nuam mai maihai ata khan a sân ki milunghoi tak tak maka; ki milung hoi loi vai a ni nâkin, anni hranga thil saloi kha an tho’nsual tâk a ni. 16Khasikin Rengpa khan hiang hin a iti a ni: za’rngaina le Jerusalem tiang ki’rhei lai a nia, kha khan ki in kha sin a nia, ti hi Sipaihai Rengpa thu suak a ni: khan, Jerusalem chunga khan irkhîna khianghrol kaiinding ni a ti. 17Hiang hin sipaihai Rengpa khan a ti e, ki khopuihai kha irhniangna sikin chuai nôk an ta, Rengpa khan Zion kha irtharngam nôk a ta, Jerusalem kha inthang nôk a ta, tiin van sam nôk ro, a tia.
Inlârna sehrât irki hmu
18Khan, ki mit ki hong inlêngtira, ki hong ena, irki minli ki hmua. 19Vântirtôn ni biaktu kuanga khan, “Hihai hi imo a ini?” ki tia.
Khan, ama khan, “Hihai hi Judahai, Israelhai, Jerusalem-hai indartirtu hi an ni hi,” tiin a ni sâma.
20Khan, Rengpa khan thîrsu minli a nin entira. 21Khanchu keiin, “Hihai hi imo hong tho hrang an ini?” ki tia. Ama khan, “Sohai so tûte hong tang suak ngam rêng om ta loi dôra, Judahai indartirtu kha an nia; khannisian hihai hi, anni indôptir hrang le Juda ram indarh hranga an nia an irki hong hmangtu namhai irki kha paithâk hranga hong an ni hi,” tiin an sîra.
Currently Selected:
ZAKARIA 1: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
