INPÂKNA HLAHAI 73
73
BU THUMNA
(73—89)
Pathian dikzia
Asafa inpâkna hla
1Pathian chu Israelhai chunga a sân a sa mai,
Milunga irthianghai chunga khan.
2Khannisianlân keima’n chu ki sir inchâi vâng vânga;
Ki ke pêthai hi ar pil vâng vâng a ni.
3Mi pualoihai vânneizia ki hmuin,
Mi irsonghai chu ki’rzuka.
4An thi lai khan tuangna zel nei mahaia;
An hrâtna chu a det uala.
5Mi dang anga intakin om mahaia;
Mi dang anga soisakin om ual mahai.
6Khasikin lârirpâkna khan thîrhrui angin an ringa an zêla;
Nunrôngna chu silkai angin a tuama.
7Mar sikin an mit a pônga:
Milunga thu nuamlam nêka irkhêl an neia.
8An innuisana, sual takin nêpsiana thu an insîra:
Lârirpâk takin an chong ngai.
9An bâi chu irvânhaia khin an siaa,
An milei chu irnêng hi ar fang suam ngai.
10Khasikin a mihai chu khataka khan an kîr nôka,
Tui khilâta sip chu an inpai ripa.
11“Pathianin itin mo inhria a ta?
Anchungtakin inhre suak hrang ma ni?” an tia.
12En ta, hihai hi mi pualoihai an ni hi;
Nuamning taka om maiin an irchong tîr tîr ngai.
13A ni, mâkana zelin,
ki milung hi an fâitira,
Ki kuthai sêlna boinaa ki irsûk a ni.
14Sûn sôtin soisakin ki oma,
A nitin halirchu’n ki oma.
15“Khaang khan insîr ki ti,” hong ti ta inlân;
Irngai ta, ni nâihai irlo chunga vârirlet taka tho hong ni ki ti.
16Kha kha kin hriat theina hrangzia ki ngaitua’n,
ki hrangin a intak hrai a ni.
17Pathian hmun irthianga lût ki ta,
An mongna hrang chu ki ngaitua mâka chu.
18Anni chu hmun irnâl takhaia ni siaa:
Siatnahaia ni paithâk ngaia.
19Ithoa mo mitkhapkâra an iramchit tâk mani o!
Thil irkhêl takhaia inboipaiin an iom ta a ni.
20Zâna irmang khua a vâra a iboi ngai angin,
O Rengpa, ni meng tikin anni chu irhmangtirhai ro.
21Ki milung hi a beiindonga,
Ki lungrîla khom isun angin ki oma:
22Mi’nmôl le ite inhre loi ki nia,
Nangmaa khan ramsa ang chian ki ni ngai hi.
23Khannisianlân ni kuanga ki om maia:
ki kut chang tiang hi ni lei chel ngaia.
24Nangin ni lei inkungna’n ni hruai ni ta,
Kha zoi tika chu roiinpuinaa khin ni lôm a ti.
25Irvâna khin nang no chu tu mo ki ini?
Irnênga khom hin nang no chu ki inuam tûte om mahai.
26Ki taksa le ki milung hi a’rzal tâka:
Khannisianlân Pathian chu kumkhuaa ki milung hrâtna hrang le ki dongtum hrang a ni.
27Irngai ta, nangma ata hlataka omhai chu an irhmang hrang a ni:
A uiresantu murdi chu nir hmangtir ta.
28Keima ta hrang rêkin chu Pathian nâi hi a isa a ni:
Rengpa Pathian chu ki inzôknaa ki hmanga,
Ni sintho murdi thu ki hril theina hrangin.
Currently Selected:
INPÂKNA HLAHAI 73: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
