THUVÂRHAI 5
5
Uirena ata irdîn hrang
1Ki nâipa, irngaiin lân, ki vârna le ki inhriatna tiang ni mikuar sung ro. 2Khanchu, omlam sa hong inhriat ni ta, ni chongbâi suak khan inhriatna nei mi ni nih ti inlang a ti. 3Nupang sual hmûr kha khuaihlutui ang dôra thumin, a dang khom oliv hriak angin irnâl a ti, 4khannisian a hnungkhôn taka chu ngaisiatna le dengintheina tih no chu nang mâk pe no ni. 5Thina ram tiang nang hruai a ta; a lampui fena chu thina lampui a ni. 6Hringna lama khan fe maka; khannisian ite inhre loiin a invâi a ni.
7Khasikin ki nâipa, ki thu irngaiin lân, ki bâia thu suakhai hi irnghil viat no ro. 8Khaanga nupang kuang ata irkiangin lân! A in mikot kôl khom va nâi no ro. 9khano’nchu ni roiinpuina kha mi danghaiin nei an ta, ni vânglaiin mi nunsiahai#5.9: Inrennaboi, nunsia ti thei a ni. kuta irhmang ni ti. 10A ni, ram dang mihai khan nir chon murdi lapai an ta, ni sinsôlna ra kha mi dangin dong an ti. 11Ni sûn hnungkhôna chu ni zâlhmuna chap ni ta, ni taksa le ni takpumhai fâk irhmang a ni tâk sikin, 12Khanchu “Itho mo ki lei irchutir loi? Itho mo mi danghai ni hrilna ki lei ipom loi? 13Ni’rchutirtuhai thu lak lei zôm ngai ma unga. An irchutirna tiang lak ki mikuar lei sung ngai ma unga. 14Khasikin voikhat rengin mipui laia mualinphoiin ki iom tâk a ni hi”, la ti ni ti.
15Ni dôngma chunga iamomin lân, ama kuang vai ni lungthungna pe ro. 16Nupang dang ata nâi ni inei khan ite satna nang insua pe no ni. 17Khual mihai hrang ni loiin, ni ta hrang vaiin ni nâihai kha an iseilian hrang a ni. 18Ni dôngmaa khan lômin lân, ni vânglai dôngma kuang vaia khan lômna zong ro, 19sazuk tuai le inditom tak angin. A inditomna khan nang inlômtir sian; a lungthungna khan nang hual mai ri se. 20Ki nâipa, itho mo nupang dang kuang ni lungthungna ni ipêk hrang? Itho mo mi dang dôngmahai inditomna chu ni inthang ual hrang? 21Rengpa’n ni sintho tinrêng a hmu zita. Ni fena tina nang a ien chian ngai a ni. 22Mi pualoi sualnahai kha châng a ni. Ama sualnahai ngeia khan a khit ngai. 23Mâni irsep thei loina sikin thi a ta; an vêtna hrai sikin irhmang a ti.
Currently Selected:
THUVÂRHAI 5: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
