HLAHAI HLA 2
2
1Saron rama rose pâr le phâizôla lili pâr chu ki ni.
Ruatharte
2Ki lungdi chu nupang murdi laia,
ilhling kâra lili pâr ang a ni.
Dôngmate
3Ram hnuaia thing tin laia apple thing angin,
ki lungdi chu ruathartehai laia a ni;
a dâihlîm hnuaia ki toi nuama,
a rahai khom ki bâi ta hrangin thum tak a ni.
4Khanchu a hruaithena hmuna a ni hruaia,
Ki chunga lungkhamna puanzâr chu a târa.
5Ki hrâtna chu grep em inchârhai leh khan siam intharin lân,
apple rahai leh nin hartir ro,
Lungkhamna chu donsûl angin ki thêm tâk sikin.
6Ki lungdi vei kut chu ki lu hnuaia a oma,
a chang kutin a nin kuaa.
7O, Jerusalem nâinuhai nangni ki ngên,
Sarza le sazuktuaihai irhmingin chong inkung roi;
kin irditna nin buai loi hrangin.
Hla inhnina
Dôngmate
8Ki lungdi hla inhnina irhâi ki inhriata,
keima tianga hongin,
mualpui lianpahai khom paltanin a ni hong pana.
9Ki lungdi chu sarza le sazuktuai ang a nia,
irngai roh, bang kôla khan a ngîr chiana,
tukver rengata a hong thîra,
Khuangpuiirhuan bang kâr ata a ni hong vênga.
10Ki indit takin hiang hin a tia.
Hong roh ki indittak ki lungthung,
ki kuang hong roh.
Ruatharte
11En ta, phalbi chu a hong hek ta,
rotho khom a hong mong tâka.
12Rama pârhai an hong irmuam tâka,
hla sak zoro a hong tung ta,
vasuhai inkur irhâi rama inhriat thei a ni ta.
13Theipuihai khom a hong hmin irphut thiai tâka,
phâivua chu grep pârvâng mirimin a sipa,
Khasikin o, ki indit tak ki lungdi,
hong roh ki kuang hong roh.
14Nang chu lungpui kâra vasu irbîk ni anga,
ni hmêl inditom tak ni’rhmutirin lân,
ni hnuk hoitak nin hretir ta roh.
15Sihalhai, sihal chînhai chelpaihai roh,
ei grep irhuan pâr vâng lai tak hi an insiat mân hin.
Dôngmate
16Ki lungdi chu ki ta a nia,
kei khom ama ta ki ni,
a belra pâlhai chu lili
pâr bila an lêngtirhai ngai.
17Zîng khorthi dâi a hong thoa,
zân a hong inthim nôk mâka chu,
Ki lungdi chu sarza le sazuktuai ang dênin Bether tâng chunga khan kîr nôk roh.
Currently Selected:
HLAHAI HLA 2: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
