INPÂKNA HLAHAI 49
49
Sum tama irnghat saloizia
Hla hruaitu hrangin; Kora nâipahai inpâkna hla
1Mi tinrênghaio, hi hi irngaitua unglân;
Rammuala om murdihaio, mikuar lei sung roi.
2Mi chîn le mi lian, Mi irchong le mi inrianghai khomin.
3Ki bâi hin vârna thu insîr a ta;
Ki milung ngaitua chu inhriat thiamna thu ni a ti.
4Chongirkhek thua ki mikuar sung ki ta:
Ki thu’nthûk insîr chu perkhuangin hrilfia ki ti.
5Nikho saloihai, ki ke ârtui kôla pualoina chu ni hual vêl khomsian,
Ithoa mo ki ichi hrang?
6Mâni sum tûnga, mâni irchongna a satêna songtuhai chu;
7Tukhomin an urêng khom irtan thei viat no nihaia,
Pathian kuang irtanna pêk pe thei ual hliak no nihai:
8An hringna irtanna chu hlu tak a nia,
Itiklai khomin pêk inchuk thei no ni.
9A hring maia, mongna a hmu loina hrangin chu.
10Mi vârhai khom an thia, Mi’nvêt le mi môlhai khom an irhmang seng senga,
An sum mi danghai an mâk pe ngaihai kha an inhriata.
11An lungrîl ngaitua lam chu,
An inhai kha kumkhuaa om hrang ang le,
An omnahai chu irlo murdi dêna om hrang angin a ni;
An ramhai chu anni irhming zit an irputtir ngai.
12Khannisianlân mihriam hi chôiindômin om mai mahaia:
Ramsa irhmang ngaihai ang dên hi an ni.
13Kha an om lam kha chu invêtna a ni:
Khannisianlân, an hnunga chu mihaiin an thu insîrhai chu a sa an ti ngai.
14That hrang belra Seol-ah khitthunghai ang an ni,
Thina chu a enkoltu ni a ta:
Khua a vârin mi felhaiin an chunga roirêl an ta; an taksa hek a ta,
Seol chu omna in hrang ni a ti.
15Ki hringna rêk chu Pathianin Seol kut ata irtansuak a ti;
Ama’n chu a ni ilôm hrang a ni.
16Ni’rchongtira a hong oma,
A sûngkua roiinpuina chu a hong irkhêl sit sit khomin, chi no ro:
17A thi tika chu ite chôi thei no ni;
A roiinpuina khan a izui hrang ni sa mah.
18A hring laiin a hoiin irbe khom sianlân,
(Hlo a chuk sikin mi’n inpâkhai sian khom),
19A’rchibulhai murdi kuang thinaa khan zom a ta,
Itiklai khom vâr hmu ngai loi rênghai kuang khan.
20Mihriam chôiindôma oma, inhriat thiamna nei ual loi chu,
Ramsa irhmang ngaihai ang dên hi an ni.
Currently Selected:
INPÂKNA HLAHAI 49: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
