THUVÂRHAI 7
7
Notizuar huangna
1Ki nâipa, ki thuhai hi inhre maiin lân, ki thupêkhai hi irtik mai roh. 2Ki thupêkhai zômin lân, hring damin om ni ti. Ki dân chu ni mitlailên ni hrung dôra irdînin vong roh. 3Nang ki’rchûna chu zoro tina inkolin lân; ni lungrîl phêka irziak roh. 4Vârna chu ni farnu angin bê’n lân, inhriatna kha ni rual lungthungtak angin bê mai roh. 5Khanchu mi dang dôngmahai ata ni nupang sualhai inthêmnaa irthokin nang inzôk an ti.
Nupang sual
6Voikhat chu ki tukvera irthokin ki thîra, 7ruatharte inmôl tamtak laia ruatharte inhriatna irsam bîk hi ki hmua. 8Nupang inkhat omna kil tianga lampuia khan a fea. An in kôla a thenga, 9khohloi misa tâk hnung zân zîng bupa khan. 10Kha, notizuar irvoa irvo le vârirlet nupang khan a’rtongpuia. 11Nupang inzakboi le tumna inthûk, kil tina chai vêl ngai, 12hmun kilkhôra ngîra, lampuihai le bazar hmunhaia mi irdîp vêl ngai a lei nia. 13Khanchu, ruatharte kha an kuaa, a tuma, ngam takin a ena, a kuang, 14“A vuan hin irngeina thilinhlan ki neia, irbôlna hmêhai ki fâka. 15Khasikin, nangma irtongpui hrangin ki ihong a ni. Nang hmu ki nuama, hin kêng ni lei iom na! 16Ki zâlhmun chu Aigupta ram patzâi irhmi ki’rkhua. 17Ki puantha khom bero hai, aloe#7.17: Aloe chu thing mirimhoi, tuia inchiein a mirim innam kha, mithi ruak chunga inthek le irpol zât a ni. hai le thingzungthum haiin a mirim kin hoitira. 18Tho hong ro! zânkhovârin lungthungna pâr lei khiak rei. Ei rôpsuama irpom irhlômin lei lôm rei. 19Ki pasal lak ina om maka, khual ram hlataka an zina. 20Sum tamtak a chôia, hapta hni hnunga kêng la hong suak a ti” a tia. 21Khanu hmêl satna khan an thêm inhnêa, a inriamna chong thum khan a hruai irhmang tâka. 22Voikhat rengin a zui zel tâka; sechal, an ithatna hmun tianga pan angin le sakhi thalin a milung a sunna hranga chânga irchôm ang khan. 23Va’n a thina hrang a nih ti inhre loia châng a ipan ngai ang kha a ni.
24Khasikin, ki nâipahai, atûn hin ki thuhai irngai unglân, ki bâia thu suakhai hi pom roi. 25Khaanga nupang kha nin lungrîl inhnê hrangin phal no unglân; a lampuia khan fe irhmang no roi. 26Pasal tamtak siatna a nia, tep zoiloi thina bi tak a ni. 27A ina ni fe’n chu mithi khua pan ang kha ni ni. Thina lampui nâitak chu a ni.
Currently Selected:
THUVÂRHAI 7: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
