THUVÂRHAI 29
29
1Mi’n an hril intam dôr a tukullian chu voikhat
rengin lan rîl a ta,
thoi nôk thei viat ta no ni.
2Hruaitu fel an omin chu mihai an lôm ngaia,
hruaitu sia omna rêk chu mihai chap inrungin an om ngai.
3Vârna irngaiinhlu chu a pa inlômtir a ti.
Notizuar chunga a poisa hmang inhek chu inriang a ti.
4Dik takin rêngin roi a rêlin chu ram an ding indet ngaia,
fâk inrûk a lâkin chu ram a siat ngai.
5A rualhai inpâk pai pai tum chu ama in-ôkna hranga châng kam a ni.
6Mi felhai zalên le raifân taka om laiin mi saloihai chu an siatna ngeia an irpal ngai.
7Mi fel khan inrianghai chungchâng thu an hriatpuia,
mi siahai rêkin chu kha thilhai inhriat thiamna nei ngai mahai.
8Mi dang mahripna nei loi mihaiin chu khopui an inbuai chit ngaia,
mi vârhai rêkin chu ningmurna an irkiangtir ngai.
9Mi vârin intô ar khalpuiin chu intô kha an nuia,
a mi êsêl an satir ual ngaia;
irngeina rêng rêng om thei ngai mah.
10Thisen insuaa inhrâl mihai khan mi dikhai an hnôl ngaia,
mi felhai rêkin chu mi dikhai hringna an inpâk ngai.
11Into’n chu a ningmur an lang suaktir ngaia,
mi vârhai rêkin chu an milung an suai zâma,
an dâihrek ngai.
12Ram hruaitu’n milak thu a’rngaiinna’n chu a sinthotuhai murdi an sual ngai.
13Inriang le mi hnuaisiatu irangna tak chu,
Rengpa’n an mit a invâr pe ru ruai a ni.
14Inrianghai dik taka roirêl petu rêng chu kumkhua’n inlal a ti.
15Sepna le irchutirna hi nâipanghai hrangin a sa.
Ama nuamlamin a omin chu a nu inzak irhmutir a ti.
16Mi siahai an inlalin chu siatna a pung ngai.
Mi fel rêkin chu khaang khan mihai inrîlna kha hmu a ti.
17Ni nâipa sepin lân,
lungirngamna nang pe a ti.
a ni, ni lungrîl lômna intung pe a ti.
18Lei hmu bakna a om no’n chu,
mihai an irhmang ngaia,
dân vong insatu rêk chu raiinfân a ti.
19Suak chu chongbâi vaia sep thei ni mah.
Inhre khom sianlân ngaisak no ni.
20Mi ngaitua loia chong sêt suat ngai nêkin chu intokhak chu sabei hrang a om ual.
21A nâipangtea irthokin ni suak kha
nin dotin chu a hnungkhôna chu nir chon khom nang la’rchûpui a ti.
22Ninginmur zel zel ngai mihaiin irkhalna le buaina tamtak an kêlsua ngai.
23Mi a lârirpâkna irhniamna ata,
mi lungrîl irngaiintôm rêk chu chôiirsângin om a ti.
24Inru irthoppuitu chu ama hringna a ihnôl a ni.
Roirêlna hmuna thudik an sîrin chu izêm tong a ta,
thudik an sîr no’n chu Pathianin khua sâl a ti.
25Mi dang irngaidân uksak hrai hi ichi a oma,
Rengpa irnghat rêk chu zôk a ti.
26Mi tamtakin roirêltuhai ngaipoimo dongna an zong ngaia,
mihriam chunga roirêlna dik chu Rengpa kuang ata suak a ni.
27Mi siahai chu mi felhai hrangin intirom an nia,
mi felhai khom mi siahai hrangin intirom an ni.
Currently Selected:
THUVÂRHAI 29: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
