INPÂKNA HLAHAI 51
51
Ngaidam ngênna
Hla hruaitu hrangin; Davida inpâkna hla; Batsebi a pôl zoia deipu Nathana a kuang a hong laia
1O Pathian a sân ni lungkham lianna sikin lung nin khamin lân:
Nin renna irkhêl sikin ki porinchenahai hi kâtpai roh.
2Ki siatnahai hi ni’rsunfâi zitin lân, Ki sual hi nin fâi roh.
3Ki porinchenahai hi kin hriat tâka:
Ki sual hi ki makunga a om mai ngai a ni.
4 #
Rom 3.4
Ni chunga, ni chung vaia thil ki tho’nsuala,
Ni mithmua thil ki lei tho’nsual tâka:
Thu nin sîrin thiam ni chang theia,
Roi ni rêlin sêlnaboi ni ni theina hrangin.
5Irngai ta, pualoinaa dên ki oma;
Ka nu’n sualin a ni vonga.
6Irngai ta, sûngrîl tianghai hin takna ni nuam ngaia:
Khanchu inlang loina tiang hin vârna nin hretir ni ti.
7Husopin nin fâiin lân, khanchu fâi ki ti:
Ni’rsûk infâiin lân, khanchu vur nêkin vâr ki ti.
8Raifânna le lômna chu mikuarin nin hretirin lân;
Ni ru inkhiakhai hi a râi a fân theina hrangin.
9Ki sualnahai ata hi ni hmâi thupin lân,
Ki siatna murdi hi kâtpai roh.
10O Pathian, keimaa hin milung irthiang tak siamin lân;
Ki phîng sûnga hin irtha diktak siamthar nôk ro.
11Ni kuang ata ni pai irhmang no’n lân;
Ni’rtha irthiang hi ni lâkpai pe no ro.
12Râifâna ni ni saninhringna kha ni pe nôkin lân:
Nangma thu zôm nuam hrangin ni siam roh.
13Khanchu tho’nsualtuhai chu lampui thurchihai irchutir ki ta;
Khanchu, mi sualhai chu ni tiang irhei nôk an ti.
14O Pathian, nang ni saninhringtu Pathian,
thisen suaknahai ata ni saninzôkin lân;
Khanchu ki milei hin ni felna thu,
raifân takin hla’n sak a ti.
15O Rengpa, nangin ki hmûr hi inhongin lân;
Khanchu ki bâi hin nang inpâkna kha a inhriattir hrang a ni.
16Irbôlna chunga lômna nei mak chea;
Khaang kha ni no sianlân chu nang pe ki ti:
Hâlirvôm thilinhlan chunga lungchukna zel nei mak che.
17Pathian nuamlam irbôlnahai chu irtha milung koi hi a ni.
O Pathian milung insiat le irsîr ngôi ngôi hi hmusit ngai mak chea.
18Ni nuamlam takin Zion chunga thil sa tho’n lân;
Jerusalem kulhai chu inding nôk roh.
19Khanchu felna irbôlnahai chunga lômna nei ta ni ta,
hâlirvôm thilinhlan le hâlirvôm pumirhlan chunga khan:
Khanchu ni maichâm chunga khan sehrâtchalhai inhlan ta an ti.
Currently Selected:
INPÂKNA HLAHAI 51: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
