INPÂKNA HLAHAI 59
59
Zôkna ngêna chongchai
Hla hruaitu hrangin; Al-tashhethsak hrang Davida inpâkna hla; Miktam: Saula’n mi a tîra, ama that hranga a ina an inruang laia
1O ki Pathian, a ni doituhai ata ni saninzôkin lân:
A ni beituhai ata hmun irsânga ni bâng ro.
2Thil tho’nsualtuhai ata ni saninzôkin lân,
Thisen insuak songhai ata ni saninhring roh.
3O Rengpa, ki porinchena sik ni loiin,
Ki sual sika ni ual loiin,
Irngai ta, ki hringna hi an inruang maia,
Mi hrâthai chu ni bei hrangin an ipung khôm a ni.
4Ki sual no khomin an intâna, an irsinsiama:
Ni changpui hrangin irkai inharin lân, en roh.
5O Rengpa, sipaihai Pathian,
Israelhai Pathian, Nangma ngei chu nam tinrêng hro hrangin thoiin lân:
Mi vârirlet sual takhai rêng rêng chu lunginkham no roh.
6Khohloi tiang an hong nôka, ui angin an inrung mura,
Khopui chu an vêl an vêla.
7Irngai ta an bâiin an inmûk suaka;
An hmûra khan khandaihai a oma:
“Tu mo inhriat om?” an ti maia.
8Khannisianlân O Rengpa,
nangin anni chu innuisan ual ni ta;
Nam tinrêng chu innuisan a ti.
9O a nin hrâttu, nang nghâk mai ki ti,
Pathian chu ki kulpui irsâng ni ni.
10Ki chunga lungkhamna Pathian khan ni nghâk a ta:
Pathianin ki râlhai chunga ki thu nuamlam chu nin hmutir a ti.
11Anni chu thatpai no ro, khano’nchu ki mihaiin nang irnghilna an ti:
O Rengpa, kin pho tak,
Ni sinthotheina’n indartirin lân, irhniamtir roh.
12An bâi sualna sik le an hmûra thu suak sikin an lârirpâkna ngeia khan in-ôk ri sehai.
An thu’nsîr ngai lak khua sâlna le milak thu sik khomin.
13Annihai chu ninginmurin inboipaiin lân,
an om ta loina hrangin inboipaiin lân:
Pathian Jakoba-hai kuang roi a rêl ti inhre ri sehai, Kôlkung dênin.
14Khan, khohloi tiang hong nôk sianlân,
Ui angin inrung sianlân,
Khopui chu vêl vêl ri sehai.
15Anni chu fâk hrang zongin irvâk irvâk an ta,
An khop no’n chu zân khosôtin om an ti.
16Khannisianlân kei chu ni hrâtna thu hi hlaa sak ki ti;
A ni, zînga chu ni lungkhamna thu raifân takin hla’n sak ki ti:
Nang chu ki kulpui irsâng,
Ki lunginzîng nia ki saninzôkna ni ni ngai sikin.
17O a nin hrâttu, nangma inpâkin zâi ki ti:
Pathian chu ki kulpui irsâng,
ki chunga lungkhamna Pathian kha ni ni.
Currently Selected:
INPÂKNA HLAHAI 59: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
