INPÂKNA HLAHAI 50
50
Pathian chubai mûk dân diktak
Asafa inpâkna hla
1Pathian, itinrêngthothei, Rengpa khan thu an sîra;
Irnêng hi misa suakna ata a tâkna dênin a koia.
2Satirkipna, Zion ata chu,
Pathian chu a vâr suak tâka,
3Ei Pathian chu zuang a ta, dâihrek no ni:
A maton tiang chu mei chok zur zur a ta,
A kôl vêla khan a sate’n phâivopui tho a ti.
4A mihai roi a rêl theina hrangin Chung tiang irvânhai le irnêng hi inhriatpuitu hrangin koi a ti.
5“Ki mi irthianghai ki kuang hong hruai bukhai roi,
Sa thata ki kuang thu thunghai chu,” tiin.
6Khanchu, irvânhai khin a felna chu tâng insampui a ta,
Ama Pathian ngei chu roirêltu a nia.
7“O ki mihaio, irngai roi, thu ki insîr hrang a ni;
O Israel, irngai roh, nang inhriatfiatir ki ti:
Kei hi Pathian, ni Pathian ngei kha ki ni hi.
8Ni irbôlnahai sikin nang halirchu no ning;
Ni hâlirvôm thil irhlanhai chu ki makunga a om chiana.
9Ni in ata chu sehrât chalpa rêng rêng la suak no ninga,
Ni sa hual vêlhai ata kêlchalhai khom la suak hliak no ning.
10Rammuala ramsa tinrênghai hi ki ta a nia,
Mual sâng tamtak chunga ramsa omhai khom kha.
11Chunga vuang murdi khom ki ta an nia,
Rama thilhring khom ki ta an ni.
12Ki phîngchâm khom sian nang hril no ning:
Irnêng le a chunga thil om murdihai hi ki ta a ni.
13Sehrâtchal hmê ki fâkin kêl thisen ki i-in hrang ma ni?
14Pathian kuang lômthu insîr irbôlna kha inhlanin lân;
Ni thu’nkung khom Anchungtaka kuang intung roh.
15Khan, lungzîng nia chu ni koiin lân;
Nang saninzôk ki ti, khanchu nangin ni ni ichôiindôm hrang a ni,” a tia.
16Mi siat kuang khan, Pathianin “Itho sika mo ki thu’nkung hi inhriattira,
ki thuthung hi ithoa mo ni bâia ni sâm mai?
17Sepna hi ni khôkmâka, Ki thuhai hi hnung tiang ni pai maia.
18Inru ni hmu’n a sa ni tipuia,
Uirepahai lak nir hloppui sa ngaia.
19Ni bâi hi sual ni pêka, ni milei hin huangna a siam sa ngai.
20Toi pumin ni urêng ni hrilinsiata;
Ni urênghai ngei kha ni nuiso ngai.
21Khaang thil kha ni thoa, Khannisianlân ki dâihreka;
Khanchu nangma ang chianin ni ni bê ngai:
khannisianlân nang halirchu ki ta,
ni mithmua a dônte’n inlangtir ki ti.
22Nangni Pathian irnghilhaio, hi hi irngaitua roi!
khano’nchu nangni inpot chitna ki ti,
nangni saninzôktu zel om no nihai.
23Tukhom lômthu insîr irbôlna inhlan murdi chu an ni chôiindôm ngai a nia;
Khan, a omlam vong insatu kuang khan Pathian saninhringna nang inentir ki ti,” a tia.
Currently Selected:
INPÂKNA HLAHAI 50: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
