THUVÂRHAI 6
6
Irdîn nangna dang
1Ki nâipa, mi dang lâkaihai chunga mophurtu hrangin chong nin kunga, 2ni chong ngeiin nang a khita; ni chonginkung ngeia nin ôkin chu, 3ki nâipa, kha mi irchamneina hnuaia ni om a nih ti inhre roh. Khannisianlân hiang hin suak hrang dân chu a ni: a kuang fe zôi zelin lân, nang insua hrangin ngên roh. 4Inmusu ta no’n lân, irngam chian ta no roh. 5Sa kâptu kuta irthokin sakhi a intân pe pat ngai angin, châng kamtu kut ata va a ivuang suak pe pat angin suak pat ro.
6Mi thaboihai khan phâivâng kuang fe’n lân, a lampui irchu roh. 7Anni khan rênghai, hruaituhai, roirêltuhai nei mahaia, 8khannisianlân, fûr laiin fâkrua an bukkhôma, sâl tika hrang an lei bûm ngai. 9O mi thaboi, i dôra sôt mo ni izâl chian hrang tâk? 10#Thuv 24.33-34 “La hong insîng viat hi rong” a ti ngai. 11Khannisianlân, a in kârin inriangna khan inru râlthuama irvo angin hong in-ôk a ti.
12Mi hmanghmunboi, mi siahai chu milak tho’n an irvâk mai ngai. 13Nang an huang theina hrangin an mit le an chonga, kut an veivâk ngai. 14A lungrîla tukullianna a oma, thil sual a ngaitua maia, irngeiloina a tû ngai. 15Khasikin, irningloiin siatna’n de thut a ta, anni chu a saterengin popliam an ti.
16-19 Rengpa’n thil sari hnôl ta taka a ihnôl le a irngai thei viat loi a om:
Lârirpâkhai,
milak milei hai,
mi ningthik sin loi thisen insuana kut hai,
thil saloi ngaitua ngai lungrîl hai,
sual sin hranga kal inhrâttir ngai ke hai,
inhriatpuitu dol milak chungirchuan ngai hai,
rual laia buaina siam ngai mi hai.
Uire loi hranga irdînna
20Ki nâipa, ni pa thupêkhai zômin lân, ni nu nang irchutirna irnghil viat no ro. 21An chonghai irtik maiin lân, ni lungrîla vong roh. 22An irchutirna khan nin zinnahaia nang hruai a ta, zâna nang enkol a ta, sûna roi nang zêkpui a ti. 23An thupêkhai kha vâr irtêk ang kha a nia; an hrilna khan hringna lampui nang irhmutir a ti. 24Nupang sual ata le mi dang dôngmahai chong thum taka irthokin nang inzôktir a ti. 25An satnahai chu irzuk no’n lân; an mit meng ir-âi khan nang in-ôktir no ri se. 26Pasalin, notizuar chu bai tiam khat man khomin ar chôk thei, khannisianlân, uirena’n chu a hringna ten zong a ti.
27Mi’n a puan kâng loiin mei a ipom thei ma ni? 28Mi a ke kâng loiin mei ir-al chunga a ife thei ma ni? 29Khaang khan, mi dang dôngma leh zâl ka chu tukhom tuang loiin suak no ni. 30Mi’n a phîngchâm sika fâkrua a inrûk chu hmusit ngai ma, 31Khannisianlân, ichelin a omin chu a bâk sari’n a ituam nôk ngêt hrang a nia, a inei murdi a ipêk zit hrang a ni. 32Mi dôngma irchûpuitu chu inhriatna nei ma. Ama le ama a insiat a nih ti inhre suak ngai mah. 33Kuttum tuangin hmâimôkna tong a ta; mualinphoi takin om mai a ti. 34Hnarsâna hi mihriam ninginmurna a nia; a phuba lâk niin chu ite hôi no ni. 35Irtannahai hi pom no nia; thilpêk tamtak pe khomin lân, a milung chuk pe ual no ni.
Currently Selected:
THUVÂRHAI 6: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
