INPÂKNA HLAHAI 74
74
Nam san hranga ngênna
Asafa Maskil
1O Pathian, ithoa mo kumkhua hrangin ni ni ipaithâk?
Ithoa mo ni sa vâina hmuna belrahai chunga hin ni milung a ir-ût mai?
2Ni mihai inkhômhai,
tianlaia ni irchôk,
Nam irchon hrangin ni irtan kha, inhre mai ro;
Ni omna ngai Zion tâng le.
3Siat chit tâk chu hong irfang ta,
Doituhai hmun irthianga khan thil sual tinrêng an tho tâk hi.
4Nangma doituhai ni mihai inkhômhai laia an khêk mur mura;
An irsinsianahai chu irsinsiana hrangin an târ tâka.
5Mi, rampuia thing Hreipuia phûrhai angin an inlang.
6Atûn chu a thil sin enhoihai murdi chu hreite le mârtûlhaiin an insiathai tâka.
7A hmun irthiang chu an hâla;
Ni’rhming omna chu irnênga ngîm rak ang dôrin an ûm tâka.
8An lungrîla chu, “Insiat zithai ei ti,” an tia.
Hi rama Pathian inkhômna in murdi hi an hâl siat zoi tâka.
9Kin irsinsianahai chu hmu ta ma unga;
Deipu rêng rêng kin laia om mahai.
10O Pathian, doitu’n chu i dôr ten mo nang a hril insiat hrang?
Râlin chu kumkhua’n nang a insîr insiat hrang ma ni?
11Ithoa mo ni kut, ni kut chang tiang kha mi ilâk mo an tia?
Kêlsua nôkin lân, inboipaihai roh.
12Khannisianlân, Pathian chu tianlai ata ki Reng a ni,
Irnêng inlâina taka saninhringna siam ngaitu chu.
13 #
Fes 14.21
Nangma’n chu ni hrâtna’n tuikhanglian kha a’rsentira:
Nangma’n chu tuia dragonhai lu kha nin khoitira.
14 #
Job 41.1; Ipn 104.26; Isa 27.1 Nangma’n chu Levia thân luhai chu nin khoi chita,
Ama chu ramchâra mi omhai kuang khan bu ngheiin ni pêka.
15Nangma’n chu tuihnârhai le tuipûthai nin pût suaktira;
Nangma’n chu tuipuihai nin kangtira.
16Sûn hi ni ta a nia,
zân khom hi ni ta a ni;
Nangma’n misa le tha ni siama.
17Nangma’n irnêng ramri murdihai nin rêta;
Nangin fûr le sâl nin omtira.
18O Rengpa, hi hi inhre mai ro,
doituhai khan nang an hrilsiata,
Pathian ngaisak loi mihai khan nir hming an insîr insiat ngai.
19O, ni vasu hringna hi ram sahrâng kuang khan pe viat no ro:
Ni mi inrianghai hringna hi kumkhua’n irnghil no ro.
20Thuthung kha zuang ngaisak ro:
Irnêng hmun inthim laihai chu nunrôngna omna’n a sip tâka.
21O, nêpsiana tuanghai chu mualinphoiin inom no’n lân;
Inrianghai le farahai khan nir hming inpâk ri sehai.
22O Pathian, thoiin lân,
nangma thu chu ni bingin insîrin lân.
Mi’nvêtin chu sûn sôtin nang a insîr insiat kha inhre mai roh.
23Nangma doituhai irhai chu irnghil no ro:
Nang a doituhai irhai irse mer mur chu a hong intông mai ngai a ni.
Currently Selected:
INPÂKNA HLAHAI 74: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
