THUVÂRHAI 8
8
Vârna inpâk
1 #
Thuv 1.20-21
Irngai ro! Vârna chu a kheka,
inhriat thiamna khan ar hâi a insua mo ni ma?
2Lamlian kôla tâng irsânghaia le lamsuamhaia khan a ngîra.
3Khopui dâimitzîng haia,
kho lûtna mikot suahaia inring takin a khêka:
4O nangni mihriamhaio,
nangni ki ngên;
irnênga mi tinrênghai ki ikoihai a ni.
5Mi’nmôlhai, vârna irchû unglân,
intôhai, inhriatna irchû roi.
6Ki chong satak takhai hi irngai roi;
ki thuhril murdihai hi chu a idik a ni.
7Ki bâia thu suak hi thutak a nia;
milak thu chu keima hrangin khôkmâk om tak a ni.
8Ki bâia thu tinrêng suak hi a idik zit a ni;
thu dik loi le chanlamboi thu ite om mah.
9Inhriat thiamna nei mi hrangin chu a fia zita;
inhriatna nei hrangin chu an tâiteng a ni.
10Tangka sum nêkin ki’rchutirna hi inthang unglân;
rângachak hlu tak nêkin inhriatna hi inthang roi.
11Lunghluhai nêkin vârna chu a sa ual;
thil ni indit murdi leh hrilkhî thei zât om mah.
12Kei hi vârna chu ki nia,
vârna hin omhmun ki khuara,
inhriatna le irngaitheina ki hmu suaka.
13 Rengpa chi chu sual hnôlpai hi a ni;
irpâkna hai, irsongna hai, sual lampui hai
le chong chanlamboi hai hi ki ihnôlpai a ni.
14Thil hi ki ngaituaa,
ki ngaitua suak ngai.
Inhriat thiamna ki neia,
hrât tak chu ki ni.
15Renghaiin roi an rêlna hrangin le hruaituhai dân sa an siam theina hrangin ki changpuihai ngai.
16Keima hmangin hruaituhai murdi’n irnêng chunga roi an rêla,
mi lian le mi roiinpuihai khomin.
17Lung ni thunghai ka chu lung ki thunga;
Takirtâi taka ni zongtuhai khan ni hmu thei an ti.
18Pêk hrang irchon le roiinpuina chu ki nei,
irhniangna le thangsuana hai khom.
19Ki kuang ata nin ihmu chu rângachak satak nêkin a sa uala,
sumtak irthît infâi liai nêk khomin a sa ual.
20Felna lampui ki hroa,
Dikna lampuihai ki zuia,
21lung ni thunghai chu irchon ki pêkhaia,
an inhai chu irchon, sumpuanin kin sip ngai.
22 #
Thup 3.14
“Rengpa khan thilsiam bul takin a ni neia,
tianlaia a thilsiam bul tak chu.
23Kumtuang ata siam ki nia,
irnêng irsiang mân ngeia khan.
24Tuikhanglian la om mân le tuidunghai la om mâna khan ki suak ta.
25Tânghai la om mân le mualhai la om mân ngeia khan ki suak tâka,
26Pathianin irnêng le ramri a siam mân daiha,
nêngpil a om mân daiha khan.
27Irvânhai a siam laia khan ki om tâka,
Tuipui chunga fe theina a siam laia khan.
28Sûmhai irvâna a siahai laiin,
Tuikhanglian hnâr ar hong laiin le
29tuipuia tuihai a iti ban irsôn loi hranga ramri a khang pehai laia khan.
Irnêng lungphûm a phûm laia khan ki iom tâk a ni.
30Kha laia khan, kut theithiam mi angin a kôla ki oma,
a nitin a lômna ki nia,
A kôla raifân takin ki om mai ngai.
31Lêng theina a rammual siama raifân taka omin,
ki lômna tak chu mihriam nâihai chunga a ni.
32“Thoi roi, ruathartehai,
ki thu irngai roi,
ki thupêk zôm unglân nin râlvân sa a ti.
33Irchutirna nin idong kha irngai unglân;
vâr unglân hmusit no roi.
34Mi tukhom ki mikot bula oma,
ki dâi mikot bula oma,
ki dâi mikot bul nghâka,
ki thu irngai chu a râlvân a sa e.
35A ni hmu kai chu hringna an ihmu a nia,
Rengpa inditna khom dong a ti.
36Khannisianlân, ni hmu loi kai chu mânia dûk irtho ni an ta;
tukhom ni hnôl kai chu thina lungthung an ni,” tiin.
Currently Selected:
THUVÂRHAI 8: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
